Мольсь 1943 –це иесь. Азарсь фашисттнэнь пансть чивалгомав. Ды ялатеке Якстере Армиясо солдаттнэ эзть сатно. Эрявсть од вийть. Ды сынст пурнасть школасо тонавтницятнень ютксто. Чаунза енксонь Покш Маризь велень 9-це (вейксэце) классо кемгавксово тонатницятнень эйстэ, кинь 1943-це иестэнть тердизь войнав, кудов састь ансяк ниленест: Дмитрий Цыганкин, Петр Букин, Михаил Четвергов ды Владимир Артаев. Сестэ сыненст, ве классо тонавтницятненень, мерезель пурнавомс райвоенкомат икелев. Дмитрий Цыганкинэнь тетязо, Василий Потапович, озавтынзе весе кевейкеенест –кото патят-сазорт, колмо лелят-ялакст ды тетянзо-аванзо лисемадо икеле столь экшс, кода тейнить ливтемстэ. Теке марто, тетят – церат арсесть: нурдс кильдезь алашинесэнть парсте валакавтозь телень кияванть Чаунзав сельгень прамс пачкодить. Истя арсесть ды манявсть: саезь ялгатнень марто поездэсь кенерсь туеме. Велявтсть кудов. Омбоце чистэ пачкодсь Рузаевкав, кутьмерьсэнзэ карь марто канст. Те канстонть вокзалсо мейле саласызь, а сонсензэ велявтсызь мекев кудов школань прядомо. Омбоцеде повестка сы тензэ эйзюрковсто. Ней уш сайсызь служамо. Понги Москов енксонь Лобня ошов. Цела эшелон сонзэ кондят пурнакшность. Оршизь-карсизь ды - Смоленскоев кучизь. Мейле - тагояк ускизь Москов алов. Ней – Ногинскоев, косоль инструментальной разведкань школась. Икеле Митянень меревельть бу – эрьва пушканть эсензэ вайгелезэ – а кемевель. Ней гайтень коряс сонсь тонавтнесь пушкатнень кундсеме ды натой содыль, косо эрьвась икеле леднесь, кодат виензэ–снарядонзо. Тонавтнемадо мейле таго озавтызь товарнякс. Чи ардыть…, омбоце…, ветеце. Весть ранаяк валгстызь кодамо-бути станцияс. Дивазевсь. Саранскоев ускизь! Се ошонтень, козо мелят тетязо усксизе фельдшеркс тонавтнеме. Медучилищав. Экзаментнэньгак Митя максокшнынзе, студентэкс сайнизь, ды профессиясь мелезэнзэ эзь тукшно, оргодсь мекев чачаома велев. Сестэяк, Саранскоев омбоцеде понгомсто, эзь сода: самай эсь республикань прявтошсонть пурнавкшность военной дивизионт ды тестэ весень сайнесть витьстэ фронтов. Мейле, ламо иень ютазь, книгасто ловносы: кавто чиде икеле сонзэ казармасонть эрясь Александр Исаевич Солженицын, рузонь ине писателесь. Тиринь ошось свал малавикс. Секе медучилищасонть ней тонавтнесь Зина сазорказо. Покш мелезэ ульнесь неемс сонзэ, кортнемс мартонзо. Нама, начальствась а нолдасы. Савсь салавинька туемс. Ялатеке, - редизь. Пекстызь гауптвахтас, кона сестэ ульнесь Печатень ташто кудонть икеле. Тосто тнолдамодонзо мейле Цыганкинэнь эйсэ ливтнесть патрулекс якамо. Боказонзо понгавтыльть шашака – теке городовой яксиль. Косо ней Славань алеясь – Саранка лейненть чиресэ – ульнесь базаронь кондямо. Кучнизь товгак дежурямо. 1943-це иень меельце ковстонть сон понги Западной фронтов, кона мейле тееви 3-це Белорусскоекс. Иеде ламо служамодо мейле теевсь младшой сержантокс, казизь «Отвагань кис» медальсэ. Ульнесь мезень кис. Весть те ульнесь Польшань моданть лангсо, Августов виртнесэ, сон гайтень коряс невтизе немецень пушканть тарканзо, а батареянь командирэсь Митянень а кеми. «Те леднемкась умок тапазь!» - а кеми командирэсь. Цыганкин –эсензэнть: арась, корты, эзинь маняво, вайгелензэ сеске содыя… Озавтызь самолетс, ды ливтясть вешнемензэ. Батареянть муизь вейке эрькстэ. Тозонь, сэдявкс лангс, фашисттнэ ладизь сонзэ ды адя минектнень пелев леднеме. Ледить – туить уезь, ледить – туит уезь… Ежовольть немецтне. Ялатеке, тапазельть. Цыганкин эзь маняво. Войнанть прядызе Кеннигсберг ало 1945- це иень апрельстэ. Мейле таго вете иеть служась – солдаттнэнь таркас а кинь ульнесь аравтомс, школасто тонавтницят сестэ уш эзть сайне. Служась Германиясо кудов нолдамозонзо. Старшей сержантокс. 