Туить минек эрямосто Ине Отечественной войнань участниктне. Овсе аволь ламо лиядсть. Эри Самара ошсо Советской Союзонь Героесь Чудайкин Владимир Иванович. Сон чачсь тёжа вейксэсядт комсь ветеце иестэ Поповка велес, неень шкане Темниковской райононь сокицянь – видицянь семияс. Чачсь пек стака, вачо шкасто. Важодеманть кис путнесть палкинеть, ярмакт эзть пандо. Палкинетнень лангс мезеяк а рамат. Володя нейсь, кода стакасто важоди колхозсо авазо. Стараясь тензэ лездамс кудо ютконь тевтнесэ: лазнось пенгть, канднесь лисьмасто ведь, андылинзе аванзо самс кудо ракшатнень. Начальной школань прядомадо мельга поладомс тонавтнеманть арасель возможность. Авазо арсесь-тейсь ды кучизе Володянь покштянзо пелев Куйбышевской райононь Коноваловка велес. Тосо ломантнень колхозсо важодемаст кис пандсть ярмак. Володянь путызь совхозонь бахчань ванстомо. Аламо шкань ютазь сонзо редизе совхозонь директорось, вадря важодеманть кис кучизе тонавтнеме Куйбышев ошос ФЗО-с. Тосо тонавтсть столярной ды плотницкой тевс. Володя тонавтнесь вадрясто, мастертнэ путнесть эйсэнзэ примеркс лия тонавтницятне икеле. Войнанть ушодомадо мельга ФЗО-сть кучизь важодеме авиационной заводов. Чудайкин важодсь – слесарекс. Сонензэ максть бронь. Авиационной заводось нолдась Ил-2 самолёт. Не самолётнэде немецтне пелильть теке толдо. Теке иестэнть Володя сови комсомолонь рядтнэс, правты пря туемс фронтов, ятонть каршо тюреме. Сонензэ лезды апак учонь тев. Чудайкин тееви содавиксэкс вейке военной капитан марто, конась пурнась од ломанть танкистэкс тонавтнеме. Тёжа вейксэсядт ниленьгемень нилеце иестэ Володянь кучизь тонавтнеме танкистэнь школав, конась ульнесь Челябинской областьсэ. Сонзо прядомадо мельга сон воеви Ине войнань фронтнэсэ, 269 танковой батальонсо, танконь оружиянь заряжающеекс. Сынь олякстомтыть ятонть эйстэ Польшанть. Тюрить Берлин ошонть кис тюрематнесэ. Устававсть Рейхстагонть кис верьде-верьс тюрематне. Сынь ютасть эрьва кварталонть, эрьва куронть, эрьва кудонть, эрьва метранть кис. Атакасто атакас ютась кавтосядт кодгемень вейксэце танконь батальонось. Рейхстагонь кис тюрематнестэ, теине куросонть, немецтне тапизь минек икеле молиця танконть. Секс, што Берлин ошсонть куротне ульнесть пек теинеть, танконь колоннась стясь. Эрявсь тапазь танконть саемс, штобу а тапавлизь бу лиятнень. Сестэ Чудайкин прянь апак вансто ятонь пулятнень алга лись эсь боевой машинастонзо чийсь тапазь танконтень ды поводизе троссо эсь машиназонзо. Перть пельганзо сезневсть снарядт, свистязь ливтнесть пулят, но Владимир Иванович теке орожиязь чийсь танконть пеле, штобу мейле менстямс сонзо тросонть эйстэ. Кись ульнесь олякстомтозь, танконь батальонось сезезь-сезевсь Рейхстагонть ёнов. Апрелень колоньгеменце чистэ Рейхстагонть кис тюрематнесэ Чудайкинэнь танкось ульнесь тапазь. Владимир Иванович ранявсь, но сон эсе кадо ятонть каршо тюреманть.Саизе эсь танконть ятонь толонть алдо ванстозь-кородозь таркас.
Изнямонть вастызе госпитальсэ. Цветиця ковонь колоньгемень васенце чистэ старшей сержантось Чудайкин Владимир Иванович казезель Советской Союзонь Героень лемсэ.
Сергей Фёдорович Ахромеев чачсь цвети ковонь ветеце чистэ тёжа вейксэсядт комсь колмоце иестэ кезэрень покш Виндрей велесэ, неень шкань Торбеевской районсо, сокицянь – видицянь семиясо.Тетязо комсеце иетнестэ ульнесь раскулаченной, тусь ве ёнов важодеме ды ёмась. Авазо лиядсь ськамонзо кавто эйкакш марто, тусь Виндряй велестэ Московов эсь сазоронзо пелев. Виндряй велесэнть эрясть мирдензэ ялаксонзо: вейкесь эйстэст ульнесь лесничеекс, омбоцесь врачокс, колмоцесь учителекс, но авазо эзь кармак мекс бути сыненст пшкалеме. Тёжа вейксэсядт колоньгемень кавтоце иестэ Сергей совась школав. Тонавтнесь мелень путозь, пек вечксь история, философия, литература. Уже Ине Отечественной войнадо мельга Сергей Фёдоровичень учительницазо кази тензэ фотокарточка истямо сёрмадовкс марто «Тонавтницянтень, конась икельдизе тонавтыцянть». Школасо Сергей совась комсомолс, кармась комсомолонь комитетэнь секретарекс, учкомонь членэкс. Школань прядомадо мейле сон арсесь поступамс тонавтнеме институтов филологокс, философокс или же историкекс, но теевсь овсе а истя. Покш патязо лись мирденень, авазо тусь эрямо сонзэ ёнов. Ульнесь ли кемготовоце иесэ цёрыненть мелезэ кармамс морской офицерэкс? Сонзо овсе арасель мелезэ кармамс морской офицерэкс!
