Иван Данилович Пиняевень лемезэ содавтови аволь ансяк Мордовиясо. Сон ульнесь кол, пек активной поэт, прозаик, критик, ризныця мелявтыця ломань, эсь прянь а кирдиця паролгалемасонть, свал пек неень шкань ломань, свал васенце таркасо. Чачсь сон таштам ковонь кемнилееце чистэ, тёжа вейксэсядт комсь колмоце иестэ. Чувашской АССР-нь Порецкой райононь Напольной велесэ, сокицянь-видицянь семиясо. Тонавтнесь васняяк Напольной ды мейле Сиява велесэ, косо ульнесь средней школа. Сонензэ эзь топоде ещё и кемкавксово иеть, зярдо минек масторось соракадсь гитлеровской ордатнень каявомадонть. Тусь фронтов тетязо, мельганзо Ивангак. Васенце сонзо стихотворениязо «На берегу Крутого Яра» тёжа вейксэсядт ниленьгемень васенце иень, «Отчий дом» - тёжа вейксэсядт ниленьгемень омбоце иень, «Смерть телефониста»-тёжа вейксэсядт ниленьгемень нилеце иень ды лиятне печатазельть фронтовой газетатнесэ. Иван Данилович фронтсо ветясь дневник, козонь тешкстась военной событиятнеде, эрьва эрязь чиденть. Сон сёрмадсь эсензэ кис. Сермадсь стака читнестэ, штобу аламодо хоть шождалгавтомс сэретьксэсть ды ризксэсть. Тейнесь тешкст шожда читнестэяк. Сон стараясь тешкстамс эрьва ютазь чинть. Те дневникесь ашти исторической документэкс. Кавто тештавкстнэнь минь невтьсынек (ацам ковонь колоньгемень васенце чись тежа вейксэсядт ниленьгемень нилеце иесь)
«- Ванды тёжа вейксэсядт ниленьгемень ветеце ие! Кода апак маря ливтясь тёжа вейксэсядт ниленьгемень нилеце иесь, Ине сражениянь иесь, русской народонь изнямонь иесь. Те иестэнть Россиясь невтизе весе мирэнтень, што сон а путови кумажа лангс, што рузонь народось а изнявиця! Пелевестэ минек артиллериясь кучсь немецтнемень Од иень поздоровт артиллерийской снарядтнэстэ. Вастомазонок тежа вейксэсядт ниленьгемень нилеце ие. Шумбрачи, од сыця тёжа вейксэсядт ниленгемень ветеце меельце войнань иентень.»
Якшамо ковонь васенце чи, тежа вейксэсядт ниленьгемень ветеце ие.
- Мезе аноксты те иесь? Ютыя Румыниянть, Карпатнэнь, Трансильваниянть, Венгриянть ды пачкодинь Чехословакияс. Косо еще ули эрсемс тежа вейксэсядт ниленьгемень ветеце иестэ?. Ультяно живть – нейсынек!
Ивляев Николай Леонтьевич чачсь тёжа вейксэсядт кеменце иестэ неень шкань Рузаевской райононь Старый Усад велес. Воевась тёжа кодгемень нилеце гаубичной артиллерийской полксо. Маштовсь ятонть марто тюрематнесэ тёжа вейксэсядт ниленьгемень иестэ умарь ковсто. Ловносынек сёрманзо, конань сон сёрмадызе эсь тиринь ломаненстэнь якшамо ковонь васенцё чистэ тёжа вейксэсядт ниленьгемень омбоце иестэ.
«Шумбрачи, тиринь авай ды Маруся! Кучан тенк боевой Од Иень сюкпрянь ёвтамот ды тёжа паро арсемат тынк эрьва чинь эрямосонк ды шумбрачи. Ещё кучан боевой Од Иень сюкпрянь ёвтамот вечкевикс эйдень туртов: Ванюшанень, Акулинанень ды Мишанень. Сех вадря тенст мельарсемат кучан. Вечкевикс авам ды Маруся! Тынк пельде монень сась сёрма ацам ковонь комсь сисемеце чистэ ды теке чистэнть получинь открытка Танянь пельде, мезень кис мон пек ды пек кенярдан, тёжа сюкпрят тензэ. Ацам ковонь колоньгемень васенце чистэ монень сась кучовкс. Кучовксосонть ансяк алтнэ колавсть эзть саво вачамс.
