Мельс паросо аштят сень кувалма, што воинтнэ ютксо, Ине Отечественной войнань фронтнэсэ улнесть ламо Мордовиянь уроженецт. Течи минь карматано кортамо Великой Отечественной войнань участникенть ланга, конань эрямо кизэ уш прядовсь – те Александр Алексеевич Писачкин ды сонзэ войнань китнеде лецтнеманзо. Аволь весть войнань китне лангсо савкшнось тензэ вастневемс земляконзо марто и Темниковань, и Краснослободскоень, и Зубовань, и Атяшева районтнэнь эйстэ. Неть вастовоматнеде мельга седей ежось яла лембельгадыль. Зярдо уставась Ине войнась Александр Алексеевич тонавтнесь школасо. Ялганзо тусть фронтов, а соньсэнзэ яла эзть сае. Ламоксть сон сёрмалесь Кизиловской военкоматов заявленият, штобу саевлизь доброволецэкс. Ды учовсь те шкась, Александр Писачкин Камышловской пехотной училищань курсант. Тонавтнесть ниле ковт ды тёжа вейксэсядт ниленьгемень колмоце иестэ панжи ковсто сон ульнесь кучозь Россошь ошонть алов колоньгемень кавксоце дивизияв. Дивизиянь личной составось ульнесь пурназь весе национальностнень эйстэ. Истя Степной, а мейле Воронежской фронтнэнь составтнесэ сынь пачкодсть Сумы ошонть алов. Тесэ сынст икелев ульнесь путозь задача: кундавтомс противникенть войскатнень, а максомс тенст оборонанть виевгавтомс. Умарь ковонть кавксоце чистэ дизиянтень максозель приказ атаковамс противникенть позициянзо. Икелепеле соединениясь невтизе эсь самонзо немецень самолет-разведчик икеле, чить коллонатне ютасть вейке ёнов, веть- лия ёнов. Атакадонть икеле ульнесь теезь комсь минутань кувалмсо артиллерийской подготовка. Мейле сыргась немецтнень позициятнень лангс минек пехотась. Истяко яла немецтнень ёнов васняяк каявилть танктне, окоптнень лангс ливтильть штурмовиктне, леднильть минек легендарной «Катюшатне». Тесэ и пехотантень ульнесь седе весёла. Ней же ульнесь овсе лиякс. Разведкавтомо, мезевтемеяк, минек солдатнэнень ды офицертнэнень эрявсь штурмовамс ятонть укреплениянзо, молемс атакас свинецэнь пулятнень пизементь пачк. Те чистэнть дивизиясь кандсь покш ёмавкст, стройстэ листь кавто тёжат кавтосядт вейксэньгемень сисемь ломанть, те колоньгемень кавто личной составонь процент. Неть ёмавкснэнь кис дивизиянь командирэсь Скляров полковникесь ульнесь каязь должностестэнзэ. Меельце дивизиянь командирэкс ульнесь путозь Есипов подполковникесь. Сонзо ветямонзо ало дивизиясь топавтынзе путозь задачатнень. Противникесь ульнесь аволь ансяк кирдезь, но и лавшолгавтозь. Те максь минек танковой соединениятненень фронтонь керш ёно флангатнесэ, Ахтырка ало, кастомс изнявкстнэнь, ды сядо кодгемень сисемеце, кавтосядт колоньгемень кавтоце ды колмосядт ниленгеменце дивизиятне совасть Сумы ошонтень леднемавтомо. Сыненст максозель лем «Сумских». Колоньгемень кавксоце стрелковой дивизиясь, конась ошонть кис тюрематнесэ ёмавтсь ламо личной состав, калмась дивизиянь командирэнть - Есиповонь ды артиллериянь начальникенть Гричуха-полковникенть. Сынст калмост аштить Сумы ошонть куншкасо. Неть тюрематнесэ героекс чавовсть минек земляконок-автоматчикнень взводонь командирэсь Александр Иванович Перлов, Ширингуш ало Курташки велень эрицясь. Сон калмазь Вишка Чернетчина веленть малас. Сумы веленть ало ранязельть Ковылкинской райононь Парапина велень - Иван Сергеевич Исмалкин старшей лейтенантось ды Зубовополянской райононь Кочетовка велень Сафа Мамин младшей лейтенантось.
