Иван Алексеевич Гусев чачсь якшамо ковонь кеветееце чистэ тёжа вейксэсядт комсь кавтовоце иестэ Сабанцеле велес покш дружной семияс. Тетязо-авазо важодсть колхозсо, трясть сисемь эйкакшт: ниле церат ды колмо тейтерть. Тетянстэнь прасть ламо стакань кандомат. Гражданской войнасонть сон воевась Якстере Армиясо. А мейле ульнесь раскулаченной эсь кудостонзо. Семиянзо марто тусь Кавказов. Ваня лиядсь деданзо ды бабанзо марто Сабанцеле велес, совась школав васенце классос. Тёжа вейксэсядт колоньгемень иестэ Иван Гусев пряды сисем классонь школанть ды туи тонавтнеме Ичалкав педучилищав. Студенческой иетне сех стакат, но и сех интереснойть эрьва студентэнь эрямосонть. Зачёт, конспект, экзамент, ялгаксчи и – васень вечкемась. Ичалкасо тонавтнемадонзо ванстовсть дневниксэ сёрмадовксонзо, васень сёрмадовксось сёрмадозель эйзюро ковонь ветеце чистэ тёжа вейксэсядт ниленьгеменце иестэ. «Течи якинь Кемляв- сермады Ваня- Раминь дневник, штобу мезеяк сёрмадомс эсь эрямодон, ёжомарямодон, седеень ризнэмадон. Мон те ланга умок арсинь, ды кода-бути свал стувтовиль, секс те шкас мезеяк эзинь сёрмадо. Ёмавтынь ламо шка. Мезеяк а теят! Кода мерить: Мезе озонть лангсто прась-те и ёмась! Мекс мон карминь ветямо дневник? Те монь эсень седей мелем ды ещё вейке тейтерень превс путомазо. Эсь мель арсематнесэ мон ломанесь лезксэнь а вешиця, а превс путомась кармась улеме тувталокс, штобу ветямс дневник. Итак, поздоровт тенть, товарищ Гусев, од тевень ушодоманть марто! Арсян а кадомс сонзо!» Ваня ульнесь мельс прыця, паро эстензэ ды лиянень арсиця од цёра. Эйзюро ковонь кеменце чись: «Ловнан Ключевскоень историясонзо, конась алтазь университетэнтень, но мон чаркодян эйсэнзэ. Мон марян, если бу поступавлинь университетэв исторической факультетс, то а лиядовлинь лиятнень эйстэ. Но монь арасть истят условиян. Педучилищасо тонавтнемс мольсь мелем, бажавлинь прянек-мезнек каявомс покш важодемас, сестэ бу стувтовлинь эсь мель-арсемам ризнэмам ды тошначинть. Или бу максовольть библиотека эрьва кодамо книга марто.» Эйзюро ковонь кемвейксэеце чи, «Течи ловнынь книга, арсинь ланганзо. Якинек педпрактикав. Эйкакштне рудазовт, розбойничить. Мон вечкан эйкакшт, но цидардан ли важодемс мартост? Мон охотна кармавлинь бу тонавтомо Сабанцелень начальной школасо.» Шкась юты бойкасто прядовсть тонавтнемань иетне. Панжи ковонь комсь ветеце чистэ Иван Гусев сёрмады меельцеде эсь дневникезэнзэ, теньсэ сон теи черта эйкакшпингенть ды од поранть ютксо. Теке иестэнть сон поступась педагогической институтов Пятигорск ошсо. Сась аштем ковонь комсь кавтоце чись. Войнань васень минутатнестэ саезь кармасть маштовомо ломанть. Ятось чалксесь минек моданть, кандсь покш зыян, сэредькс ды покордамо. Кода алкуксонь эсь масторонь патриот Иван Алексеевич Гусев эзь карма тонавтнеме эсь пединститутсонзо. Сон неи и чарькоди, што ятось аволь ансяк наглой ды важов-ёжов, но и пек виев. Фронтонтень эрявить смелой ды превей ломанть, сон сёрмады заявления штобу сонзо кучовлизь Камышинской танковой училищав. Тонавтнемась ютась апак нее, бойкасто. Сон сёрмады кудов сёрма: «Поздоровт, монь вечкевикс ломанень! Кучан тенк пси сюкпрянь ёвтамо, арсян парочи тынк эрямос. Прядовсь училищасо тонавтнемась. Максть кедезэнек аттестат, лангозонок од оршамопель. Миненек овсе аволь жаль, тутанок те ошонть эйстэ, секс што минек икеле панжовить од перспективат!» Таштам ковонь комсь васенце чистэ, тёжа вейксэсядт ниленьгемень омбоце иестэ, Иван Алексеевич сёрмады, што сонензэ максть звания-лейтенант, танкист. Эрьва ковсто сон сёрмады сёрмат кудов. Чады ковонь сёрмасонзо ёвтни ялганзо ланга, кодат весе одт, дружнойть ды энергичнойть. Стакачитне, ятонь каршо тюремась, сюлмась эйсэст вейкень коллективс. Тесэ эрьва кодат национальность: и рузт, и эрзя марто мокшот, еврейть, грузинт,украинецт ды лият. Панжи ковонь сёрмасонть сон тешксты: «Эрян вадрясто, оршазян, андозян. Ламо важодтяно, весе шкась туи машинанть ремонтировамос