Иван Фролович Бибишев чачсь тёжа вейксэсядт комсь васенце иестэ умарь ковонь кавксоце чистэ Инсарской уездэнь Самарка посёлокс, сокицянь ды видицянь раськес. Тесэ сон ютавтызе эсь эйкакшчинзэ. Седе мельга сонзо тетязо ды авазо печксть-ютасть Мокшанской райононь Песчанка посёлокс. Од таркась ульнесь истя жо аволь пекень пештиця, секс сынь решизь туемс Урал ёнов, Магнитогорск ошонтень. Тесэ Иван пряды спецшкола ды карми важодеме метеорологокс. Тестэ сонзэ сайсызь Якстере Армияв. Ушодовсь Ине Отечественной войнась, конась кандсь эсензэ коррективат Иванонь планозонзо. Бибишевень направасызь тонавтнеме Чкаловской военной авиашколав. Цвети ковонь читнестэ Иванонь совавтсызь Донской фронтонь кавтосядт кавксоньгемень ветеце штурмовой авиаполков. Аволь сэрей, келев лавтов, раужо сельме, якстере чамаумарь од цёрась сыргавтнесь мизолкст. Но эсь сановчисэнзэ, кемечисэнзэ, апотыцячисэнзэ летной техниканть кувалма тонавтнемасонть, сон кемевтсь весень пельде вечкема ды ломанькс путома. Фронтнэсэ обстановкась ульнесь аволь вадря. Минек пехотась верьде валомас тюрематнесэ потась удалов. Ятось правтсь Дононть ёнов, Кавказов, штобу нельгемс нефтенть, эсь кедьс саемс Сталинград ошонть, лисемс Волга леенть чирев. Ятонть ютамо кись пешксель толдо ды ёмавксто. Менелесь ульнесь якстере вень пертень пожартнэде. И чить и веть молсь апак лотксень увт тюрематнеде. Пехотась вешсь лезкс. Минек штурмовой авиационной частне командованиянь приказтнэде мельга ливтясть тюремань толтнэнь потс. Штобу пес панемс ятонть, ливтемс оймензэ ды лоткавтомс сонзэ икелев молеманзо, лиясто чизэнзэ теильть мик вете-кото ливтямот. Сеедестэ минек частне ветясть тюрематнень аэродромтнестэ, конатне ульнесь наземной частнеде ве ёно, васоло икеле, ды кадылизь сынст ансяк сестэ, зярдо сыль тенст приказ или сестэ, зярдо противникенть ёндо ютыль покш зыян. Истямо покш тюремань ютамо читнестэ сась фронтов Иван Бибишев. Сыцятнень ютксо сон ульнесь сех од. Васенце чистэ саезь сынь сразу ульнесть кучозь тюрематнес. Бибишев маштозь ветясь Ил-кавтоце номер марто самолётонзо. Сонзо ульнесть эсензэ методонзо, кода тапамс ятонть. Менель коштсонть сонзо ливтямонзо, боевой ялганзо содылизь васолдо пачкодемстэ, мизолдозь мерильть: «Оно ливти минек Бибишёноконок». Не валтнэс сынь путылизь весе ялгаксчинь вечкемаст, те од, свал мизолдыця лётчикентень. Васенце боевой крещения Бибишевнень кандсь тёжа вейксэсядт ниленьгемень омбоце иень медь ковонь кемвейкееце чись. Юго-западной фронтсо кото ИЛ-энь группась топавтсь задания: эрявсь атаковамс мотомеханизированной противникень коллона, кона мешась минек наземной войскатненень, Волчанской районсонть, икелев шаштомантень. Заданиясь ульнесь топавтозь парсте. Минек штурмовиктнеде мельга лиядсть паломо комсь автомашинат, вете танкат ды ульнесь маштозь ламо ятонь живой сила. Те чистэнть полкось тейсь ниле ливтямот. Не ливтямотне сайсть личной составонть пельде ламо вий ды илык. Лётчиктне прыльть сиземадонть пильге лангсто. Сась од задания: ИЛ самолетсо теемс кинь разведка, совамс ятонть тылэв сизьгемень километрань тарка. Те заданиясть эрявсь теемс срочна. Весень ютксо ливтизе прянзо Ваня Бибишев. Заданиянть сон топавтызе, командованиянть туртов тусь ламо ценной сведеният. Прянь апак вансто, апак жаля сон топавты стака боевой задачатнень ды свал канды ятонть туртов ламо зыян. Тёжа вейксэсядт ниленьгемень кавтоце иестэ, таштам ковсто Иван Фроловичень боевой эрямосонзо юты покш события. Нарком оборонань заместителесь, авиациянь Маршалось Новиков, лична казизе Бибишевень Якстере Знамянь