Ули войнань шкане истямо коське вал - ёмавкст! Сонензэ максы характеристика числань невтемась - статистикась. Но эрьва цифрантень совавтови трагедия аволь ансяк нетнень коряс, кие маштовсь или калечавсь, но и роднятнень, малавикстнэнь, ялгатнень однополчантнэнь коряс, кинь шказо ещё эзь са. Войнасонть солдатнэ икеле чавовсть ды майсесть яжазь-тапазь, калечазь ломантне. Минань осколкасо сезевсь командирэнть пильгезэ, санитартнэ теить перевязка, остатка солдатнэ топавтыть заданиянть кавтосядт кемнилееце артиллерийской полконть котоце гаубичной батареянть топопривязканть. Бокасост ютавты наступления ниленьгемень кавксоце стрелковой полкось. Сынь сразу совиксэльть Васильевка велентень. Но немецтне ветясть кеме тол, лепштясть атакас молицятнень модантень. Вадря хоть те таркасонть тикшесь кайсь ломатнень сэрьсэ. Те шождалгавтсь наступлениянь задачанть. Колоньгемень вете ломаньстэ отрядось снартсь ютамс противникенть флангонтень. Веленть эйстэ кавто километрань экшстэ местностесь ульнесь пек чеядавксов. Тесэ ютасть торфонь разработкат. Боецтнэ пачк ютасть чеядавксонть берёктнева, чийнезь – чийнесть вейке торфонь куцясто лия куцяс. Тестэ сынст и неинзе противникесь, кармась леднеме минасо. Минатне прыльть чеядавксонь трясинантень ды а сезевильть. Тесэ уш и минек орудиятне кармасть леднеме. Пока немецтне кекшнесть окопка, минек разведчиктнень группась ертозь-ертовсь икелев ды ульнесь противникенть маласо. Ходс тусть гранататне. Боецтнэ кирнявтнесть траншеятнень трокс, каявозь-кайсевсть кудотнень ёнов, конатнень эйстэ тандадозь лиснесть немецтне. Окопнестэ полконь разведкань начальникенть старшей лейтенантонть Лебединцевень кедь алов понгсь немецень матёрой фельдфебель, конась ульнесь ранязь, но теке путсь разведчикенть каршо покш вий. Сонзо марто ульнесть ценной сведеният, документ, картат, конатнень лангсо рисовазель противникенть оборонась. Немецтне кадызь Васильевканть, тестэ разведчиктне мусть грузовик, конань кузовасонзо ульнесть самокат, а сынст ало кекшезельть кото миномёт ды боеприпас марто ящикть-цела миномётонь батарея. Кирпицень особняксонть, стольтнень лангсо бизнэсть ламо телефонт. Эрьва ёндо сынст эйс ютасть кабелень линият. Тесэ ульнесь немецень штабось, конань противникесь эряскалезь кадызе. Теке шкастонть весе содасть, што противникесь аламо шкань ютазь поладсы тюреманть. Разведчикень отрядось ульнесь аволь покш. Эрявсь кемекставомс тезэнь ды учомс атака. Курок невтизь пряст мотоциклатне. Сынст эйсэ озадо аштиця немецтне кувака очередьсэ ветясть пулемётонь тол. Но ятонть вастомас ульнесь весе анокстазь. Трофейной пулемётнэнь экшес мадсть полконь разведкань начальникесь ды разведчикень взводонь командирэсь. Отрядось учось команда ды ансяк пачкодсть мотоциклистнэ расчетной тешкстэнтень, зэрькадсь вейсэнь залп. Немецтне ульнесть тапазь, трофейтне поладовсть кавто мотоцикласо ды колмо пулемётсо. Те тюремасонть ульнесть маштозь кемень противникень солдат, а минексетне ёмавтсть вейке. Разведчиктне кеняркснесть трофейтнес: тесэ ульнесть ужинамс продуктат, сёрмань сёрмадомс конёв, част, зажигалкат. Сех покш кенярдома кандсть батарейка марто фонариктне. Те весе солдатонь эрямочинь