 Павел Георгиевич Гуреев чачсь тёжа вейксэсядт кемгавтовоце иестэ Курнино велес неень шкань Ковылкинской районс. Колоньгемень нилеце иестэ саезь служась Якстере Армиясо. Советско-финляндской войнань участник. Ине Отечественной войнасо васенце читнесэ саезь. Ведьгемень омбоце дивизиянь кавтосядт ветеце стрелковой полконь васенце батальононь командирэсь старшей лейтенантось Гуреев занясь оборона эсь батальононзо марто Западной Лицань берёкчирева, чилисема ёндо. Чивалгома ёндо берёкчиренть занизь немецень генералонь Дитлянь горной егерень корпустнэ. Сынь остатка аштем ковонь читнестэ варчизь Советской ушмантнэнь оружиянь виенть Мурманск ошонть ёно. Но гитлеровской командованиясь эзь кадо мель сеземс минек оборонанть, лисемс Кольской заливентень ды саемс Мурманск ошонть. Старшей лейтенантось Гуреев маштозь путнинзе эсь боецэнзэ, макссь команда теемс маньчевемань окопт ды траншеят, конатнэнь сеске редизь немецень пилотнэ, кавксть каясть лангозост бомбат, а алкуксонь окоптнень эзизь редя. Бомбамодость мельга немецень горной егертне лавшолгадсть, апак пеле кармасть якамо леенть чирев шлямо - нардамо. Аволь васоло леенть эйстэ тейсть толбандят, пидесть ярсамс. Егертне котёлокост марто тулкаесть вейкест-вейкест толбандятнень вакссо. Гуреев комбатось сась истямо решенияс, теемс тенст толонь пиземе. Тень кис пулемётчиктне ютасть седе малав леенть чирес немецтне ёнов. Павел Георгиевич вешсь тол полковой артиллериянь командирэнть кедьстэ, теке басом максь координат миномётчикнень туртов. Медь ковонь ветеце чистэ, валске марто, егертне куромозь ютасть леенть чирев шлямо-нардамо. Кухняст вельксэ ютась качамо, анокстасть ярсамс. Те шкастонть комбатось макссь команда уставамс толонь ветямонть. Егертне лангс валозь-валовсь весе минек батареятнень толось. Чиезь туицятнень сасасть минек винтовкатнень пулятне, эзть лотксе леднемадо пулемётнэ. Снарядтнэ ды пулемётнэ коштонтень кепедсть кухонянь повозкатнень пидицятнень марто. Противникесь те тюремадонть мельга кандсь ламо ёмавкст. Кавто чинь ютазь медь ковонь сисемеце чистэ тёжа вейксэсядт ниленьгемень васенце иестэ, немецень горной егертне атаковизь Гуреевень батальононть. Фашистнэнь вастызь толонь стенасо. Кавто часонь ютко зэрнесь кежев тюремась. Весе батареятнень пулемётонь ды миномётонь толось лоткавтынзе немецень солдатнэнь наступлениянть. Ансяк вить ёно батальононть флангасонть, косо ветясь тюреманть колмоце ротась, егертне форсировизь Западной Лицанть ды атаковизь минек боецтнэнь. Немецкой минась тапизе станковой пулемётонть, ротась кандсь покш ёмавкст, боеприпастнэ ульнесть прядовома лангсо. Ротань командирэсь пачтсь Гуреев комбатонтень берянь положениядост. Павел Георгиевич сонсь капшазевсь лездамо. Эряскалезь пурнась боецтнэнь эйстэ колмо пулемёт марто группа. Сынь капшазь сыргасть колмоце ротанть позициятне ёнов. Но комбатось примась истямо решения, а молемс окоптне ёнов, вачкодемс икелев молиця егертнень удалдо -тылстэ. Пулемётнэнь толось кармась улеме егертненень чавовомань толокс. Гуреев комбатось сонсь тапась колоньгемень кавксо ятонь солдат. Тюрема толдонть мельга ловсть кавтосядт маштовозь ятонь солдат ды офицерт. Овсе аламо оймсема шка макссь минек боецтнэнень ятось. Чинь валгомантень ливтясть ламо немецень самолёт. Те шкастонть Павел Георгиевич ванось ятонть мельга, кона ульнесь леенть трокс сэденть вакссо. Егерень покш группась ведьга печтизь Западной Лицанть. Тюремань стака шкастонть комбатось кепедизе штыковой атакас остатка резерванзо - миномётной ротанть. Сынь леднизь весе минань боевой запасост. Те штыковой атакасонть и маштовсь Героень куломасо комбатось - Павел Георгиевич Гуреев, войнань кемготовоце чистэ. Боевой ялганзо калмизь сонзо Западной Лицань сэденть ваксс Братской калмос. Сон ульнесь представленнойкс Советской Союзонь Героень лемс. Посмертно ульнесь казезь Ленинэнь орденсэ. Павел Георгиевичень меельце ялаксозо, Михаил Георгиевич Гуреев, тёжа вейксэсядт ниленгемень колмоце иестэ ульнесь казезь Советской Союзонь Героень лемсэ. Т.В. Чиндяйкина - н. сотрудник Мемориального музея. | 