1948-це иестэ ульнесь Берлинэнь Трептов парксонть советский солдаттнэнь стявтозь памятникенть панжомсто. Кавто ковонь перть сынст, кочказь сэрей , мазый цератнень, Берлин ало тонавтсть почетной стройсэ яксеме. Почетной караулс сонзэ полкстонть понгонесть ансяк кавонест: сон, Цыганкин эрзясь, ды вейке руз. Кемень класстнэнь прядынзе Германисо. Эсензэ частьсэ. Велявтсь тириь Мокшалей велев. Тесэ маризе, што Саранск ошсо панжовсь эрзямокшонь факультет А.И. Полежаев лемсэ госпединститусо. Тетязо кармавтсь эйсэнзэ тонавтнеме. Сонсь лововсь «грамотеекс» - революциядо икеле церковно-приходской школа прядсь, маштыль ловномо ды сермадомо. Велесэнть васенцекс совась колхозс, сонсензэ туртов эсь кардсо трясь-кастась паро рысакт. Истя 1950-це иетнестэ Дмитрий Цыганкин теевсь студентэкс. Мартонзо тонавтнесть Виктор Дмитриевич Обьедкин ды Семен Захарович Деваев. Ярсамс а мездель, оршамс а мейсэ. Германиясто ускокшнось кавто мазый панарт. Сетнень кис весе курсонь цератне сакшность Цыганкиннэнь, кинень тейтерс молемс эрявсь, кинень урьвакстомс, кие кодамо тевс сыргиль – весе чиильть тензэ. Германиясто Митя ускокшнось аккордеон. Сонзэ савсь миемс ды рамамс оршамопельть: костюм ды зярыя панарт. Ды тагояк кисэст весе од ломантне чийнесть Цыганкиннэнь. Ванна истят лецтнемат кадсь Дмитрий Васильевич. Эрямось ульнесь стака – ды сон икелев тердсь. Весе кемсть – «ванна сыть вадря шкатне….» 1954-1957-це иетнестэ Д.В. Цыганкин - СССР-нь Наукань академиянь институтонь аспирант. 1958 –це иестэ идесы «Эрзянь келень шугуровской кортавксось» теманть коряс филологиянь кандидатонь лементь ды карми важодеме преподавателекс. Икелень пединститутонть таркас, косо сон ульнесь студентэкс ды ков иень ютазь моли важодеме, панжить университет. Пединститутось ялатеке эрявкшнось, ды сонзэ панжсызь ошонть песэ строявиця интернатсонть. Весементь эрявсь ушодомс чаво таркасто. Васенце абитуриентнэ экзаментнэнь макссть 22-це № школасонть. Ректорокс аравтызь Николай Николаевич Молинэнь- превей, тевень сыргавтомо маштыця математикенть ( теде икеле ульнесь университетэнь ректорокс). Цыганкин марто, конань кемекстызь проректорокс, арсесть-тейсть сыргамс Московов. Мейле пачкодсть Ленинградов, косто усксть зярыя тонавтнемань ды ловномань книгат - эрявсь библиотека пурнамс. Проректорокс улемстэ Дмитрий Васильевич ламо тейсь институтонть материально-технической базанзо кемекстамонть коряс, панжовсть эрзянь-мокшонь келень кафедра. Ансяк, тиринь келенть ды литературанть уш сестэ кармасть сялдомо. Дмитрий Цыганкин каясь вал келенть ванстомадо ды… седе мейле савсь кадомс важодема тарказо. Кемень иень перть сон зняро путсь вий институтонтень, зняро кисэнзэ чийнесь-важодсь – ней савсь туемс… 1972-це иень июльстэ саезь Д.В. Цыганкин важоди Н.П. Огарев лемсэ МГУ-нь филологиянь факультетсэ. Ульнесь эрзя-мокшонь кафедрань прявтокс ды деканокс. 