курмотне-кармотне, конатне немецтненень ульнесть привычнойкс, а минек солдатнэнень сынь кармасть пек питнейкс, кой-конатне сынст нейсть васенцекс. Штобу курямс самокрутканть эрявсь добовамс тол огнива марто, а противникенть ульнесть зажигалкат. Меельце чистэнть Лебединцев тейсь доклад полконь командирэнтень Васильевкань кис тюремадонть. Васильевканть саеманзо кис разведчиктненень максозель кавто фляжкат спирт ды кавто банкат американской тушёнка. Те чистэнть сынь праздновасть изнямо. Эрьтевемась сыргась седее тов. Дивизиясь сеетьстэ полавтнесь дислокациянзо. Днепра леенть форсированиядо мельга дивизиянть кизэ ютась Горяч ошонть эйстэ Лубнанть пачк Григоровкантень. Ютась ламо шка сеть тюрематнестэ, Писачкин Александр Алексеевич панжокшнизе колоньгемень кавксоце стрелковой дивизиянть журналонть. Ловнось истямо сёрмадовкс: «Лисинек Днепрань чилисема ёнксонь берёконь рубежентень-теинек боевой порядок. Остун эрьке, Бучан веле. Ветятанок разведка противникенть коряс. Анокстатано уема пельть форсированиянть кувалма. Противникенть авияциязо ведьгеменьстэ саезь сизьгемень самолетсо, кемгавтово часто саезь комсь часос, бомбасть переправанть Григоровкадо чилисема ёндо ды седе маласо районтнэнь эзга. Ёвтазь а ёвтави ды сёрмадозь а сёрмадови кодамо ульнесь боевой обстановкась. Фашистской стервятниктне ройсэ ливтнесть Днепрань переправанть ды минек войскатнень вельска. Апак наказа сынь видсть кулома эрьтевемань рядтнэсэ. Но леентень совильть и совильть од подразделеният, сынь наянсто снартнесть уемс омбо берёков, конань чиресэ сынст учость казямодояк-казямо цидярдомат. Эрьва коштонь атакадонть мельга солдатнэ машлетесть минек авиатортнэнь кувалма, конатне арасельть Днепра вельксэ менельсэнть. Косто сыненст ульнесь содамс, што омбоце Армиянь истребительтнень арасель заправамс горючеест, секс сынь и эзть ливтя лездамо минек ушмотненень.
Чилесема марто колоньгемень кавтоце дивизиянть частне анокстасть уемапельть. Пурнасть венчт, тейсть плот. Тевс мольсть каладозь строениянь чочкштне, горючейде мельга чаво боцькатне, чувтне, лазтнэ, жердятне, пикстнэ, уськетне-весе мезе ульнесь кедь ало. Днепрась –те пек виев нардев чудеведь, конань келезэ кавксосядт метрат, ды кеменьстэ саезь кемгавтово метрат домкачизэ. Ламо воинтнэнь талновтсь те переправась. Ведь мода лангсо солдатось седе кеместэ ашти. Сех пек талность сеть солдатнэ, конатне а маштыльть уеме. Истятнэде ульнесть аволь аламо. Но ульнесь максозь приказ, а мирэнть лангсо куломаськак седе мазый. Минек ушмотненень эрявсь кемекставомс Букринской плацдарманть лангс, Киев ошонть алов. Штурмань весь ульнесь пек лембе. Леенть велькссэ аштесь кеме сув. Те ульнесь вадря таланонь тешкс. Ятонь берёконть эйсэ талнозь курвазтлесть ды маднесть ракетатнень толост. Венберть вейке часто уеме сыргасть комсь вейксэце полконть кавто ротанзо. Сыненст эрявсь пачкодемс Григоровка веленть обедёнксов, а ниленьгемень кавксоце полконь ротантень эрявсь вийсэ совавмс пандолазонть пачк пелеве ёндо велепентень. Седе икеле ятонь берёконтень уезь тусть ниленьгемень кавксоце полконь взводонь разведкась, конань командирэсь ульнесь Саранской пехотной училищань выпускник, Зайцев лейтенантось.
