(к 120-летию со дня рождения (в рамках празднования 75-летия Великой Победы посвящается! ) Ине Изнямонть малавгавтсть аволь ансяк фронтсо тюрицятне, истя жо ламо вий макссть сермадыйтне, театрань ломантне, морыцятне, лиякс меремс культурасо ды литературасо важодицятне. Сынь ютавтнесть васовомат тылсэ тружениктнень марто, фронтсо тейнесть концерт воевицятнень икеле. Рузонь ине морыцясь Лидия Андреевна Русланова ламодояк ламо концерт ютавтсь фронтсо солдаттнэнь икеле. Эрзянь авась Лидия Андреевна Русланова чачсь Даниловка уездэнь Пенза енксонь Лопатина велесэ эрзянь семиясо. Тетязо Андриан Маркелович Лейкин чавови Васенце Империалистический войнасо. Аванзо куломадо мейле кавто иень перть эрясь Даря васолбабанзо кедьсэ. Зярдо кулы се, тунь урозокс кадовозенть, сонзэ, сисемь иесэ тейтерьканть, роднятне ильтясызь Саратов ошалксонь приютов. Нать, секскак Лидия Русланова вечкиль сцена лангс лиснеме эрзянь оршамкасо ды мерстькак тензэ «мордовка». Проска Лейкина (Лидия Руслановакс лемдясызь приютсо) чачсь 1900-це иень октябрянь 27 –це чистэ. Велень эрицятне вечкилизь моротнень, сехте пек – нусманятнень, конатне евтнильть стака уцяскадост. Мартост Проскаяк морсекшнесь. Ды истя чевтьстэ-мазыйстэ – перьканзо пуромозтне натой аваргадыльть. Алкуксонь морокс, конась васенцекс токизе Руслановань седеензэ – те ульнесь лайшема, конань лайшесь бабазо тетянзо солдатокс ильтямсто . Приютсо Лида ризнэзь-мелявтозь морсекшнесь ськамочиденть ды оймень ризкстнэде. Церьковань регентэсь, кона тонавтсь эйсэнзэ нотань грамотас, сайсы морамо церьковань хорс. «Ве тейтерьканть истямо мазый вайгелезэ – седеенек калавтозь калавты» - шнасть тетерненть церьковав якиця аватне. Музыкань васенце уроктнеде Лидия Андреевна истя сермады: «Тональносттнень мон сеске сайнелинь. Эрьва манявксонть кисэ псаломщикесь норовась човинька штатолонь пусмосо нерькстамон». Приютсто лисезтнень кучнильть важодеме мебелень тейнемань фабрикав. Руслановань сайсызь полировщицакс. Цехень коряс автне икелензэ яла энялдсть: «Тон, морак, Лида, планонть минсь топавтсынек, тень кисэ иля ризнэ». Васенце покш выступлениязо ютась Оперной театрань сцена лангсо съездтэ мейле ютавтозь концертсэ, зярдо пурнавкшность солдатонь депутатнэ. Кемзисемге иетькак Русланованень арасельть - сонзэ уш алкуксонь певицакс ловсть. Седе тов, сайсызь тонавтнеме консерваторияв. Кода весе эрзятне, ломанесь сон панжадо седеель, валонзо видьстэ чамас ёртнекшныль. Те, нама, консерваториянь кой-кона профессортнэнь мельс пек эзь тукшно, ды курок Лидиянень тонавтнеманзо сави кадомс. Сонсь Лидия кортась истя: «Монсь чарькодинь – акдемической певица эйстэнь эзь лисе. Весе вием ульнесть сеть моротнестэ, конатне народонь ойместэ чукадевсть. Сынст мон седей потстон таркселинь. Истямокс, нать, ломантнень туртов эрявиньгак…» Лидия Русланова фольклоронь произведениядо башка морась героико-патриотической морот. Самай сон советский эстрадниктнень ютксто васенцекс сцена лангс ливтинзе истят народной моротнень «По долинам и по взгорьям», « Партизан Железняк», «Каховка», «Орленок», «Катюша» ды лият. Те самай сон пурнась артистэнь бригада ды 1941 иестэ саезь войнанть прядомс моро марто ютынзе весе фронтнэнь. 