Инеське авам ды Маруся, тынь сермадтадо, што миинк скалонть, мезе-бути рамсиде, те пек вадря, ансяк се берянь, што тыненк эзь саво рамамс или стамс оршамопельть эйкакштнень туртов, тень кис Ваня а яки школав, мон тыненк теде кортакшнынь.
Вечкевикс авам ды Маруся мон те шкастонть тыненк а лездаван, секс эрядо, кода маштадо. Тынь тынсь нейтядо кода мезе эряви. Лиядан течинь чис шумбрасто!
Меркушкин Григорий Яковлевич, чачсь сундерь ковонь неень шкане Инсарской райононь Новые Верхисы велес.Тюрсь ятнэ марто Ленинградской, Калининской, Северо-Западной, Прибалтийской фронтнэсэ. Воевась тёжа вейксэ стрелковой полконь батальононь командирэкс, кавтосядт сизьгемень ветеце стрелковой дивизиянь штабонь начальникень заместителекс. Тёжа вейксэсядт ниленьгемень нилеце иестэ стака ранениядо мельга сон ульнесь демобелизовазь. Войнадо мельга важодсь келень, литературань, историянь ды экономикань Мордовской научной исследовательской институтонь директорокс, Мордовской АССР-нь просвещениянь министракс, МАССР-нь Министрань Советэнь председателекс, Мордовской обкомонь КПСС-нь секретарекс, Мордовской государственной университетэнь ректорокс. Казезь Ленинэнь орденсэ, Важодемань Якстере Знамянь орденсэ, «Знак почётасо», ды нярыя медальсэ.
Тёжа вейксэсядт ниленьгемень кавтоце иестэ ацам ковонь колоньгемень васенце чистэ сон сермады сёрма вечкевикс пельксэнстэнь.
« Шурик, шумбрачи!
Кемесэ, кеместэ палан эйсэть ды кутмордан тонть монь пельксэм! Шурик, Од тёжа вейксэсядт ниленьгемень колмоце иень самонтень лиядсь кавто част. Кавто часто мельга сы Од иесь, тонь марто вастовома ие, вейсэ мартот эрямонь ие! Уцяскань ие! Кадык ули содавиксэкс те иесь! Те Од Иестэнть кадык муить калмот минек ненавистной ятнэ! Шурик, монь сырнень покольнем, кода эрят? Кода тонь эсь прянь марямот? Мон эрян вадрясто.Эряскавтан ятонь тапамость, штобу бойкасто ардомс тонеть, монь вечкевиксэм! Истя, Шурик ульть шумбра! Од Иесь ятонь тапамо ие! Минек вастовома ие ды Минек вейсэнь уцяскань ие! Кеместэ тонь палан!
Наумкин Иван Дмитриевич чачсь тёжа кемкавтово иестэ Дубенской раононь Кочкурова велес. Якстере армияв саизь тёжа вейксэсядт ниленьгемень васенце иестэ. Рядовой. Маштовсь тюремасо тёжа вейксэсядт ниленьгемень колмоце иестэ ацам ковсто.
Тёжа вейксэсядт ниленьгемень кавтоце иестэ якшамо ковонь васенце чистэ сон сёрмадсь кудов сёрма.