Весе учость. Марявсь шкась теке овсе лоткась молемадо. А каня вергедсь сигнальной ракетась, сергедсть команда: «Икелев!» Пушка ды батареец марто плотнэ, разведчик, управленец, связист марто венчне, сеске ёмасть сувонть потмов. Противникесь ветясь леенть ланга азарць пириця тол. А вить береконть лангсо ютасть уш тюремат. Перть пельга юргось-вешкезь марявсть снарядтнэнь сезневематне. Солдатнэ вейкень-омбоцень полавтнезь путсть мель миледемс весе вийсэ. Венчесь сувонть сезезь ливтязь – ливтясь ятонь берёконтень. Васенцекс пачкодсть артиллеристнэ. Сынь кедь лангсо кевердсть орудиятнень, ды теке басом виде наводкасо кармасть леднеме пушкатне ятонть ланга. Пехотась тулкадизе противникенть тинге пире удалов. Олякстомозь плацдармантень недясть лия подразделениятне. Виевгадсь эртевемань эцевксэсь. Берёконть лангс кевердсть мельга мельцек орудиятнень. Берёк лангонтень кепедемась ульнесь ацазь маштозь солдатнэсэ, кувсезь - кувсесть ранязетне. Кой кона пушкатне а кирдевильть ды кеверильть ведентень, сестэ лездамо чиильть весе кить ульнесть маласо, штобу седе эрязасто таргамс орудиянть ведестэнть. Арасель седе важной задача, кода кемекставтомс штурмовой группанть толонь виенть. Вейке омбоце мельга ютасть атакатне ды контратакатне. Устававсть рукопашной тюрематне. Штыковой атакась войнанть молемасонть – сех верев ды сех азарць. Ломантне теевить теке зверть, каявить вейке омбоцень лангс кежеде чиремезь чамаст марто. Сельтне сэвезь-сэвить ятонть ды а неить перть-пельга киньгак. Чикордозь, рунгтнес совить штыктне, кайсевить прятнень лангс прикладтнэ, кивчкаетить видестэ леднематне. Ды ятось а цидярды. Немецтне туить чиезь, кадныть чавозетнень ды ранязетнень. Ламотне понгить полонс. Те изнямось Днепрань вить берёксонть – васенце. Сон ульнесь пек верев ды пек стака. Неть воинтнэ конатне аштевсть, невтсть алкуксонь героизма. Тесэ, Букринской плацдармасонть эрьванть таланозо ульнесь седе пек илыкев ды седе пек экстремальной. Вейке кудосонть Степан Колбасенко, младшей лейтенантось нейсь азарць картина: горясо чавозь авась кирдсь кедензэ лангсо потиэйкакш, конань осколкасо сезевсь вить кеднезэ. Степан чарькодсь, што питней эрьва минутась. Сон бойкасто сюлмсизе кеденть, авасть ды эйдесть марто пачкодсь адонь тюремань толонть пачк берёк чиресэ венчентень, ды уизе бойсэ лакиця Днепра леенть, пачтинзе сынст госпиталев. Тёжа вейксэсядт кавксоньгемень сисемеце иестэ колоньгемень кавксоце стрелковой дивизиянь однополчантнэ содавтызь тюремань таркатнень. Григоровка велесэнть Степан нейсь эрявт ава, конась аштесь цёранзо марто. Сынстэст сон содынзе войнань толонть потсто идезь аванть эйдензэ марто. Истямо ульнесь кенярксов вастовома.
Букринской плацдарманть стратегической значениянть содылизь и немецтне и минекцетне. Фашистской командованиясь тейсь весе, штобу ёртомс минек ушмотнень Днепрань ведентень ды олякстомтомс Днепра леенть вить берёконть. И чить и веть сынь кайсевсть атакас, сеедестэ мик психическойс, ютасть иредезь, надеясть истя панемс минек ушмотнень Днепрантень. Самолётнэ ливтнесть ды бомбасть апак лотксе. Ансяк таштам ковонь комсь ветеце чистэ сынь тейсть сядо ведьгемень ливтямот. Взрывтнэнь зэрнемадо воинтнэ ёмавтылизь шкань марямонть, качамонть пачк эзть нее вейке-омбоценть. Истят тюрематне ютасть ковдо ламо шкань ютко. Таштам ковонть комсь котоце чистэ немецтнень тылс ульнесь ёртозь десант-ниле тёжат ветесядт ломань. Сынст эйстэ лиядокшность живойкс ансяк кавтосядт сизьгемень ломань.