1945 иень тундосто советской солдаттнэнь марто сови Берлинэв, калавтозь Рейхстагонь стенас кадсы кедьсермадовксонзо. Тоско жо, Рейхстагонть икеле максы покштояк покш концерт. Гайгсть «Комаринскоесь», «Очаровательные глазки», «Валенки», «Я на горку шла» ды ламо лия морот. Цяпасть сонензэ апак лотксе. Ёвтнить, сонсь Жуков маршалось эзь кирдеве, кандовтсь баян ды кармась Русланованень седямо. Войнань китне сюлмизь Л. Руслановань эрямо кинзэ Владимир Викторович Крюков генералонть марто. В.В. Крюков сестэ ульнесь Омбоце гвардейской кавалериянь корпусонь командирэкс ды Вислань-Одерэнь, Восточно-Померанонь операциятнень ветиекс. Паряк, сень кисэ, мекс Л. Русланова а вечкиль сюконякшномо, эли сень кисэ, мекс мирдезэ ульнесь В. Крюков генералось, газетатне кармасть артистканть прясто-пильгс «муськемензэ». Лемдясызь «вейсэнь улипаронь салсыцякс», горобиянзо, келя, сырнесэ ды алмазсо пештязь. Лавгамотне ушодовсть, улема, сень эйстэ: Русланова вечкиль картинань пурнамо - сынст эрямонзо перть рамсекшнесь, теке марто маштыль юткстост мукшномс алкуксонь искусствань экземплярт.
Артистканть творчествадо сермадозель пек аламо. Виктор Ардов писателесь те ильведевксэнть витизе –зярыя лецтнемат кадсь Руслановадо, эдь сонзэ семиязо ояксчисэ эрясь Руслановань семиянзо марто. «Россиянь ине вайгель, - истя певицадонть мери Федор Шаляпин. – Ине ды апак изня Россиянь тейтерь сон», - полады. 1940-це иестэ В.В. Крюков генералонть кулы козяйказо Ханко усиясонть-островсонть, косо финской войнадонть мейле сон служась кавалерийский корпусонь командирэкс. Ававтомо кадовсь тейтерезэ Маргарита, кона зярс эрясь роднянь кедьсэ. Весть Руслановань бригаданзо ускизь Крюковонь «хозяйствав» . Теске артисткась кадовияк. Кода мирдть-нить, В. Крюков ды Л. Русланова печтясть кенярксов ды ламо пежетькс марто уцяска. Вана кода од авадонзо ёвтни сонсь Маргарита Крюкова: «Тетям мерсь тень инжеденть: зярс авам, марят, больницясо ашти ( куломадонзо монень кияк эзь евта), мельгат сон карми яксеме», - невтсь Лидия Андреевна лангс. «Авай» мон сеске карминь мереме тензэ. Колмошка иень ютазь, зярдо евтасть тиринь авадон – сдейсэнь покш ризнэма арасель. Тетянь марто пек чуросто вастневинь, авамгак фронтсто эзь лисне. Зярдо ве газетасто ловныя лавгамонть – черем дубушки стясть: те кода истя, «керш» концерттнэнь вельде Русланова бриллиант рамсекшни? Визьксэнь а содыцят! Фронтсо максозь концертнэнь кис артисттнэнень ярмакт эзть пандтне, весе гонорартнэ кучновсть Мосэстрада счетонтень. Руслановань счетсонть эсензэ Лидия Андреевнань кедьсэ сермадозель: «Концертэнь кис гонорартнэнь Оборонань фондс ютавтан». Натой седеяк ламо евтан: семиянь ярмактнень лангс авам рамась «Катюшань» кавто батареят. Вана тенк Руслановань бриллиантонзо!». 