1978-це иестэ сон пек парсте идизе филолгиянь докторонь диссерациянть, максст тензэ профессоронь лем. Ловнось студенттнэнень лекцият, ветясь покш исследовательской робота. Эряви евтамс, Дмитрий Васильевичень научной тевензэ ламо енксовт. Сон колмосядто ламо научной статьянь, монографиянь, школатнень ды вузтнэнь туртов тонавтнема программань, учебникень ды пособиянь автор. Ученоенть перанзо алдо лиссть истят роботатне, кода «Эрзянь келень шугуровской кортавксонть фонетиказо», «Эрзянь кортавкстнэнь фонетикась», «Эрзянь этимологиядонть», «Рузонь, эрязянь ды мокшонь кельтнень ютксо сюлмавкстнэ» ды ламо лият. Ансяк 2003-2005 иетнестэ сон ламо тейсь эрзянь келень од правилатнень ды литературной келенть кемекстамост коряс. Тень кисэ ютавтсь зярыя конференцият, учительтнень ды ученойтнень, издательствань ды печатень роботниктнень марто пек лезэв вастовомат. Стяко эзь аштекшне. Мордовиянь ды Россиянь заслуженной деятелесь ды учителесь Дмитрий Цыганкин ветясь покш общественной робота. Сон «Сятко» журналонь Таллинсэ лисиця «Лингвистика Уралика» ды «Ономастика Уралика» журналтнэнь редколлегиянь член, Европань Лингвистической атласонь эрзямокшонь пельксэнь прявт ульнесь. Лемензэ содасызь Венгриясо, Эстониясо, Удмуртиясо, Марий - Элсэ, Комисэ, Карелиясо. Лиякс меремс, Россиясо, ды сеть омбо мастортнесэ, косо финноугроведениясь, кода наука, сехте неявикс таркасо. Ламо вий путсь кода научной руководитель. Лездамонзо вельде филологиянь наукань кандидатокстеевсть Р.С. Ширманкина, В.И.Щанкина, Н.В. Арискин, Н.В. Казаева ды лиятне – весемезэ 30 зрзят ды мокшот. Сонзэ ветямосо филологиянь докторонь диссертацият сермадсть Н.А. Агафонова, А.М. Гребнева, Н.С. Иванова ды лият. Сынст марто Дмитрий Васильевичкак свал вешнемасо эрясь. Седе – Д.В. Цыганкин покш ученой – кемевти лияськак. Мордовиясо сон ськамонзо, кинь кочкизь финнэнь-угроведэнь Обществань почетной членэкс-корреспондентэкс. Кочкизь Финляндиясо, косо ловнокшнось лекцият эрзянь келенть коряс. Теде башка, сон Информатизациянь международной академиянь академик. Вейсэнь тевс кундат – мерть, стувтык эсь прят. Истямо Д.В. Цыганкингак. Весень икелев а эцекшни ды удалояк а ашти. Истямо уш обуцязо: васня тевенть парынестэ арсесы – онкстасы, мейле уш карми топавтомонзо. Важоди алашакс, удалов а варштни. Содасы эсь тевензэ, конанень кунды ды кунды кавто кедтнесэ. Варштат лангозонзо – а кемеваткак: рунгозо виде-паро од церань… «Сятко» журналонть редколлегиясо важодемстэ материалонть васняяк вадрясто апак капша ловносы ды, бути улить ильведевкст, авторонтень эсь мелензэ евтасы витьстэ чамас. Лиякс евтамс, авторонть эйсэ кармавты арсеме-важодеме. Ученоесь се, конанть кочказь наукантень ули путовксозо, од кинзэ-янонзо. А стяко сынст ловить Ветицякс ды Тонавтыцякс. Студенттнэнень вадря лекциянь ловномадо башка, малав эрьва кизна, ансяк-ансяк прядовить сессиятне, Д.В. Цыганкин сыргсиль келень экспедицияв. Косо сон ансяк арасель: Чувашиясо, Пензань Самарань, Ульяновскоень областьсэ, Тататрстансо, Оренбургсо. Тосонь весе эрзянь велетнень ютынзе нучк-пачк. Ды аволь ськамонзо – практиканттнэнь марто. Саи студентэнь кодамояк группа – адя веле-веле ланга яксеме, эрзянь мазый валонь кочксеме. Лекциянзо ловнось конспекттэме, коневс апак варштне. Эрьва валсонзо - покш смусть. Ды теке шкасто студентнэнь пельде свал вешсь содамочи. Д.В. Цыганкин весе эрямонзо алтызе тиринь келень тонатнемантень ды ванстомантень. Октябрянь 22-це чистэ Дмитрий Васильевичень чачома чизэ! Арсетяно тензэ покш шумбрачи ды валдочи! А чачсь 1925 иестэ. Г.Евстигнеева - н.сотрудник Мемориального музея. | 