Таштам ковонь комсь вейксэце чинь валскесь устававсь немецтнень ёндо пекень покш артиллерийской ды миномётной толсо. Мейле танктне ды самоходкатне марто сыргась наступленияс пехотась. Немецтне таго саизь стратегической высотанть ды апак лотка кармасть валгомо алов. Артиллерийской полконь наводчикесь Калугин нолдынзе сынст седе малав ды прямой наводкасо эсь пушкасонзо кармась лангозост леднеме. Цельс понгомадонть ульнесть маштозь ламо гитлеровецт, Калугин кандызе эсь пушкань толонть лия немецень цель лангс ды тапась колмо пулемётонь ды кавто миномётонь точкат. Ятонть атакась потомсь. Зярдо противникень эртевемась лондадсь минек позициятне лангс давол ладсо сынст ёндо каявсь кеме тол. Маштовсь орудиянь командирэсь, ранязель заряжающейсь. Но Калугин - рядовоесь эзизе кадо эсь позициянзо. Сонзо пушказо истя жо ветясь толонть. Те тюремасонть тапазельть кавто противникень танкт ды ламо ятонь солдат, лепштязель миномётной батарея.
Александр Писачкинэнь фронтонь ялгазо, землякозо Алексей Гуляев ещё вейке разведчик Маслов марто састь Иванков веленть малас минек передовой позициятнес. Сынь састь заданиянь топавтомо: теемс разведка противникень толонть кувалма ниленьгемень кавксоце полконть участканзо маласо. Мельцек-мельцек чувто прясо ветясть наблюдения. Валске марто даннойтнень кучизь штабов. Цела вень аудомадо мельга разведчиктне мадсть оймсеме. Гуляев аволь домка траншеяс, Маслов окопонь бруствер лангс. Чилисеманть марто минек орудиятне кармасть ветямо тол противникенть позиция ланга. Немецтне кармасть леднеме каршо. Снарядост мадсть передовой позициятне лангс. Вейке снарядонь виде понговомадо мейле Маслов разведчикенть эйстэ лиядсь ансяк бинокля. Гуляевень эйстэ ансяк раужо штатол, сон весе палсь. Гуляевтнень кудораськесь эрясь Краснослободск ошсонть. Ине Отечественной войнас ульнесть саезь сисемест- кото ялакст ды вейке сазор. Сех покшось Иван-тёжа вейксэсядт нилеце иень, Василий- тёжа вейксэсядт сисемеце иень, Елизавета-тёжа вейксэсядт кемнилееце иень, Николай-тёжа вейксэсядт кемсисемеце иень, Георгий-тёжа вейксэсядт кемвейксэеце иень, Алексей-тёжа вейксэсядт комсь нилееце иень ды Владимир-тёжа вейксэсядт комсь ветеце иень. Алексей ды Владимир чавовсть ве чистэ-ожо ковонь кеветееце чистэ тёжа вейксэсядт ниленьгемень колмоце иестэ. Кавонест чавовсть Днепра леенть форсировамсто. Аволь ламо шкань ютазь войнадо мейльга туи эрямостонть Иван. Войнань китне сонзэ пачтясызь Берлин ошонтень. Весть тюрематнень ютксто сонзо кармась сэредеме пеезэ, савсь молемс тензэ госпиталев. Тосо стоматолог врачонть эйстэ сон содызе эсь сазоронзо-Елизаветань. Кеняркстонть ёмась ков - бути сэредьксэсь, кундатоць Иванонь мештьсэнзэ лексемазо. Вот истямо вастовома анокстакшнось тенст уцяскась.
Аштем ковонь комсь котоце чистэ минек солдатнэ потавтсть кавксо противникень атакат, а колоньгеменце чистэнть - кото пехотань атакат конатне ульнесть кемекстазь танксо ды самолётсо. Комсь вейксэце полконь батальонось цела кавто часонь ютко, аштем ковонь комсь вейксэце чистэ, кирдсь ниленьгемень танконь ды кавксоньгемень самолётонь штурмат. Иредезь пехотась ютась весе сэрьсэ, но минек батальонось кирдизе те натискенть ды ютась аламодо седе икелев. Ожо ковонь колмоце чистэ Григоровкань велепесь обед ёндо ульнесь пек леднезь противникенть артиллериясо. Ёжомарямось ульнесь а ёвтавикс, пек берянь. Те адонть эйстэ солдатнэ бажасть теевемс коткодавокс ды кекшемс моданть потс.