орденсэ. Теке ковстонть Ваня Бибишев сови Ленинской партиянь кадидатонь членэкс. Тёжа вейксэсядт ниленьгемень колмоце иестэ якшамо ковонь кеменце чистэ Иван Фролович тапи Сталинград ошонть ало куродовозь ятонть группировка. Ниле телень, пек якшамо, нурькине читнестэ сон тейсь кемвейкее изнявксов боевой ливтямот. Неть ливтямотнесэ ульнесть тапазь комсь автомашинат ятонь войска ды эрьва кодамо груз марто, сядо противникень солдат ды офицерт, вейке транспортной самолёт. Образцовой боевой важодемань кис, Бибишев Иван Фролович ульнесь казезь омбоце Якстере Знамянь орденсэ. Ведьгемень вейксэце гвардиянь штурмовой авиаполконь эскадрильянь командирэнь заместителесь Иван Фролович Бибишев эсь боевой ялганзо марто получасть задания: каямс эртема противникенть лангс, кона кекшсь лашмос, Сталинград ошонть малас. Лездамс минек пехотантень. Заданиясь ульнесь топавтозь, пехотась сыргась эртевемас. Минек самолётнэ тусть ливтязь аэродромонть ёнов, Иван Фролович ливтясь меельцекс ды сон нейсь, кода лия участкасо ашти мадезь минек пехотась, лоткавсть минек танктне. Сыненст кодаяк эзь изняво гитлеровецтнэнь каршо молемаст. Противникесь пурнась тезэнь ламо вий: пулемёт, пушкат ды лия боевой техника. Иван истя жо нейсь, што учаскась ульнесь виевгавтозь зенитной артиллериясо. Сонзо ялганзо тусть васов икелев, тень лангс апак вано Бибишев ськамонзо, толокс, каявсь ятонть лангс. Сон ветексть кайсевсь противникенть лангс, валнось сонзо эсь самолётонь толсонзо. Противникесь сонзо каршо ветясь тол весе орудиястонзо. Коштсонть вейке шкасто сезневсть ламо снарядт. Вейкесь сынст эйстэ понгсь Бибишевень самолётонь фюзеляжос ды сезевсь. Моторось кармась паломо, ютась раужо качамо. Ульнесь стака лексемс. Якстере теште марто самолётось теевсь ливтиця толонь факелэкс. Не эрямонь остатка критической минутатнестэ Ваня Бибишев примась остатка прявт арсема: направамс палыця самолётонть зенитной батареянть лангс, эсь эрямонзо апак жаля тапамс ятонть виензэ. -Чачома масторонть кисэ!- марявсь Бибишев лейтенантонь вайгелезэ ды мужественной пилотось ветизе ранявозь, палыця самолётонзо ятонь техниканзо ды живой силанзо лангс. Штурмовикенть прамо таркасонзо азаргадозь палсь толось. Превтеме кадовозь тандадомадонть немецтне тусть чийнезь. Минек танктне пехотанть марто сразу саизь ятонь укреплениятнень. Истя маштовсь минек земляконок гвардии лейтенантось Бибишев Иван Фролович, сон педе пес топавтызе эсь долгонзо Чачома масторонть икеле. Эсь нурькине, валдо, паро эрямонзо перть Советской Союзонь Героесь, гвардии лейтенантось, эскадрильянь командирэнь заместителесь, Иван Фролович Бибишев, тейсь эсь самолётсонзо сядодо ламо боевой ливтямот - чить ды ниленьгемень вейке-веть. Сон тапась комсь танкат, ниленьгемень вете автомашинат груз ды войска марто, кевейкее зенитной артилллериянь точкат, сонзо штурмавомадо мельга теевсть кемень пожаронь, толонь таркат, тапась ветесядто ламо солдат ды гитлеровской армиянь офицерт. Казезь кавто Якстере Знамянь ды ине Отечественной войнань орденсэ. Тёжа вексэсядт ниленьгемень колмоце иестэ, умарь ковонь комсь нилеце чистэ, СССР-нь Верховной Советэнь Президиумось Иван Фролович Бибишевнень максь Советской Союзонь Героень лем – посмертно. Легендарной летчикенть лемезэ свал карми улеме минек ды земляконок мельсэ. Сон совавтозь авиаполконь личной составонь спискатнес. Инсар ошонть вейке курозо канды сонзо лемензэ. Магнитогорск ошонь кавксоце школантень ды ошонь вейке куронтень истя жо максозь Иван Фролович Бибишевень лемесь. Чиндяйкина Т.В. - Мемориальной музеень н. сотрудник.
| 
