Воскресенье, 26.06.2022, 21:03
Главная | Регистрация | Вход Приветствую Вас Гость | RSS
Категории каталога
Статьи Мемориального музея [3153]
Документы из ЦАМО [10]
Газета "Солдат" [26]
Статьи поисковиков МРПО "Поиск" [14]
Статьи поисковиков АПГ "Броня" [6]
Дневники Вахт Памяти [3]
Форма входа
Поиск
Друзья сайта
Наш опрос
Как часто вы посещаете Мемориальный музей
Всего ответов: 516
Главная » Статьи » Статьи Мемориального музея

Тиринь кельсэ лопине. Лидия Вечкановань боевой кинзэ...

Оккупированной территориятнесэ, фашистэнь тылсэ партизанской шаштомась Ине Отечественной войнань иетнестэ, кармась ютамо васенце читнестэ саезь. Сон ульнесь составной пельксэкс Советской народонть фашистнэнь каршо тюрематнесэ ды кармась  важной факторокс фашистской Германиянть  ды сонзо союзникензэ лангсо  Ине Изнямонтень пачкодемасонть. Уже тёжа вейксэсядт ниленьгемень васенце иень прядомантень оккупированной территориятнесэ воёвасть кавто тёжадо ламо партизанской отрядт, косо тюрсть ятонть каршо вейксэньгемень тёжат партизант. Весе Ине Отечественной войнань иетнень перть ятонть тылсэ воевасть кото тёжадо ламо партизанонь отрядт, конатнесэ противникенть каршо  тюрсть миллиондо ламо партизант. Партизанской шаштомась ятонь тылсэ, кандсь келей народно-патриотической обуця. Медь ковонь колмоце чистэ тёжа вейксэсядт ниленьгемень васенце иестэ Иосиф Висарионович Сталин эсь выступлениясонзо мерекшнесь истят валт: «Ятонть ало территориятнесэ теемс ятонтень ды сонзо пособникензэ туртов истят условият, штобу эрьва эскельксэсэст сасамс, кундамс ды маштомс сынст, сезнемс весе мероприятияст». Сядо комсь сисемь тёжадо ламо партизант ульнесть казезь «Отечественной войнань партизанонь» васенце ды омбоце степенень медальсэ, сядо кавксоньгемень ниле тёжадо ламо казезь советской Союзонь орденсэ ды медальсэ, кавтосядт ниленьгемень вейксэ казезь Советской Союзонь Героень лемсэ. Малав кавксоньгемень минек уроженецэнек  Ине Отечественной войнасонть воевасть партизанской отрядтнэсэ.  Сынст ютксо ульнесь Вечканова Лидия Максимовна.
Рябова-Вечканова Лидия Максимовна чачсь тёжа вейксэсядт комсь кавтовоце иестэ Старой Селища велес Большеигнатовской районс. Вечкановонь кудо раськест ульнесь покш. Аваст секе тев сэредсь, секс Лиданень савсь туемс школасто тонавтнемстэ кавксо классонь апак прядо. Тёжа вейксэсядт колоньгемень вейксэце иестэ аваст кулось, кудо раськесь теке сразу чамсь, кармась улеме урозокс. Сынст покш патясь эрясь Саранск ошсо ды сон тердизе Лидань вишка ялаксост марто самс эрямо эстензэ. Тетяст ещё вейке ялаксост марто лиядсь эрямо велес. Сарансойсэ Лида сеске жо кармась важодеме центральной телеграфсо, тонавтнесь телеграфист-морзистэкс.
Тёжа вейксэсядт ниленьгемень васенце иесь кандс ламо зыян ды седей ризкс. Войнань уставамсто кулось тетяст, мельганзо кемколмово иесэ ялаксост. Тейтересть седеезэ раздезь-раздевсь. Войнась, тетяст ды ялаксост куломась-весе тапарявсть вейке покш кеверьксэкс. Седей ризксэсь ульнесь пек покш. Тёжа вейксэсядт ниленьгемень омбоце иестэ Лидань ды ещё нярыя Саранск ошонь тейтертнень тердизь Комсомолонь обкомс. Кортась мартост Комсомолонь обкомонь васенце секретаресь: «Тынь чарькодтядо, минек Чачома масторось палы войнань толонть потсо, фашистнэ пачкодсть Москов ошонть алов. Минь тынк тердидизь секс, што эряви пурнамс тейтерень группа, конань минь направасынек Москов ошов спецшколав, косо тонавтыть радист, конатне кармить воевамо ятонть тылсэ. Те тевесь пек опасной, зыянов ды стака, тыненк сави воевамс оккупированной территориясо партизанонь отрядсо. Секс те школантень кармить направазь ансяк доброволецт». 