Букринской плацдарманть событиятне сёрмалезь-сёрмадовсть вейсэнь наступлениянь картинантень ды кармасть улеме поладовксокс покш сражениятнесэ, конатне прядовсть Корсунь-Шевченской котёлсонть, косо ульнесть пирязь ды тапазь кемень фашистской дивизият. Ды те весе ульнесь теезь овсе аволь шождасто.
Ковонть перть Днепра леенть берёкнень чиресэ оборонанть мельга, Киевской областень Долина веленть бокасо дивизиянь частне ютавтсть изнявксов эртевема ды пачкодсть Белая церковь ошонть малас. Якшамо ковонь кеменце чистэ маршевой коллонасо сынь ютасть лия районс-Звенигород ошонть малас. Ды окойники якшамо ковонь кемголвоце чистэ дивизиянь частне пачкодсть Черкасской областень Босовка велентень, тестэ сыця чинтень дивизиянтень ульнесь путозь задача - сыргамс эртевемас! Александр Писачкин цела ве ульнесь нилеце батареянть марто ки лангсо. Апак учо кармась кайсевеме касыця увт, маласо ды седееяк маласо. Валскень ашолгадовоманть менель чиренть кувалмсто марявсть танктнень урномат. Сынь кармасть неявомо, мельгаст ютась пехотась. Сеске кирвайсь тюремась. Зэрнесь модась. Минек солдатнэ тюрсть остатка патроност, остатка снарядост прядомс. Комсь танктне ульнесть тапазь. Но и минек дивизиянтькак ульнесть покш ёмавксонзо. Ятонть покш толонзо алга савсь минек частненень потамс. Писачкин чиезь совась штабонтень. Полконь комсоргось Гегечкори максь команда: «Машинас!». Весе бойкасто кирнявтсть трофейной легковушкантень. Сэденть леднить ятонь танктне. Легковушкась арды латконть пачк. Ды тесэ весе фатясть, што стувтызь полконь Знамянть. Мельга-мельцек чиезь сынь велявсть мекев. Каршозост ашо маскировочной формасо кеме шеренгасо ютасть автоматсо леднезь фашистнэ. Сынст видьс лиядокшность кодаткак кавтошкасядт метрат. Гегечкори ёртозь-ёртовсь кудонтень. Александр Алексеевич кирнявтсь канавас ды кармась леднеме. Комсоргось Гегечкори кевекс кеверсь кудостонть ды теке метьказ ёзнозь уйсь моданть ланга, лепштязь Знамянть марто, мейле чийсь ды пракшнось, чийсь ды пракшнось. Мельганзо чийсь знаменосецэсь, апак учо теке пупордясь ды прась ловонть лангс. Писачкин стрелакс ливтясь латконтень. Пулятнень свистямонть алга кеверезь-кеверсь кручостонть. Мельс эзь лиядо кода сон пачкодсь латконь омбо берёков. Ловонь паксянть трокс ливтязь – ливтясь Знамянть марто лишме лангсо всадникесь. Мельганзо леднезь ардсть кавто танкт. Весень часияс комсоргось те азарць тюремасонть лиядсь жив, сон идизе полконть честензэ ды полконь Знамянть. Писачкин сасызе эсензэ артиллерийской полконть. Пелевентень сынь пачкодсть Черкасской областень Маньковской райононь Кривец велентень, пек сиземадонть весе теке кулозь матедевсть велень эрицятнень кудотнес. Валскень зоряванть кудосонть каятоць пижнема: « Мезе удотадо велесэнть немецть?!» Сядошка метрань таркашкань кувалмсо велень сёлтонть удало аштесть немецтнень танктне ды леднесть минекцетнень ёнов. Колмошка километрань ютко чийсь колоннась ловонть ланга. Тесэ ульнесть и ялга ютыцят. И лишме лангсо ардыцят, и раненноде пешксе машинат. Колоннась валгсь Антоновка велентень. Апак учо вейке кудонть удалдо лись