Вениамин Борисович Миронов чачсь ацам ковонь комсь вейксэце чистэ тёжа вейксэсядт кемгавтовоце иестэ Константиновка велес неень шкане Ромодановской районс. Средней школань прядомадо мельга тонавтнесь педагогической техникумсо ды зярдо сонензэ топодсть кемзисемге иеть тусь важодеме Сибирев, Томск ошов. Вениамин Борисович тонавтсь грамотас тосонь населениянть ды ульнесь ОСОАВИАХИМ-ень активистэкс. Тёжа вейксэсядт колоньгемень котоце иестэ прядызе Томской ошонь артиллерийской училищанть. Тёжа вейксэсядт ниленьгемень васенце иестэ сон тонавтнесь нацясонь Фрунзень лемсэ военной академиянь курсасо. Дипломонть кенерсь получамо войнань уставамодость икеле. Ине Отечественной войнань кармамодо мельга Миронов ульнесь кучозь артиллерийской батареянь командирэкс, котоце воздушно-десантной бригадань, колмоце десантной корпусонтень. Сеске сон понгсь войнань толонть потс, те шкастонть ютасть виев тюрематне Киев ошонть кис. Мироновонь батареясь потавць нярыя ятонь атакат, аволь весть тюрематне пачколекшнесть рукопашнойкс. Умарь ковонть прядомсто колмоце десантной корпусось ютась Конотопа ошонть ёнов, штобу вастомс Гудерианонь омбоце танковой группанть эртеманзо. Мироновонь артиллерийской батареянть эйстэ неть тюрематне мельга- лиядсь ансяк вейке пушка. Смоленской областесэ десантной операциянть кис, косо Мироновонь, миномётной - дивизионозо, тейсь каявома ятонть оборонанть лангс ды лись эсенек войскатнес, старшей лейтенантось ульнесь казезь «Якстере теште» орденсэ. Мироновнень максть майоронь звания ды путызь сядо кемгавксовоце стрелковой полконь артиллериянь начальникекс. Мейле, сонзо фронтовой биографиясо ульнесть Сталинград ошонть кис тюрематне. Тесэ майорось примась апелема прявт арсема. Сон путызе эсь полконть артиллериянть прямой наводкас ды массированной толсо тапизе ятонть передовой отрядонзо, конась снартнесь леенть печтеме. Неть тюрематнесэ колоньгемень сисемеце гвардейской дивизиясь почти весе тапазель, Мироновонь атиллерийской полконть эйстэ, лиядсть ансяк вейксэ боецт командирэнть марто. Но позициятнень кияк эзинзе кадо. Зярдо Сталинград ошонть ало минек ушмантнэ сыргасть эртемас, дивизиянть лиядкстнэнь кучизь переформированияв. Тунда, тёжа вейксэсядт ниленьгемень колмоце иестэ, Мироновонь путызь Степной фронтонь васенце механизизированой корпусонь артиллериянь штабонь начальникекс. Воздушной десантникесь путсь прязонзо танкистэнь шлемофон. Тёжа вейксэсядт ниленьгемень колмоце кизэстэ сон Курской Дугасо. Миронов планировась тюрематнесэ артиллериянть тевс нолдамонзо покш эртемань операциятнеде икеле. Те весе максь танкистнэнень ды минек пехотантень удаласто, аламо ёмавкс марто, икелев молеме. Медь ковсто, тёжа вейксэсядт ниленьгемень нилеце иестэ, васенце механизированой корпусось, ютась весе Белоруссиянть пачк. Олякстомць оккупантнэнь эйстэ сядодо ламо велеть ды ошт. Сынст ютксо истят оштне кода-Слуцк, Березы, Жабинка. Корпусонть икеле ульнесь путозь задача: кирдемс толсо дивизиятнень Брест ошонть олякстомсто. Тёжа вейксэсядт ниленьгемень васенце иестэ саезь, Вениамин Борисович ютась покш ды пек стака ушманонь ки. Сонзо воинской талантозо ды пурнамонь ёрокчизэ невтизь пряст Белорусской эртемань операциясонть, зярдо тапасть фашистской ушмотнень Жлобинасто саезь Брест ошонтень, Пиньской нупоньчейтнень ютазь. Неть тюрематнень кис Миронов ульнесь казезь Отечественной войнань васенце степенень ды «Якстере теште» ордентнэсэ. Брестэнть олякстомсто саезь ды Изнямо чинть видьс, сон-колмосядт ниленьгемень сисемеце гвардейской Брестской Кутозов лемсэ орденэнь тяжелой самоходной полконь командир, конась Берлин ошонть саеманзо кис казезь Суворов лемсэ колмоце степенень орденсэ. Войнань китне лангсо