Михаил Георгиевич Гуреев чачсь чады ковонь колоньгеменце чистэ тёжа вейксэсядт комсь васенце иестэ Курнино велес неень шкань Республика Мордовиянь Ковылкинской районс. Тонавтнесь Ковылкинасо железнодорожной школасо, косо прядсь кавксо класст. Тёжа вейксэсядт колоньгемень котоце иестэ саезь эрясь Москов ошсо, косо пряды Бауманской аэроклуб. Тонавтнемадо мельга кармась важодеме тролейбусонь водителекс, омбоце тролейбусной парксо. Тёжа вейксэсядт ниленьгеменце иестэ сайсызь Армияв ды кучсызь тонавтнеме авиационной школав, конась ульнесь Ленинградской областесэ. Ине Отечественной войнанть Михаил Гуреев вастсы Прибалтикасо, косо сон служась мотористэкс колоньгемень васенце истребительной авиаполксо. Михаил Георгиевич лецтнесь: «Минек аэродромонок кармасть бомбамо валске марто ниле часосто. Полкось кандсь покш ёмавкст живой силасо ды самолётсо. Бомбамодо мельга полконть лиядкстнэнь ускизь тылэв, ломаньсэ ды техникасо пурнамодо мельга направизь фронтов - Украинав». Лебедин ошонть районсо, Сумской область ало тюрематнесэ, таштам ковсто тёжа вейксэсядт ниленьгемень васенце иестэ, Гуреев ульнесь ранязь. Пичкамодо мельга воевась авиационной полксо Мурманск ошонть ало. Седе тов сонзо кучизь тонавтнеме Пенза ошов артиллерийско-миномётной училищав. Фронтов самодо мельга сон ульнесь путозь миномётной полконь разведкань начальникекс. Васенце же противникень позициятне лангс разведчикень рейдэсь невтизе, што исень авиаторось смел ды отвагадо пешксе. Таштам ковонь куншкасто тёжа вейксэсядт ниленьгемень колмоце иестэ Белгород ошонть алов велявтомсто, разведчиктне вастовсть противникенть марто, конатнеде ульнесть кавксть седе ламо. Каршо тюремасонть вейке сержантось ульнесь ранязь. Гуреев максь кармавтома потамонень, сонсь лиядсь потамонть кородомо. Понгсь минань сезневема алов, ульнесь ранязь. Цела ков тылсэ госпитальсэль. Вейке осколкась лиядсь рунгозонзо апак тарга. Белгород ошонть районс Гуреев пачкодсь Курской битванть уставамодо икеле. Сон путозель миномётной полконь батареянь командирэкс. Цела недля сынь тюрсть кирдемань тюрематнесэ. Штобу ванстомс техниканть ды личной составонть бомбёжкатнень эйстэ, Михаил Георгиевич миномётчиктненень максь кармавтома, валявомс мода потс. Зярдо противникесь сыргась эртевемас, вачкодсть весе батареянек. Казямо тюрематнесэ маштовсть ламо боецт. Но и ятоськак ульнесь лоткавтозь. Медь ковонь кемгавтовоце чистэ тёжа вейксэсядт ниленьгемень колмоце иестэ противникесь тейсь сыргавкс неть тюрематнесэ остатка каявоматнес. Гуреевень батареянть позициятне лангс, Прохоровка районсонть коволокс каявсть «тигратне», «пантератне» ды «фердинандтнэ». Атакась ульнесь лоткавтозь, но пек покш питнесэ. Батареясь ёмавтсь кавто расчёт. Ятось аламо шкань ютазь яла кайсевсь лангозост. Меельце атакадость икеле Гуреевень миномётчиктне, салава полавтызь позицияст. Вастызь противникенть валовомань толсо. И таго противникесь потась эсест позиция лангс. Курской дугасо наступлениятнесэ Гуреев лейтенантось эсь батареянь толсонть тапась пехотань взвод, миномётной батарея, кавто противникень станковой пулемёт, те весе служась сенень, штобу минек войскатне седе эрязасто саевлизь Никитовка веленть. Тучное веленть кис тюрематнесэ минек батареянь толось тапизе немецень автомашинанть, конась усксесь ятонть туртов боеприпаст. Тапизе наблюдательной пунктонть, ятонть миномётонзо ды противотанковой пушканзо. Неть тюрематнень кис Михаил Георгиевич ульнесь казезь Отечественной войнань омбоце степенень орденсэ. Гуреев старшей лейтенантось Днепра леенть форсированиянь участник. Сонзо батареязо таштам ковонь комсь ветеце чистэ тёжа вейксэсядт ниленьгемень колмоце иестэ подручной средства вельде, ятонь толонть алга, уизе Днепра леенть. Боевой позициятнень икеле ютазь, ветясть покш тол фашистнэ ланга. Михаил Георгиевич Гуреев, неть тюрематнень кис, ульнесь казезь Советской Союзонь Героень лемсэ, ацам ковонь комсь нилеце чистэ тёжа вейксэсядт ниленьгемень колмоце иестэ. Сон Корсунь Шевченковской операциянь участник, олякстомць ятонть эйстэ Румыниянть, Венгриянть, Чехословакиянть. Чехословакиянь кис тюрематнесэ давол ковонь кеменце чистэ тёжа вейксэсядт ниленьгемень ветеце иестэ ульнесь ранязь ды контузязь. Ине Изнямонть- полкось, косо служась дивизионнонь командирэкс Гуреев капитанось, вастызе Прага ошсонть. Омбоце Украинской фронтонь сводной полконь составсо Михаил Георгиевич Гуреев ульнесь Ине Изнямонь Парадонь участникекс. Войнадо мельга пряды Высшей офицерской артиллерийской школа, мейле Высшей офицерской интенданской школа, Военной академия. Тёжа вейксэсядт ведьгемень кавксоце иестэ саезь Гуреев полковникесь туи запасов. Эрясь Москов ошсо. Тусь эрямостонть кавто тёжа вейксэце иестэ. Чиндяйкина Т.В. | 