немецень танк ды кармась леднеме. Мезе тесэ устававсь? Свистязь-свистясть пулятне, керязь-керясть ломантнесэ. Ажиянь синтрезь сезевсть лишметне. Писачкин кекшсь модарькань латкс, косо уш ульцть лия солдатнэ. Марявсь лия танктнень урномат. Солдатнэнь карабинсэст арасель ве патронгак, ве гранатаяк. Немецтне чавность весень, танктне гусеницасост лепштясть ранязь солдатнэсэ. Вересь чудсь леекс. Весе, кить ульнесть кекшезь модамарень латксонть, тусть чиезь эмеж пиретне удалга, штобу а неемс кодат зверстват теить немецтне минек солдатнэ марто. Веленть пес сынь весе кекшсть. Писачкин угодявсь орудиянь командирэнть Михаил Бондаренко марто. Кавонест чокшне ланга ютыксэльть фронтонь линиянть трокс, но эзть ютаво. Кудость удалдо, косо сынь ульнесть, марясть немецтнень кортамот. Ков кекшемс? Кудо пряс? А кенерят! Каськас? Сон арась, масторксось модань! Пецька пряс, каштом лангов? Тов и эцесть, вельтясть нула потс! Пелагея Бондаренко – кудонь азоравась озавтызе пецька чирентень вете иесэ тейтерьканзо, Нинань. Кемнилее иесэ Марийка лиядсь столь экшес, а азоравась прась удома таркантень ды кармась вайкснеме. Совасть ниле немецень солдат. Вейкесь снартсь ваномс пецьканть, Нина кармась апаро вайгельть рангомо, Пелагея седеяк пек кармась вайкснеме, солдатось лотказевсь ды кевкстизе Марийкань: «Матка кранк?», Пелагея яла вайксне, сон содась, што минек солдатнэнь кекшемань кис немецтне леднесызь весе семиянть ды пултасызь кудонть. Фашистнэ листь кудостонть. Те шкастонть Писачкин Бондаренко марто кекштсть кудо прянтень. Аламо шкань ютазь немецтне велявтсть мекев ды стясть Пелагеянь кудос аштема таркас. Сад пирентень тусть дальнебойной орудият. Стявтсть часовойть. Шкань – шкань Пелагея ёртыль тенст кудо прянтень модамарень сюкорот. Берянь ульнесь веденть коряс. Ансяк давол ковонь комсеце чистэ немецтне тусть. Писачкин командирэнзэ марто валгсть кудо прястонть, пильгетне а кирдить, прясь чары. Ловось уш солась, теевсь рудаз. Кудонь азоравась пек берякадсь, лиядсь пель Пелагея, а содави. Максь мартост нярыя модамарть, кши кочом ды чурька прят. Истя сынь явсть. Простямодо мельга тусть пиретне удалга ды листь лей берёк чирес. Пульзядо ютасть эенть ланга. Кавто суткас рудазганть сынь ютасть ансяк кото километрат. Мейле весе виест маштсть. Кекшсть олгонь штемес. Ярсасть кельмезь якстерькадо, конанть пурнэлизь паксянть лангсто лиядкс куцятнестэ. Давол ковонь комсь кавксовоце чистэ, мольсть якстерька мельга ды сынь мусть од эрямо тарка, конань эйс кекшнесь евреесь Дайман Давид Маркович. Сон вешсь тензэ лездамс, секс што пек сэредсь. Писачкин Бондаренко марто решизь молемс Берёзовка велентень ярсамопель ды ведь мельга, мерсть Давиднэнь кирдемс яманть пекстазь, секс што эрьва чине олго мельга штементень сакшныльть немецень солдатнэ. Чить сынь кекшсть велепень кудонь подвалонтень. Велесь пешксель немецтнеде. Чокшне ланга пурнасть ярсамопель, пицькат, ведь ды тусть мекев паксянтень, штобу лездамс Давид Марковичтнень, а мейле ютамс фронтонь линиянть трокс. Землянкась ульнесь калавтозь, Дайман арасель. Эрявсь тестэ туемс.