Мольсть Ине Отечественной войнанть сех стака иетне, весе народось кода маштсь истя и лездась фронтонтень. Лида Вечканова сермадстызе прянзо те группантень. Школасонть тонавтсь содамс рациянть устройстванзо, шифровальной тевенть, передачань ды приёмонь правилатнень. Тонавтнемась ютась бойкасто. Школанть прядомадо мельга Лида кармась улеме радистка-шифровальщицакс. Теде мельга уставави сонзо боевой биографиязо. Неть читнестэ саезь сон юты войнань толонть пачк, воеви ятонь пеле-тылсэ, секень вант понгат фашистнэнь кедьс, косто уже живойкс а менят, командованиянь заданиятнесэ Лида топавты мужествань ды отвагань невтезь. Вечканова фашистэнь тылсэ аноксты связь партизанской отрядтнэнь Штабонть ды Покш масторонь марто. Партизанской отрядсо радиостанция -те покш тев. Сонзо марто партизантнэ содасть кода молить тевтне минек фронтнэсэ, кодамо тосо боевой обстановкась, радиостанциясть пельде сыненст макснесть боевой заданият, ды сынст ульнесь возможностест вешемс боеприпаст, медикамент, взрывчатка, продовольствия. А лия ёндо радиостанциясь кандсь истя жо покш мелявкс. Сонзо волнанзо важодемстэ может кундамс противникесь, ды неть волнатнень кувалма ловномс косо ашти партизанской отрядонть базазо. Секс аламо шкань ютазь савиль полавтомс партизанонь базанть тарканзо.
Ютась тёжа вейксэсядт ниленьгемень колмоце иесь. Аштем ковонь комсь котоце чистэ «За Родину» партизанской отрядось, косо Лида топавтсь эсь васенце боевой заданиянзо, кучозель Полтавской областес, конась ульнесь оккупированной ятонть эйсэ. Партизантнэнь икелев ульнесь путозь задача, лездамс Якстере Армиянь частненень сыргамс наступленияв. Те заданиянть топавтозь партизантнэ тапасть фашистнэнь подразделеният, сезнесть боеприпаст ды оружия марто складост, чугункань ды шоссейной китнень ды сэдтнень, теке марто тапасть ламо ятонь живой сила. Партизанской шаштомась кандсь действующей Армиянтень, покш а ёвтавиця лезкс. Полтавской областенть олякстовтомадо мельга Лидия Вечканова велявты мекев партизанской шаштомань штабов. Ацам ковсто, тёжа вейксэсядт ниленьгемень колмоце иестэ Лидия Максимовна топавтсь боевой задания «Советской Молдавия» отрядсонть, конань лангсо командовась Мухин полковникесь. Луцк-Ровно районсо партизантнэ воевасть аволь ансяк фашистнэ марто, но и бандэровецтнэ мартояк. Тёжа вейксэсядт ниленьгемень нилеце иентень Молдавиянь территориясонть ульнесть ламо партизанской отрядт. Сынь тейнесть кежев каявомат ятонть лангс, тапасть немецтнень планост, катардсть сонзо подразделениянь тевень молемаст. Азарць карательтне стараясть пандомс партизантнэнень, тейнесть кундамот. Сурцезь-сурцесть виренть тусто таркатнень. Вейке кундамодо мельга эсэсовецтнэ машсть ламо вейке партизанской отрядонь боецт, ды саизь полонс радистканть, омбоце отрядонть саизь весе боевой запасост ды радиостанциянть питаниянзо. Партизанской шаштомань Штабсонть эсть сода отрядтнэнь уцяскадо, секс што арасель мартост кодамояк связь. Командованиясь сась истямо решенияс, кучомс тов диверсионной группа, симемь ломаньстэ. Те группантень радисткакс совась Лида Вечканова. Сонзэ туртов ульнесь путозь боевой задача-ладямс отрядонть ды Штабонть ютксо связенть. Аштем ковонь чокшне прифронтовой аэродромсто кепететсть менельс сисемь самолёт У-2, ливтясть фронтонь линиянть трокс. Косо-бути вирьтнень потсо кеккшнить