Кода сонсь Иван Егорович евтни: «Мон чачинь 1924-це иень ноябрянь 20-це чистэ Ицялонь райононь Ламбаське велесэ, крестьянинэнь семиясо. Тетям, Егор Герасимович васня ветясь эсензэ хозяйствань тевть, мейле жо, зярдо теевсь колхоз, кармась роботамо ветсанитарокс. Тевензэ содылизе пек парсте, путсь эйзэнзэ весе седеензэ, ды секс, нать, велесэнек нейгак, хоть умок уш кулось, лецтнить эйсэнзэ паро валсо. Авам, Аннав Никитична, весе пингезэ печтизе кудоютксо тевень теезь. Сон ульнесь пек весела ломанекс, вечксь пеетькшнемань тейнеме, содыль ламо морот ды морсекшнесь аволь ансяк праздникень столь экшсэ, но тевень теемстэяк. Морамо сон маштыль, вайгелезэ вадряль. Лайшильгак парсте…». Седе тов Иван Егорович лецтни, кода сон вечкась эйкакш пингстэ стихень ды евтнемань ловномо. Шкань ютазь сон чарькоди, что чтихтне ловновить аволь кода ёвтнематне, сынь гайгить ды келесткак седе мазый. Стихень сермадомо ушодсь 13-14 иесэ. Васняяк, васенце тонавтяцянзо стихень сермадомсто, лови аванзо. Сонзэ пельде сась стихень музыкань ды моронь вечкемась. Зярдо сакшнось велев И.Яуше, морсесь мартонзо омбоце вайгельсэ. Шумилкинэнь васенце стихензэ («Лейне», «Теле») печатазельть 1940 иестэ «Пионерэнь вайгель» журналсо. Васень стихтне кандсть авторонтень а ёвтавикс кеняркс. Нать, а стяко тиринь келень ды литературань тонавтыцясь Григорий Егорович Яушев шнась Шумилкинэнь стихень складямонь терявтнемтнень ды кода маштсь путсь превс. А стяко А.Мартынов поэтэсь сермасонзо кучиль ушодыця авторонтень кемема валт! 1942 иестэ, средней школань прядомадо мейле сеске, Шумилкин саезель войнав. Кавто иеть ульнесь фронтсо: васня – Северо-Западнойсэ, мейле – Васенце Украинскойсэ. Артиллерист. Казезь боевой орденсэ. Войнань толось ды качамось течис а стувтневить. 1944 –це иестэ Шумилкин ранявомадо мейле, косо емавтызе сельме вановтонзо, нолдазель кудов беряньстэ неиця сельмень коряс. 1944-1948 иетнестэ Шумилкин важоди школасо. 1950 иестэ прядызе Саранской учительской институтонть. 1958 иес Иван Егорович Ламбаськень средней школасо ветясь тиринь кель ды литература, рузонь кель ды литература. Теде мейле зярыя иеть важодсь библиотекарекс. Велень эрицятнень ды школьниктнень марто тейнесь вастовомкат эрзянь поэтнэнь ды прозаиктнень марто: А. Мартыновонь, И. Кривошеевень, И. Прончатовонь, А.Щегловонь, Н. Эркаень. Покш кеняркссо велень эрицятне вастневсть И. Яушевень морыцянть ды В. Горбунов профессоронть марто. Иван Егорович лови эсь прянзо уцяскав ломанекс секс, што чачась-кассь се велесэнть, косто лист истят содавикс ломанть,кода филологический наукань докторось, В.В. Горбунов профессорось; А.П. Рябов-ученоесь – лингвистэсь, кона аштесь эрзянь языкознаниянть ушодовомсто; МАССР-нь народной артистэсь, РСФСР-нь Заслуженный И.М. Яушев артистэсь; поэтэсь – фронтовикесь И.Н. Прончатов. И.Е. Шумилкинэнь васенце сборникезэ лиссь 1952-це иестэ. Лемезэ «Минек морось». Седе мейле ловныцятне мельспаросо вастынзе истят книганзо,кода «Баснят ды Стихть» (1958), «Ежов осёл» (1966), «Сардот» (1971), «Ине вечкема» (1974), «Телень инжесь сась…» (1977), «Коза в саду» (1985). Сехте вадря стихотворениятне пурназь «Ине вечкема» сборникентень, кона теевсь содавиксэкс эрзянь поэзиясонть. Эряви евтамс сень, што Иван Шумилкин кода поэт лиссь Великой Отечественной войнастонть. Сонзэ перть-пельга ванома смустезэ кемекстазь се толсонть конань пачк ютась сонсь. Сонзэ вановтозо эрямонть лангс сюлмазь войнань пежетьстнэнь марто. Истят мельс прат аволь ансяк Шумилкинэнь поэзиянь ловнозь. Тенень кемевтить весе минек поэтнэ, конат ютызь од шкастост войнанть, - И.