Эрьва келесь эсь койсэнзэ Мазый, содавикс, питней. Илядо стувто эйсэнзэ, Путодо тензэ седей. С. Люлякина
Эрзянь сказительницась Серафима Марковна Люлякина чачсь 1922 иень июлень 29-це чистэнть Подбельск станциясо, а вана весе эсь пингензэ, мерть, Ягоднойсэ печтизе. Тесэ сон важодсь «Садовод» совхозсо, тесэ тринзе-кастынзе сисем эйкакшонзо, сермадынзе васенце моронзо ды евтамонзо. Люлякинань чачома Рав томбальксэсь – эрзянь фольклоронть куншка курозо. Те ёнксось казсь минек литературантень истят содавикс лемть, кода Василий Радаев, Артур Моро, Петр Кириллов, Алексей Лукьянов, Дмитрий Морской, Артем Веселый, Михаил Втулкин, Числав Журавлев ды лият… Анисия Ефимовна сырькаезэ, кона эрясь мартост сядо вете иеть ды конань моронзо содылизь Самаранть келес, тонавтсь нуцьканзо морамо ды моронь складямо. Серафима Марковна уш вишка пингстэ кармась моронь лацеме ды эрзянь келенть мазычинзэ марямо. Сонсь С. Марковна евтнесь истя: «Бабам муницян кондямоль. Орожияль, лиякс ёвтамс. Ноготт-бобкат кайсекшныль, тикшень корёнсто лакавтозь ведьсэ лецякшнось. Ломантне сакшныльть тензэ апак лотксе. Вирев надобия тикшень пурнамо ламоксть сайнекшнимем моньгак. Та-кода сыргинек мартонзо васоло вирев, кона эйстэнек кеменьшка вайгельбеть, молемстэ, а стувтса, ушодсь эйсэнь тонавтомо: «Морамсто, левкскем, вайгелеть пек иляк тарксе. Пижнезь-рангозь, морось ойместэть а чамдови. Минек велень буканть оно кодамо крьгапарезэ – сезнезь сезни эйсэнзэ ды лезэсь цеков нерьшка. Цековокс, левкскем, морак, сонзэ чоледемась седейть калавтни…» Серафима Марковна мирдензэ марто трясть-кастасть вете тейтерть ды вейке цера, сисемецесь - Наташа - ульнесь саезь семияс трямс-кастамс вишка пингстэ. Нилетне - Света, Тамара, Зина ды Лена – эрясть Самарасо, Галя - Тюменьской областьсэ. Ламоксть сынь сакшность Саранскоевгак. Сынь, аваст ладсо, панжадо седейть, а маштыть манчеме. Мелест видьстэ евтасызь, чирь - ёжов арсемавтомо. Нама, теньс тонавтынзе аваст. Ломань марто Серафима Марковна сонськак кортниль чевтестэ, валонзо ульнесть истят, кодат марят ансяк фольклорсто: «тиринем», «меште пенчкем», «какшом», «ялакскем», «седейбельксэм»… Ней уш истя а пшкалить. Эрзянь сермадыйтнененеь яла кортась: сермадовксозонк седе сеетьстэ путнеде кезэрень эрзянь валт, лемдядо эсенек лемсэ. Вана мекс сказительницанть произведениясто а вастат рузонь валвелявкст, вана мекс сон сермадськак лембестэ-шождасто – эрзянь келенть пек парсте содылизе. Серафима Люлякинань моронзо вечкилизь Самара ёнкссо, пек вечкилизь. Свал учость эйсэнзэ Саранскойстэ самсто, косо сон эринзе меельце кемень иензэ. Якась чачома ёнксонь велетнева концерт марто, ды эрицятне веле пев лиснесть каршо вастоманзо. Концерттэ мейле ильтястькак истя жо. Кевкстеманть лангс, кода сермадат моротнень, корты: «Монськак а содан. Прязон валтнэ ды гайтне сынсь пракшныть, кода-бути апак учо». Марковна истямо седеймарицяль, кодат ней уш седе чуросто вастат. Покордамонь валт сон а содыль, весенень пшкадиль ансяк ойме валсо. Уцясказо стакадо-стакаль, нужат-ризкст педе-педев некшнесь. Од тейтернель, зярдо ушодовсь Великой Отечественной войнась. Солдатокс нама, эзизь сае, а ванна Сталинград ало траншеят чувнось. Ломонь ды коймень кепсемадонть карязонзо куломазонзо чулксететсть. Кодат вачочить ды майсемат тосо кирдсть. Эрясть модань кувака кудосо. Землянкань кондямоль сон. Масторов каязь кельме лаз лангсо удсесть. Мейле олгт косто бути ускокшность. Стявтнильть эйсэст ранаяк – латконть эрявсь чувомс кода седе эрестэ – немецтне уш Сталинградсольть, снартнесть Саратовонть ды Самаранть пачк ютамо. Паро, минек содатнэ муизь инегуйтнень пест, чувозь траншеятнеяк эзть эряво… Тельня тосо Серафима Марковна пек кельмекшнесь ды пельсь кулозь ускизь кудов крандазсо - пильгензэяк эзть яка. Седе тов аламонь-аламонь стясь ды виензась. Мирдень экшсэяк Марковнань часиязо а покшоль. Пек аксуноль мирдесь. Толя церазонзо мартояк зыян лиссь. Тусь важодеме Казахстанонь целинав, комбайнасо сюронь пивсэмстэ паксясь кирвайсь… Валгсь толонть мадстеме ды сонськак палсь. А стяко Марковнань зярыя лайшемат алтазь вейкине церанстэнь. Лайшематнень эйстэ сермадозь малав кокш тетрадь. Серафима Марковна лайшесь аванзо, Сталинэнь, Я. М. Пинясовонь, В.