Миронов вастызе и эсь вечкеманзо. Сонзо землянкас совась тейтерь солдатской шинельсэ, пряс путоманть алдо неявсть валдо черензэ, сон путызе кельмезь кедензэ пря чирезэнзэ ды мерсь: «Санинструктор, Людмила Лапина, сынь службань ютамо». Максынзе Мироновнень документэнзэ ды стакасто озась табуретканть лангс. Неявсь, што сэреди пильгезэ. Вениамин Борисовичень кевстеманть лангс, мезе теевсь пильгенть марто, мерсь, што ульнесь ранязь Брест ошонть ало тюрематнесэ. Командирэсь кевкстизе косо служась седе икеле? Тейтересь мерсь, што сась фронтов тёжа вейксэсядт ниленьгемень омбоце иестэ, комсомольской путёвкань коряс, теде икеле важодсь Кемерова ошсо, заводсо. Воевась миномётной полксо, ульнесь ранязь, лецясь Пружанасо госпитальсэ. Тень каршо подполковникесь мерсь, што тесэ, миномётной полконть коряс, седе стака. Самоходкатне а аштить пехотанть мельга боевой порядкасо, сынь сезневитькак ятонь ёно. Тейтеренть чама тюсозо казямолгадсь: «Содан. Мон монсь вешия прям тынк полконтень». Тесэ штабонь начальникентень марявсь, што сон уже некшнизе те тейтеренть, мерсь теде сонензэ. «Истя улияк, товарищ подполковник»-пшкадсь санинструкторось-«Лецтятадо, кода уинек Днепра леенть трокс, Мишурина Рогонть маласо. Немецтне бомбасть берёконть, тынь валявиде моданть алов, а мон тынк таргидизь». «Да, лецтия! Тынк марто ещё ульнесь покштояк-покш санитарной сумка. Мезе ансяк тынь тозонь путниде?». Тейтересь гайтевстэ раказевсь: «Кши, товарищ командир! Ведь тюрематнесэ эрьва мезе эрси, а содат козонь понгат, аволь свал ваксот ушманонь кухнясь карми». Сынь кувать кавонест лецтнесть Днепра лангсо тюрематнень. Кода ютасть Днепра чирестэ, ялга, тапазь машинатнень каднызь печтема тарканть вакс, кода понгонесть бомбёжка алов. Мейле тейтересь кортазевсь, што сех стака ульнесь Брест ошонть ало, зярдо сынь пурнызь тюремань паксястонть весе ранявозетнень, груздизь сынст бронетраспортёрс, ютасть танктнень мельга. Танктне немецень окоптнень ютызь, а бронетранспортёрось понгсь противотанковой мина лангс. Санинструкторонть ёртызе кемень метрадо ламо ве ёнов, а ранявозь боецтнэ весе маштовсть. Людмила Лапина таргась тюремань паксятнестэ ведьгеменде ламо ранязь боецт, кавксть ранявкшнось сонськак. Сон и карми Мироновонь козяйкакс. Вейсэ сынь кастыть кавто цёрат ды вейке тейтерь. Но те шкантень эряви ютамс еще ламо войнань китнева. Висласто саезь Одер видьс. Сеземс ятонть оборонанть. Помераниясто саемс Зееловской высотатнень. Чады ковонь комсь васенце чистэ, тёжа вейксэсядт ниленьгемень ветеце иестэ, Мироновонь полкось ёндолксонь каявомасо, вийсэ, совась Берлин ошонтень. Ки лангост пекстазель баррикадасо, конань ве ёнксозо нежедсь противотанковой ровс, а омбоцесь эрькес. Кавто самоходкань толсонть баррикадась эзь калавтово. Миронов сайсь решения, теемс «Таран». Нярыя вачкодемадо мельга баррикадась лондадсь. Берлинэнь, метронь вейке станциянь саемсэ, Миронов ульнесь ранязь керш пильгес, полковой врачось бойкасто тапаризе пильгенть ды полконь командирэсь таго уш тюрематнесэ. Чады ковонь комсь сисемеце чистэ Мироновонь полкось пачкодсь Тиргартен парконтень, а мейле Рейхстагонтень. Цвети ковонь колоньгемень васенце чистэ, тёжа вейксэсядт ниленьгемень ветеце иестэ СССР- нь Верховной Советэнь Президиумонь Указонть коряс гвардии подполковникентень Вениамин Борисович Мироновнень максозель Советской Союзонь Героень лем. Сон ульнесь Изнямонь парадонь участник. Войнадо мельга лиядсь служамо армияс. Запасос лисемадо мельга важодсь Саранск ошонь комсеце школасо военрукокс. Эрямосто туемадо мельга те гимназиянтень максозель сонзо лемезэ. Истя жо ошонть вейке курось канды Мироновонь лементь. Т.В. Чиндяйкина - н. сотрудник Мемориального музея. |