«Од Иень, уцяскань иесэ, монь вечкевиксэнь! Шумбрачи монь тиринь ним Екатерина Алексеевна! Мон кучан тонеть эсень седеймарямонь, толонь кондямо шумбрачи эсь седейстэнь, конась важоди апак лотксе, пани весе вишка сэредькстнэнь ды эжди якшамотнестэ. Ещё кучан истя жо эсь вечкевикс эйденень, васняяк Миколь цёрам туртов, Мариянень, Нинанень ды Прасковья Ивановнанень. Мон тынк тетянк, кучан тыненк эсень ламонь ды прев-содавксов сюкпрянь ёвтамот, арсян тенк свал улемс шумбрат ды свал кунсоломс эсь аванк. Катя ёвтак шумбрачи ватанень, низанянень ды весе роднятненень. Мон живан ды шумбран. Седе тов, Катя карман сермадомо эсь эрямодон. Ветятано противикенть каршо даволонь тол ды пантяно эйсэнзэ минек вечкевикс тиринь масторонть лангсто. Немецтне минек масторонть видезь-видить эсь кулоь уловсост. Миненек лезды минек телесь, конась сыненст пек а вечкеви. Гитлеровской извергтне кармасть максовомо миненек полонс. Седе тов карман сёрмадомо лия читне ланга. Катя мон кучан ды кучнинь тенк ламо сермат, тынк пельде пшкадема эзинь получа. Пелян эзь тееве ли кодамояк зыян? Сермадодо! Учан ды карман учомо! Катя мон тешкстынь, што кучинь тенк ярмак, кавто карточкат, кияк эзь отвеча. Мон, Катя, пек тошнакадынь тынк кис. Пек учан сермат. Кода тынь тосо? Кодат кулянк? Весе монь ялган получить ды ловныть сёрмат, а монь теке арасть тиринь ломанень! Катя, кудосо ли Алексей Михайлович? Шумбрачи тензэ! Неть читнестэ аламодо сэрединь. Паро аштинь не читнестэ ве таркасо, а кудосо, землянкасо. Ярсамонть кувалт тонсь содасак.
Самойлов Леонид Николаевич чачсь тёжа вейксэсядт кемколмовоце иестэ, Саранск ошос. Якстере армияв саизь тёжа вейксэсядт колоньгемень вейксэце иестэ, прядсь «Выстрелэнь» курсат. Тёжа вейксэсядт ниленьгемень васенце иестэ важодсь Саранк ошонь ОСОАВИАХИМ-нь комитетсэ. Ине Отечественной войнань ушодомсто ульнесь путозь сядо кеветееце лыжной батальононь командирэкс, конась пурнавсь-теевсь Саранской ошсо. Ульнесь Москов ошонь защитниктнень ютксо. Маштовсь тёжа вексэсядт ниленьгемень нилеце иень давол ковонь котоце чистэ Витебской областень Бычиха велень олякстомсто. Казезь Ленинэнь орденсэ, Якстере Знамянь орденсэ, Якстере Тештень орденсэ, Ине Отечественной войнань васенце степенень орденсэ.
Якшамо ковонь нилеце чинь, тёжа вейксэсядт ниленьгемень нилеце иень сёрмазо.
«Шумбрачи, монь тиринь, монь вечкевикс, каткинем, вишинькине Белочка, тейтернем, авам, Вера! Кучан тенк эсень боевой шумбрачи ды поздоровт Од тёжа вейксэсядт ниленьгемень нилеце иесэ тынк весень! Каткинем, тон монь васняяк простямак, што мон кучинь тенк поздоровт пек позда, седе икеле мон эзинь кучовт! Минь ветятано каявомат, пантяно немецень сволочонть, а макстано оймамо тенст а чить, а веть. Тон уже содат. Што монь аравтымизь покш казнес Советской Союзонь Героень лемс, курок карман получамо, мезень кис казеть эйсэнь мон тонеть сёрмадынь. Тиринь, каткинем, неень шкане мон топавтан кармавтоматнень гвардейской полк лангсо. Болдов ды Котлов аволь монь кедьсэть, сынь лиядсть монь ташто частентень, конань лангсо мон топавтынь кармавтоматнень, но арсян саемс сынст эстень. Монь лангс истя жо кучсть воинской званиянь кепедемань тешкс-гвардиянь подполковникекс. Алкукс те ансяк карми улеме вейке ковонь или седе ламонь кувалмонь ютконь шкасто. Болдовонь ды Котловонь коряс мон кучинь Якстере Тештень орденсэ сынст аравтома. Тиринем, мон тонеть сёрма сёрмадан, а эсень арась овсе шкам, эряскалян. Вот уш лишметненьгак ветизь, эряви ардомс тевень коряс. Каткинем, пачкодсь тенть кучозь ярмактне - кавто тёжа сисемсядт целковойть, ды лия переводтнэ? Сёрмалек, кода эрят? Кодамо тонь ды Белкань шумбрачизэ. Мезде ярсатадо, кодат тевенк уштома пенгтне марто, сась ли тенть сёрма Болдовонь пельде( монь арасель шкам ды мон мерекшнинь тензэ сёрмадомс сёрма тонеть монь пельде)? Кода Тоня, Маруся, Леля, Петя эрить? Паряк курок мон сан кудов. Учок, курок мон сан. Ярсан вадрясто. Удан аволь ламо. Истя, вечкевикскем прядан сёрмадомадо. Вастомазонок! Кеместэ палатан! Тонть Леонид.