партизантэ. Самолётнэ пачкодсть целест вельксэс. Марязевсь командась: «Анокстамс!» Парашютсо кирнявтомась радистэнть туртов максови пек стакасто, ведь сонзэ марто ещё рация марто питаниянь блокось. Ансяк омбоце кругстонть Лида лисевсь самолётонть сёлмонзо лангс. Тулкадезь-тулкадевсь самолётонть эйстэ ды ёмась раужо отьмантень. Валгсь пакся лангс. Бойкасто пурнызе парашютонть, максь колмо сигнальной свистямот, каршонзо кияк эзь отвеча. Сась тензэ истямо мель, валгсь аволь те таркантень козонь эрявсь, лиядсь боевой ялганзо эйстэ. Эрявсь ваномс косо сон ули, ушосонть чопода, савсь учомс валдовоманть. Валдолгадозь кекшсь чувтонь озавкс потс. Цела чи аштесь кекшезь. Эрявсь теемс связь Штабонть марто, ключизе рациянзо. Радиограммасонть сермадозель срочна тензэ муемс партизантнэнь. Но косто сынст муемс, Лида эзь сода! Тевесь ульнесь пек стака. Сонензэ сась истямо мель, што эряви муемс тесэнь эрицят ды пшкадемс сыненст. Но оккупированной территориянь эрицятне ульнесть разнойть, киньс эшкеват. Сынст эйстэ понгонильть предательть. Мезеяк а теят эрявсь рисковамс. Лидань прядовсь ведезэ ды ярсамопелезэ. Кизэсь ульнесь пек пси, ведь костояк апак сода а муят. Муцясь симемань самось. Аламо шкань ютазь сыргась пиземе. Тейтеренть шачсь омезэ, ютавцазо симеманзо, но модась ульнесь пек коське, весе пиземе ведесь туиль моданть потс. Штобу ютавтомс симеманть Лида кармась нолсеме ведь байгинетнень чувтонь лопатнень лангсто. Колмо чинь вешнематнес сон лись вирень керявтс, косто нейсь цёра ломань. Ломанесь ледсь товзюро. Лида пшкадсь тензэ молдавской кельсэ, вешсь симемс. Атясь пшкадсь сонзо каршо рузокс. Андызе ды симдизе сонзо. Невтизе кона пелев эряви ютамс, штобу вастовомс партизантнэнь марто. Лида вешизе прянзо, штобу атясь кекшевлизе бу сонзо крандазонзо потс ды усковлизе васоло вирентень. Атясь мерсь те пек опасна, немецтне крандаз потмотнень вешнить ды если сонзэ мусызь то маштсызь весень, и сонзо, и атянть кудо раськензэ. Куроксто мерсь Лиданень туемс партизантнэнь вешнеме, а тарксемс шка. Васоло вирентень Лида пачкодсь колмо чинь ютазь. Чить сон кекшиль, а веть ютыль. Окойники кото чинь ютазь сон вастынзе партизантнэнь. Отрядось аштесь тевтеме, каладсь радиостанциясь, арасель радистка, арасть боеприпаст, взрывчатка. Лида ладизе связенть партизанской Штабонть марто, вешсь оружия, взрывчатка, медикамент, продовольствия, радиостанциянтень питания. Веть вирь чирес кирвайсть сигнальной толбандят. Самолётнэ ёртсть ценной груз. Партизанской отрядось таго кармась воевамо. Чокшне боецтнэ туильть заданиянь топавтомо: сезнильть сэдть. Нолдыльть откос алов ятонь живой сила, боеприпас ды оружия марто составт. Эфирс ливтясть Лидань позывноензэ, конатне ёвтасть партизанской отрядонть боевой тевдензэ. Заданиянть топавтоманть кис Вечканова Лидия Максимовна ульнесь казезь «Якстере Теште» орденсэ ды «Ине Отечественной войнань партизанонь» медальсэ. Фронтовой биографиязо прядови Чехословакиясо, косо сон вастсы Ине Изнямонь чинть. 
Чиндяйкина Татьяна Владимировна - н. сотрудник Мемориального музея. 

Категория: Статьи Мемориального музея | Добавил: tatianakost (20.07.2020)
Просмотров: 182 | Рейтинг: 0.0/0 |
Всего комментариев: 0
Добавлять комментарии могут только зарегистрированные пользователи.
[ Регистрация | Вход ]
Copyright MyCorp © 2022
Бесплатный хостинг uCoz