Девин, С. Вечканов, И.Прончатов, А.Малькин, И.Пиняев, М. Бебан, А. Щеглов, Е.Пятаев ды лият. И.Шумилкинэнь стихензэ ды баснянзо печатазельть фронтовой печатьсэяк. Васенце стихотворениянть, кона ульнесь сермадозь фронтсо, ульнесь лемезэ «Сёксень ве». Конань эйсэ ёвтни авадонзо, кона ильтизе цера –эйкакшонзо войнав, ятонть каршо тюреме. Шумилкнэнь войнань шкань стихтнень ловнозь, ютат поэтэнть марто кияванть, кона вельть стака ды зыянов. Авторось бажи невтемс солдатонь седеенть, конань эйсэ лангс ванмс арась кодамояк героизма. Вана лепамсь аламос боесь. Летьке окопсонть теевсь кодамо-бути чавонь сэтьме. Сельмензэ иекеле вельмить родной чаматне: авзо, велень шабратне, оянзо, малавикс ломанензэ, чачома велесь: «Козонь кадовсь монь валдо эйкакшчись. Родной кудом. Конань чевте элезэ ды тантей Салсо почодозь кшись». Седе тов… Лотки поэтэсь солдатонь калмонь вакс ды арсезеви маштозенть уцяскадо. Кодамоль ломанесь?. Костонь сон? Зяро иензэ? Сайсы ютыцясь эсь прясто пилотканть, сюкони ды евтасынзе меельце валонзо маштозентень: Ней удок. Мон таго чивалгомав, Ков тоньгак ветясь войнань покш кись,- Од тюремас, рунгонь апак комавт Од поранок, Родинанок кис. И. Шумилкинэнь войнань шкань стихтнень эйстэ неяви весе эрямо кизэ: войнав ильтямозо, войнасо воевамодо ды ялгаксчиде, ранявомадо ды кудов велявтомадо . Стихотворениядо башка Иван Егорович Сермадсь басняткак. Баснянь сермадыцятнеде аволь ламо. Те колчись сеетьстэ а вастневи. Минек литературасо баснянь сермадыцятнень ютксо истят автортнэ, кода М. Бебан, И. Батяйкин, П. Бардин. Седе чуросто вастневить баснят лия поэтэнь творчествасояк. Иван Шумилкин баснянь сермадомо кармась ведьгеменьце иетнестэ ды сермадсь пингензэ перть произведениятнень домкалгавтозь ды келейгавтозь. Ловнат Шумилкинэнь баснянзо ды дивас прат: кода сон машты ёвтамо мелензэ-превензэ Поэтэнть сельме икеле юты велень весе эрямось, ды сон седеень сэредькс марто редясы, кода колавить эрямонь вадря койтне ды тарказост чачи вейсэнь тевтнестэ перьгедемась. Неень шкане раськень эрямосто нардазь нардавсь вейсэнь лувонь зэмесь. И. Шумилкинэнь баснясь – минек литературасо пек неявикс енкс. 1968-це иестэ И. Шумилкин совась СССР-нь писателень Союзонтень. Васняяк сонзэ документнэ якасть ве кабинетстэ омбоцес секс што, кие буди мерсь, што «баснописецэсь - те аволь писатель». Киненьгак эзь кемеви, што велень учителесь сермады истят баснят эрзянь кельсэ. Теде кармась содамо С. Михалков СССР-нь писателень союзонь прявтось. Михалков пшкадсь И. Шумилкинэнь кисэ паро валт ды Иван Егорович ульнесь совавтозь писателень союзонтень. Ламоксть сонзэ тердекшнизь эрямо Саранск ошов важодеме книжной издательствасо, газетань редакциясо. Иван Егорович еь сельмезэ эз сявадо ошонь эрямонть лангс ды кадовсь чачома велезэнзэ. Учителекс важодсь 1974-це иетнень видьс. Мейле зярыя иеть роботась школань библиотекасо. Сонзэ приоизведениянзо печатазельть центральной журналсо «Дружба народов», «Нева», вейсэнь сборниксэ ды тонавтнемань учебниксэ. И.Е. Шумилкинэнь произведениянзо совасть « мокшэрзянь литературань «сырнень фондс». Кода поэт-фронтовик казезь зярыя боевой, 1985-це иестэ макссть тензэ Мордовиянь культурань заслуженной работникень лем. И.Е. Шумилкин кулось 2006-це иень мартонь 25-це чистэ. Г.П. Евстигнеева - н.сотрудник музея А.И. Полежаева.
| 