1418 чинь ды вень перть верьсэ валнозь Изнямось кодамо уцяскав пинге алтась! Солдаттнэнь мелест ульнесь кунсоломс ансяк ссонзэ, Лидия Андреевнань. Се шкань содавикс артисттнэ – Ойстрах, Оборин, Москвин, Качалов, Уланова – сцена лангс мельганзо пельсть лиснемеде. Маргарита Крюкова теде истя ёвтни: «Авань эйсэ «королевакс» лемдясть. Эйкакшонь превсэ арсинь: кодамо сон королева – сэрьс а пек сэрей ды якияк аволь пава ладсо? Мейле чарькодинь, мейсэ тевесь: авам, кона чачсь вирь потс ваязь велесэ ды кастозель урозонь кудосо, таланттонзо башка, прянзо истя маштсь вере кандтнеме – ваксозонзо а лоткаваткак. Истямокс сон ансяк ве ёндо неявсь! Авам простойде простоель. А вечкиль прянь шнамо, апаро валонь кортыцят ды кургс эцицят эзь вечке!» Л.А.Русланованень сехте малавикс оякс ульнесь Нина Ольшанская, Виктор Ардов писателенть низэ ды Алексей Баталов киноактеронть авазо. Крюковтнень кедьстэ эзть лисне Утесовтне, Клавдия Шульженко, Ольга Воронец ды ламо лия артистт. Кудазортнэ машсть инжень каванямо, ваньксстэ кудопотмост кирдеме. Эсь семиянзо мельга яксеманть ды сцена лангс лиснеманть Л.А. Русланова ловсь святой тевекс. Эрьва валонзо, эрьва кедень ахолдамонзо лангсо часонь час репетировакшныль. Сон ульнес моротнень омбоце авторокс – сцена лангс аволь прялангсо велямот ды рунгонь менчевемат невтнесь, кода неень артисттнэ. Вана мекс народной морось ульнесь эстрадань ветиця жанракс. Морамонь коряс тонатыцязо, Саратовской консерваториянь профессорось М.Д. Медведев, ледстни: «Русланованень паро ладсо оперной театрасо морсемс. Ансяк сон эйкакшпингстэнзэ саезь педясь народной моротнес…» Алкукскак, зярдо сон морсесь «Землянка» эли «Синий платочек» моротнень (меельценть Клавдия Ивановна Шульженконень «казизе», конань певтеме вечкелизе) – кунсолыцятне натой стякшныльть таркастост. Баянсо – Борис Мандрус, Осиповонь оркестранть мартояк сеедьстэ лисниль. Гергий Константинович Жуков маршалонть малавикс ялгакс ульнесь В.В. Крюков полковникесь. Зярдо Жуковонь сайсы КГБ-сь, Крюковгак понги «яжамс» секе ведьгевень кевтнень алов. Седе тов Жуковонь нолдасызь, а Советский Союзонь Героенть В.В. Крюков генерал-лейтенантонть кедьстэ сайсызь весе казнензэ ды званиянзо, тейсызь чумокс. 1948-це иень сентября ковонь 18-це чинь валскень 5 чассто В.В. Крюков Рита тейтерензэ марто ардсть аэродромов гастрольстэ велявтыця Руслановань вастомо. Эзть пачкоде… Сынст вастсызь… озавтсызь раужо машинас. Лидия Андреевнаньгак секе чистэ озавтсызь. Сехте вечкевикс певицанть пекстасызь «Советэнь каршо кенгелеманзо кис». Ломантне марясть Руслановадо, келя, кирдеви Тайшет ошалксонь колониясо. Маласо аштиця велетнестэ тензэ кармасть кучомо кевердезь кемть, варьгат, ярсамкат-мезть. Колониянь прявттнэ тандадсть тень эйстэ, ды курок певицанть усксызь Владимирской централс. Сталинэнь куломадл мейле, Руслановань ды Крюковонь нолдасызь чумонь аразьчист кувалма. Эсь масторост каршо, чарькодеви, кажот сынь эзть тейне, ды ялатеке, кода тюрьмасо а мезень кисэ аштесть, кода тосо нарьгасть лангсост, теде сынь эзть ледстне зярдояк. Пекстамо кудотнесэ Л.