ды сонзо ваньскавтомас. Ялган пейтькшнить: «Урьвакстыть, Иван, стальной «Танюша» лангс, сон тонь ковгак а нолды.» Весе частнэ ютыть машинатнень кувалт мелявкснэс. Маднетянок овсе чокшне, пек сизетяно, но содасынек, што теинек покш ды стака важодевкс. Седеесь пешкеди кенярксто ды каштанчиде. Те сех паро минутатне. Остатка сёрмасонзо Гусев сёрмады: «Шумбрчи тетяй ды авай! Пси поздоровт тенк! Тынь вештядо, штобу мон седе ламо сёрмадовлинь эсень ланга! Мезе сёрмадомс тенк? Ламо минек масторонь ёнкстнэсэ мон ульнинь. Арднинь эрьва кодамо автомашинасо, ялга онкстнинь сэтьме Дононь ён ёнксонзо. Ардтнинь поездэсэ, укшнынь параходсо, вастневинь ломань марто весе масторонть перть пелькстнэсэ. Неинь и берянь и вадря. Кода ламо мон бу аволинь эрьва кува яксе, монь икелев стиль истямо арсема: «Россиясь а изнявиця, сонзо перть-пельксэнзэ а кутмордавить, ды арась истямо вий, конась саевлизе бу сонзо кедь алов!» Кемгавтовоце медь ковонь чись совась историяс. Те чистэнть Прохоровка веленть чиресэ ютась сех покш танконь тюремась. Улить минек Россиянть историясонть сядо покш изнямот, ды ансяк колмо тюрема паксят - Куликовской, Бородинской ды Прохоровской. Орудиятнень зэрьнемадо, снарядтнэнь ды бомбатнень сезневематнеде, мотортнэнь урномадо, гусеницатнень лязгаемадо-соракалесь и коштось и модась. Истямо обстановкасо тюреманть ветямс машсть ансяк ёроков командиртнэ. Советской Союзонь Героесь, запасонь полковникесь Шкурдалов лецтнесь: «Мон ульнинь ротань командирэкс, вадрясто содэлия колоньгемень нилеце танконь экипажонть. Танкось свал ульнесь асатыкстэме. Гусевень экипажонть сеедестэ путнизь примерэкс лия экипажтнень икелев. Иван редявсь содыця танкистнэнь ютксо вадрядояк вадрякс тевень вечкемасо, тевень содамосо. Сонзо экипажонть танковой бригадасонть пек вечкелизь. Те ульнесь эрьгелиця , дружной, кеме, эрямонь вечкиця од цёрат, конатне свал ульнесть анок самс эсь ялгаст туртов лездамо. Секс нать контрнаступленияв сыргась мартост батальононь командирэсь Скрипкин. Кемень часто ушодсь тюремась, конась мольсь позда чокшнес. Командирдэнть башка экипажонь составонтень совасть мехаикесь-водителесь Николаев, стрелокось-радистэсь Зырянов, зарядицясь-Чернов. Вот уш лепштязь колмо противникень толонь точкат, изнязь тапазь ламо солдат ды офицерт. Апак учо танкось соракадсь виев эртевемадонть ды лоткавсь. Снарядонь осколкасо ранязель батальононь командирэсь. Николаев Зырянов марто таргизь сонзэ танкстонть, Гусев ды Чернов качамонть потсо лепиякшнозь леднесть фашистнэнь лангс. Танкистнэ кандызь командирэнть снарядонть воронкас, снартсть тапарямс рананзо, те шкастонть вейке немецень танкось сырнась воронканть ёнов. Васенцекс сонзэ редизе Гусев, кавксть ледсь ятонь танконть енов, «Тигрась» велявтызе башнянзо ды тоже кармась леднеме. Комбатось, Зырянов, Николаев ды кавто медсестратне, конатне чийсть лездамо, понгсть стака обстановкас. Николаев- водителесь ёртозь-ёртовсь палыця танконтень ды ёмась потмозонзо. Ютасть нярыя секундат, палыця тол потсо танкось сыргась таркастонзо, покшолгавтызе молема виензэ. Гусев – лейтенантось макс приказ: «Саша, минь сыргинек таранов!» Те команданть маризь рациянть пачк лия танконь экипажтнэ. Шлемофонцо каявсть танкистнэнь остатка валост: «Простямизь, мольтяно таранов!». Теке чистэнть, чокшне ланга, боевой ялгатне таргизь палозь танкистнэнь ды калмизь Прохоровка веленть малас. Медь ковонь кемголмовоце чистэ тёжа вейксэсядт ниленьгемень колмоце иестэ сядо кавксоньгемень васенце танковой бригадась ютавць митинг. Боевой ялгатне алтызь пряст пандомс ятонтень кежест, конатнень кувалма маштовсть Николаев ды Гусев. Медь ковонь кеветееце чистэ Иван Алексеевич Гусев экипажонзо марто ульнесь представленнойкс Советской Союзонь Героень лемс (посмертно). Но лемесь ульнесь апак максо. Ды только ведьгемень кавто иеде мельга Иван Алексеевич Гусев ульнесь казезь Отечественной войнань васенце степенень орденсэ. Подготовила Т.В. Чиндяйкина.
| 