Денисов Василий Егорович чачсь тёжа вексэсядт кемнилееце иестэ, неень Атяшевской райононь Сабанцеле велес. Тёжа вексэсядт ниленьгемень кавтоце иестэ саезь, сон Якстере Армиясо, фронтсо. Сержант. Кулось ранениядо мельга аштем ковонь тёжа вейксэсядт ниленьгемень нилеце иестэ. Калмазь Ленинградской областень Выборг ошос.
Паро чи, эргелиця час! Щумбрачи тиринь тетям, авам, Егор Иванович ды Агафия Максимовна. Кучан тенк цёранк пельде пси шумбрачи, вадря мель марто. Седе тов сюконян тиринь монь сазором туртов Вера Егоровнанень. Кучан тенк пси шумбрачинь вадря алтавкс марто сюкпря. Васенце строчкасо мон ёвтан эсь шумбрачиденть, неень шкасто живан ды шумбран, мезе и тыненк арсян. Мейле ёвтан, што получинь тынк пельде кучовкс тёжа вейксэсядт ниленьгемень колмоце иестэ, якшамо ковонь кемнилееце чистэ. Кучомасонть ульнесь вишка банка медь, вейке тетрадь, костязь ламбамо сюкорот, получия якшамо ковонь кемнилееце чистэ чинь суньдерьгадомсто. Од Иенть кис тантейсэ ужинынь. Мезень кис ёвтан тенк сюкпря. Ламбамо сюкоротнень стряпинзе монь вечкевикс авам! Косояк истя тантейстэ эзь саво тень ярсамс, кода авань стряпавкс ярсамодонть. Вечкевикс авам, тетяй ды весе кудо раськесь, мон пек тошналгадынь кисэнк. Вастомазонок! Весень палан! Шумбрачи марто тынк цёранк Василий Егорович Денисов.
Ды ещё вейке сёрма, конась сёрмадозель фронсто Ковылкинской райононь секретарентень Павел Васильевич Сачиннэнь фротовик Бабинэнь пельде кучозель ацам ковонь комсь котоце чистэ тёжа вейксэсядт ниленьгемень колмоце иестэ.
«Вечкевикс Павел Васильевич! Кучан тыненк поздоровт Од Иеденть! Ды весе седейсэнь арсян тенк тёжа вейксэсядт ниленьгемень нилеце иестэнть седе ламо изнявкст, сатовкст фронтонть топавтомасо эрьва мейсэ, щтобу бойкасто тапамс, маштомс верьсэ пидиця агрессоронть-Гитлеровской Германиянть. Кеман, што тёжа вейксэсядт ниленьгемень нилеце иесь карми улеме прядыцякс немецкой бандатнень эрямосо, истя жо неть сворань правительтненень, конатне весе масторонь ломантнень каизь верь потсо войнантень, кодамо ещё арасель минек историясонок. Мон карман стараямо эсь цёран марто, кона воеви сядо ниленьгемень васенце стрелковой дивизиясо, честь марто топавтомс путозь задачатнень, Ине Изнямонть ятонть лангсо малавгавтомантень.»
Коммунмстической сюкпря марто И. Бабин.
Т.В. Чиндяйкина
|