А.Русланова кемгавтовоксть кельмевтникшнинзе тевелявонзо, кода живстэ кадовсь, сонськак эзь чарькоде. Колониясто велявтозь, сон чопавти вечкевикс тевезэнзэ: ардтнекшнесь масторонть келес концерт марто, пластинкас сермалесь морот. Кода сехте покш концертэзэ тюрьмадо мейле ютась, ёвтни А.М. Моро поэтэсь: «Тов минь понгинек М.Н. Коляденков профессоронть марто… Кизэнь недлячись манеель, Московось ломанень лейсэ пештязель. Горькиень лемсэ ульцяванть ансяк сыргинек М.Н. Коляденков марто Кремлянть енов – се конной милициясо ванстови. Ашо айгортнэ цок-цок тейнесть. Ашо кительсэльть милиционертнэяк. А уш народтонть, народтонть зяро – ульцясь сэрьс пештязель – истямо покш мель ульнесь Руслановань кунсоломс! Кувать налксесь оркестрась. Вана сонсь Русланова. Лангсонзо – эрзявань руця, карксамганзо эчке пулай сюлмазь. Чамазо аламодо ловтаня. Ушодызе «Степь да степь кругом» моронть – залось опшкадсь. Истя сестэ эрси, зярдо чевте пиземесэ тороземезь модась менелень лембеденть чевтемкшны ды зярс-мейс нармунтне а морсить. Цёковонь кондямокс сонсь Русланова ульнесь. Кедьсэ-пильгсэ сон эзь яхое, прянзо кирдсь сэтьместэ. Ансяк турванзо аламнеде сорность. Те, нать, талномадонть – истямо концертэзэ пек умок арасель. А уш вайгелезэ… вайгелезэ. Мерят, степенть куншкас саимизь, косо пулясо эшкезь церынесь кулома учось… Ломантне апак визде сельведть нардтнесть. Кенярдомадонть ды артистканть марто ламо иень перть явомадонть…. Крюков генерал – лейтенантось, (званиянть ды ордентнэнь мекев велявтызь), кода мейле карминь содамо оперной певицанть Елена Ивановна Грибовань пельде (сонгак эрзяваль, Сибирьсэ чачсь), концертсэ арасель – Русланова сонсь эзизе сае. Мирдесь седейормасо майсекшныль, нинзэ морамонть радионь пачк кунсолось». Владимир Викторович олясо эрясь ансяк кото иеть. Врачтнэ мерсть: седеезэ аволь черьбесэ, шанжавлондакшонь нардесэ кирдевсь. Мирденть калмамодо мейле пель ие Лидия Андреевна аволь ансяк концертэнь макснеме, кудостояк пек чуросто лисниль. Ялатеке кодат стака чить илязт уле, моровтомо сон ёмаволь. Ды таго вайгелезэ стадионтнэсэ гайгсь. Эрьва косо икелензэ энялдсть морамс «Валенки», «Степь да степь кругом», «Меж высоких хлебов» моротнень. Сынь кеместэ сюлмазельть ине певицанть марто. Эсь меельце концертэнзэ – истямоль уш, нать, уцясказо – Лидия Андреевна Русланова ютавтызе 1973-це иень августсто Ростов ошсо. Тосо, косо, 50 иеде иеде икеле ютась васенце концертэзэ. Л. Русланованень 1942-це иестэ макссть РСФР-нь Заслуженной артисткань лем. Сехте паро казнекс тензэ ульнесь кунсолыцятнень вечкемаст. Кулось ине артисткась 1973 иень сентябрянь 21-це чистэ седей ормадо. Калмазь В.В. Крюковонь вакссо Новодевичьей калмолангсо Москов ошсо. Подготовила Г.П. Евстигнеева.
| 