Валскень зоряванть сынь валгсть балкантень, вешнесть кекшема тарка. Апак учо латконть чирес листь фашистэнь солдат. Истя эйзюро ковонь васенце чистэ сынь понгсть полонс, Уманьской концлагерьс. Эйзюро ковонь ветеце чистэ Александр Алексеевичень, Бондаренконь ды Берёзовка велень эрицятнень ветизь лагерентень. Стявтызь стройс, ловизь, панизь кильдемень кардос, кайсевтизь весе оршамопелест, пильгень карцемаст ды часто ламо кирдсть эйсэст кевень масторксонть лангсо. Мейле панизь баняв, косо кармасть сынст валномо шлангсо кельме ведьсэ. Ярсамс макснесть чизэнзэ весть, кемень ломаньс вейке буханка кши, апак шля якстерькасто пидезь баланда ды чиньжарамо лепштявкст. Эйзюро ковонь сисемеце чистэ марявсь фронтонть малас самозо. Лагеренть явнызь колоннава кемень тёжат эрьвасонть, пиризь охрана марто овчаркасо ды кармасть эйсэст панеме кельме тундонь рудазонть эзга. Ламот полонс саезетнеде ульнесть кепе, эль-эль кирдевсть пильге лангсо, молеманть перть кияк эйсэст эзь андо. Эрьва веленть ютамсто велень эрицятне ёртнесть тенст модамарть, шужонь ды кукурузань кши. Вачо ломантне каявильть ярсамопелентень, тюрезевильть, ламоксть мик маштовильть кши кочомонь кисэ. Тень лангс апак вано ломантне муильть вий штобу оргодемс, менемс полонстонть. Сеедестэ тень кис пандылизь эрямост. Немецтне эзть жаля киньгак а од ломанть, а сыре ломанть. Писачкин эзь эряскале, учось истямо шка штобу менемс ды сон те шкась сась. Кадымской райононь Одесской областень Крутые велесь. Велень эрицятне вастызь полонс саезетнень колоннанть, кармасть ёртнеме ярцамопель, теевсь идем валямо. Писачкин колоннанть пулосо. Конвоирэсь велявтсь, корты тетерь ава марто, те шкастонть Александр Алексеевич кирнявтсь латкс ды уезь уись сад пирес. Лепштязь - лепштявсь модантень. Колоннась тусь седее тов. И вот сон – олячись! А кемеви! Седеесь чави. Кепе лов ланга ютась сон кемень километрат чилисема ёнов. Лоткась ютамодо пильгесь. Мольсь комадо. Александровкасо сонзэ пурнызе велень эрицясь Емельян Чёрный. Сон кармась сэредеме тевелявонь таргоземасо. Александровка велентень састь немецть. Алексксандр Алексеевичнень савсь сэредезь туемс Крутые велентень ды кекшемс тозонь минек войскатнень самс. Писачкинэнь оргодемась удалась эйзюро ковонь кемнилееце чистэ тёжа вейксэсядт ниленьгемень нилеце иестэ. А вете чинь ютазь сон вастовсь минек войскатнень марто Крутые велесэ. Температура марто, амельдязь мольсь «Смершень» офицерэнтень прянь невтеме. Арсесь, што сонзэ чарькодьсызь ды тензэ лездыть. Но офицерэсь кармась пек пижнеме, сонензэ эрьва полонс понгозь солдатонть эйстэ неявсь шпион ды предатель. Писачкинэнь кучизь военкоматов Челнык велес, конась улнесь кодгемень километрань экшсэ Александровканть эйстэ. Мейле Украинской фронтонь колмосядт кеменце запасной полконь составсо сон кармась анокстамо од тюрематнес. Но сась распоряжения, солдатнэнень конатнень уцяскаст ульнесь Писачкинэнь кондямо, ютамс государственной проверка. Те ульнесь а ёвтавикс покордамонь керявкс (пелькс) Александр Алексеевичень эрямосонть. Таштам ковонь колоньгеменце чистэ тёжа вейксэсядт ниленьгемень нилеце иестэ особой отделэнь майорось тердизе Писачкинэнь эстензэ ды яволявтсь: «Проверкась прядовсь. Тынь ульдядо честной воинэкс!» Максть тензэ оружия, взвод ды кучизь полонс саезь немецтнень, «масторонь предательтнень», «народонь душмантнэнь» ванстомо. Ды таго колючка марто уське, конань лангс апак соракалезь а вановат. Стака, лепштиця бутрат лиядсть весе эрямо кинть прядомс. Истямо ульнесь Писачкин Александр Алексеевичень уцясказо ды ламо лия солдатнэнь уцяскаст, кить понгонесть немецтненень полонс.
Чиндяйкина Т.В.
|