Но эсь квартираст сынст арасель, свал ярмак лангс эрясть ломань кедьсэ, секс Сергейнень савсь комсомолонь путёвкань коряс туемс тонавтнеме Военно-морской спецшколав, тосо курсантнэнь андсь, оршась государствась, максь тенст общежития. Тёжа вейксэсядт ниленьгемень васенце иестэ аштем ковонь комсь кавтовоце чистэ устававсь Ине Отечественной войнась, Сергей тонавтниль уш Михаил Васильевич Фрунзень лемсэ морской училищасо, прядызе васень курсонть. Васенце ды омбоце курсонь курсантнэнь эйстэ пурныть особой назначениянь отряд, конань направизь Таллин ошонтень эрявикс объектнэнь ванстомо. Медь ковсто Сергей Фёдорович Ленинградской фронтсо, вансты Октябрьской революциянь лавсенть - Ленинград ошонть. Ацам ковсто Ахромеев понги госпиталев, уже блокированной Ленинград ошос. Ацам ковонть прядомсто тёжа вейксэсядт ниленьгемень васенце иестэ сась истямо распоряжения: военно-морской училищань курсантнэнь эвакуировамс Астрахань ошов. Блокированной Ленинград ошостонть ютасть ялга - Эрямонь кияванть, те кияванть куродозь ошонтень усксть ярсамопель, медикамент, боеприпаст, сонзэ эзга ошостонть эвакуировасть ошонь эрицятнень. Те кияванть Ленинград ошстонть госпитальстэ ютасть ялга ды усксть истят ранявозь кемгавксо иесэ цёракайтнень. Вийтемекадовозь Ахромеевень кельмевтизь пильгензэ, устававсь гангрена. Кавонест пильгензэ решазель керямс. Оймезэ истякак а содат мень вийсэ кирдевсь? А тесэ ещё те операциясь. Сергей эсь прянзо эрицякс уже эзь лово. Сюкпря се докторонтень, сон ульнесь дворянской раськень эйстэ, бывшейтнеде, кармась лецямо эйсэнзэ эсь способсо. Ды лецизе! И пильгензэ идинзе, и эрямонзо ды курямодояк кардызе. Мейле сонзо ещё кавто ковт лецясть дистрофиядо. Тёжа вейксэсядт ниленьгемень кавтоце иень прядомс сон велявты фронтов. Флотсо служамо Ахромеевнень эзизь сае шумбра чинзэ коряс, савсь тензэ тонавтнемс военной училищасо ды Сталинградской фронтов сон сась лейтенантонь званиясо, аравтызь стрелковой полконь командирэкс. Мейле воевась Украинской ды Южной фронтнэсэ. Олякстомсь немецтнень эйстэ Румыниянть. Ине Отечественной войнанть прядызе капитанонь званиясо. Тонавтнесь бронетанковой войскань самоходной артиллериянь высшей офицерской школасо. Рядовой офицерстэ кайсь Советской Союзонь Маршалокс. Войнадо мельга сон кандсь служба Главной управлениянь начальникекс, Генеральной штабонь начальникень заместителекс, Генеральньй штабонь начальникень васенце заместителекс, Генеральной штабонь начальникекс, Советской Союзонь оборонань министрань васенце заместителекс ды президентэнть советникекс. Тёжа вейксэсядт кавксоньгемень омбоце иестэ Сергей Фёдорович Ахромеевень казизь Советской Союзоь Героень лемсэ Афганистанонть кис. Эрьва солдатонть ды офицерэнь ульнесь эсь Афганистанозо ды эсензэ кизэ те войнантень, конась ютась вейксэ иеде ламо. Сергей Фёдорович мольсь каршо, штобу ветямс Афганистанов минек Советской Союзонь войскатнень ограниченной контингент. Сон ульнесь Афганистансо минек войскатнень оперативной группань штабонь начальникекс. Тёжа вейксэсядт кавксоньгемень колмоце иестэ Ахромеевень казизь Маршалонь лемсэ. Сергей Фёдорович туи эрямостонть тёжа вейксэсядт вейксэньгемень васенце иестэ, зярдо калады минек Советской Союзось.
Соединённой Штатонь экс президентэсь Джордж Буш истя ледстнесть Сергей Фёдорович ланга: «Кода президент, монь ульнесь а стувтовикс вастовомам Ахромеев Маршалонть марто. Сонензэ эсть вечкевть эсь масторсонть нярыя полавтовкстнэ, конатнень сон нейсь. Мон ванынь лангозонзо вейке вастомастонть ды арсинь, вот ашти монь икеле ломань, конась якшамо войнань ламо иень перть ашти минек ёндо лия ёно. Вот мон аштян те ломаненть марто, конась эсь масторсонзо покш военной чиновник, мон марян сонензэ ансяк ломанькс путома чи. Мись? Секс, што эрьва лексемасонзо сон невтсь эсь масторонтень покш вечкема, анокчи эсь чачома масторонь икеле долгонть топавтомантень. Сон ульнесь коммунистэкс, явсь минек эйстэ эсь вановтонзо коряс. Но сон ульнесь военной ломань, почет марто служась эсь масторонтень. Весе те и тейсь монь лангс пек покш мельс аравкс.»
Т.В. Чиндяйкина |