К. Радаевень, И.М. Девинэнь ды лия мокшэрзянь писательтнень, косо евтневи сынст пингест – эрямост. Ней те рукопистне ванстовить Полежаев музеень архивсэ. «Лайшема авадон» «Ушка мольтян ваксозот, Аратанок малазот – Корьминецькем авинем, Чивалдынем - тиринем. Минек трямсто-якамсто, Кото тякань кастомсто Эзить сода оймсема, Эзем пенес озамо. Яла, авакай, важодить Котонь пекеть тон пештить, Котонь лангот тон оршить. ………………………………. Седей маринем-авинем, Чивалдынем-тиринем, Моря сельведь тон правтыть, Пондо сталмо тон кандыть. Минек трямсто-кастомсто Кирви буря кепететсь, Толонь вихорь сыргакшнось. Саизь тиринь тетянок, Сиазь кудонь прявоток Ялгавтомо тон кадовить Тетявтомо минек трить. С. Люлякина. Станция Подбельская. 1965 г.
Мордовиясо Серафима Марковна эрясь малав кемень иеть. Те шканть перть нолдась кото книгат. Теде башка, стихензэ, сказонзо-ёвтамонзо ды пьесанзо лиснесть газетасо ды журналсо. Моронзо сеедьстэ гайгсть радионь пачк.. Телевидениясо невтнесть эйстэнзэ фильмат. Школасо, вузсо сонзэ произведениятнень коряс ютавтнесть семинарт. Лиякс меремс, С.М. Люлякина эрзянь культурасонть теевсь истямо тештекс, конань эйстэ свал срадсь валдо. Сон казнесь те валдонть весенень. Поэтэссась-сказительницась сцена лангсояк эромосояк ульнесь вейке: пря эзь невтне, эзь покшолгавтне. Покшкавтнеме эзь машто, прянзо невтсь истямокс, кодамокс улнеськак: велень эрзя-авакс, конанень мезе ансяк эзь савкшно печтямс. Текень кувалма оймезэ свал аноколь лездамо. Сказительницась ламо сцена лангсо макснесь концерт: Мордовиядо ды Самарадо башка ульнесь Московсо, Эстониясо, Чехословакиясо, Финляндиясо. С.М. Люлякина эрзянь поэзияс сась 1982-це иестэ, зярдо тиринь кельсэ лиссь «Моронь гайть» стихень васенце книгазо. Те сборникенть мельга чачсь-нолдазель омбоцесь, мейле оште ниле книгат: «Тонеть, Мордовия, моран», «Минек оянок», «Кодамо вараканть видечизэ», «Евкст, стихть, баснят». Эрьванть марто келейгадсь поэтэссанть мастерксчизээяк. Тиринь валтнэ эрьге керьксэкс кодавсть-полалевсть моронь каштазонзо. Серафима Марковнань творчестванзо кепедемасо покш таликась Иван Корнилович Инжеватов – ученоенть, кона ульнесь сказительницанть туртов аволь ансяк омбоце мирдекс (васенцесь умок кулось) - секретарекс, витницякс, издательствава-кува чийнемаськак аштесь сонзэ лангсо. И.К. Инжеватов анокстынзе печатьс сеть произведениятнень, конатнень Люлякина сермадынзе меельце кемень иетнень перть. Сядот стихть, морот, пьесат, балладат… А зяро кадовсть книгасо апак нолда! Пурнынзе сеть статьятнень ды ледстнематнень, конатнень алтызь Серафима Марковнанень эрзянь ученойтне ды журналистнэ. Кодамо покш робота! Минек издательствасо сказительницадонть ули нолдазь башка книга, кона кадови С. Люлякинадо астувтовиця ледстнемакс. Сказительницась ламо иес одкстомтызе Иван Корниловичень уцясканзо. Сынь эрясть вейсэ, лездасть ялга-ялганень, валдомгавтсть вейке-вейкень сермадома тевест, ды кепедсть од мелест-арсемаст. С. Люлякинанень литературасо ды культурасо важодеманзо кис макссть Мордовиянь культурань Заслуженной работникень лем, МАССР-нь Государственной лауреатонь премия ды Мордовиянь комсомолонь премия. Серафима Марковна Люлякина кулось 1993 иестэ январень 17-це чистэ. Калмазь Ягодное велесэ. Г.П. Евстигнеева – сотрудница музея А.Полежаева – филиал ММ ВиТП 1941-1945гг. | 
