Солдатонь ават - Статьи Мемориального музея -  - Каталог статей

Васовдояк васов туить ютазь пек стака Ине Отечественной войнань иетне. Ламось полавтовсь масторлангсонть ютазь шкастонть, но зярдояк а лавшолгады мельявовомась казямо военной иетненень. «Авань подвиг Ине войнань иетнестэ? – Мейсэ сон ашти?». Войнань шкасто ламо минек масторонь раськетне, аватне, ёмавтсть Ине войнань фронтонь паксятнес весе или знярыя эсь цёраст.
Солдатонь ават!... Ламо сёрмадозь, евтазь паро ды виде валт воинтнэде – рядовойтнеде ды Изнямонь маршалтнэде. Сюкпря тенст! Но улить ломанть, кинь подвигест лияды сулей ало. Неть ломантне эсть кайсевть амбразура ды ятонь доттнэ лангс, эзть кучне палыця самолёт противникень колонна лангс. Не солдатнэнь ават! Стака ды лиясто трагичной уцяска прась сынст долязост. Кастасть – трясть эйкакшт, ильтясть сынст бойс, а сынсь эсь прянь апак жаля важодсть кедень апак путо, оймсемань апак сода, шкань апак ловно. Ды учость сёрмат. Миненек мик арсезевемскак те ланга стака, кодамо покш седейнилькс ды теке шкасто кодамо тандадома марто ванось авась почтальононть лангс, зярдо сон таргиль сумкастонзо сёрма: «Мезе те? Сёрма ? Похоронка?». А вишка эйкакштне эрявить андомс, секс эряви важодемс - ды цела пандо зыянт: «Кие марто сынст кадомс? Кие сынст мельга карми ваномо? Кие сынст андсынзе?». Войнань шкасто если а шкастонзо молят важодеме, эли туят седе шкадо икеле –те кармиль уголовной преступлениякс, кода и пурназь паксятне лангсто апак пурна товзюро прятне, конатнень зепесэст кандылизь кудов вачо экакштненеь аватне. Те весе эрьва чистэ, эрьва чассто арселизь аватне, кинь цёраст те шкастонть могли бу ранямс или чавомс войнань фронтнэсэ. Ды кие мери, што те аволь подвиг? Кода тесэ а лецтясыть Блокадной Ленинградонь аватнень. Тёжат ды сядо тёжа ават, сынсь кулыльть вачодо, но остатка кши кусканть максылизь эйкакшост туртов, пандсть эсь эрямост тень кис, штобу эряволь эйдесь!
Кодамо ульнесь аватнень доляст, конатне кородовкшность, лиядокшность оккупированной территорияс? Кодат покордамот ды нарьгамот савкшнось ютавтомс аватненень, штобу ванстомс эсь эйкакшонть эрямонзо, секе шкастонть содазь, што тонть ды тонть эйденть могут немецтне хоть знярдо чавомс.
А ней давайте лецтясынек войнань поездэтнень, конатне узксть эвакуированнойтнень: ламот ульнесть ютксост эйкакш марто ават. Мезе ланга сынь арсесть те шкастонть, зярдо эйсэст ускильть апак сода ков? Конешна же сынь васняяк арсесть эсь эйкакшост кувалма, косо ды кода сынь кармить эрямо, кода сыненст максомс кудо потмонь лембе? Икелест ульнесь ансяк а содамочи! А тесэ ещё ятонь самолёт бомбить поездэнть! Эрьва авась эсь рунгосонзо кекшелизе эйкакшонзо, штобу сон а понговоль ранямс или жо маштомс. Ды те ли аволь Подвиг?
Россиясо авань лемесь ды сонензэ кандовомась свал ульнесь кеме. Но минек ледстневема визьксэкс, ашти се, што аламо неть аватнеде, конатне ёмавтызь войнань ки лангтнес весе или нярыя цераст, достойна пингеде-пингес ванстовить раськетнень мель ёжосо. Истямо чуронь явовксокс ашти мемориальной комплексэсь «Материнская доблесть» Самарской ёнксонь Алексеевка посёлкасо, конась алтазь Володичкина Прасковья Еремеевнанень. Мемориалсонть невтезь авань бронзовой скульптура, конань вакссо аштить вейксэ бронзовой каргот гранитной стелла лангсо, сынь тешкстыть аванть вейксэ цёранзо. Прасковья Еремеевнань кото цёратне маштовсть Ине войнань фронтнэс. Колмотне кулость седее тов, войнань ранатнеде. Авастень сынь эзть учово, сонзо седеезэ эзь цидярдо котоце похоронканть самодо мельга , Прасковья Еремеевна кулось. Володичкина Прасковья Еремеевна казезель «Мать-героиня» васенце орденсэ.
Анна Савельевна Алексахина, сон чачтась кемень эйкакшт. Ине войнань фронтов саезельть кавксотне. Нилетне маштовсть ятонть марто тюрематнесэ. Степанова Епистимия Федоровна - сонзо кото цёранзо эзть велявто Ине Отечественной войнань тюремань паксятнестэ. Куломадо мейле ульнесь казезь Отечественной войнань васенце степенень орденсэ. Николаева Татьяна Николаевна Чувашиясто, истя жо максь эсь масторонть идеманть кис кото цёрат - кавксо цёрастонзо. А ёвтавить зняро ещё истят апак содань аватнеде-героинятнеде кадовсть цёрасстомо Ине Отечественной войнань шкатнестэ.
Мель туиця уцясказо ламо эйкакш марто Великановонь кудораськенть. Ине войнань васенце же читнестэ вете ялакстнэ тусть фронтов: Григорий, Александр, Василий, Иван ды Алексей. Сынь весе чачсть Октябрьской райононь Грибоедова велес. Тетяст - Великанов Иван Иванович Васенце Мировой войнань участник. Кулось войнань ранатнеде. Аваст - Великанова (Ганюшкина) Лукерья чачсь Пензенской губерниянь Саранскоень уездэнь Горяновка велес. Ульнесь домохозяйкакс. Кастсь-трясь вете цёрат.
Великанов Александр Иванович чачсь тёжа вейксэсядт колмоце иестэ Пензенской губерниянь Саранской уездэнь Грибоедова велес. Тёжа вейксэсядт комсь сисемеце иес важодсь тетянзо хозяйствасо. Комсь сисемеце иестэ саезь комсь кавксовоце иес служась Саранск ошсо милициясо. Мейле сась эсь велезэнзэ, косо ещё кемень кудораське марто тейсть – пурнасть колхоз «Кемголмово иеть Октябрянтень». Ульнесь бригадирэкс, мейле председателекс, Грибоедова велень сельской Советэнь председателекс. Кавксть ульнесь Республиканской сельскохозяйственной выставкань участникекс. Ветясь пек покш важодевкс: велень од ломантнень направась важодеме рабфаков. Тёжа вейксэсядт колоньгемень сисемеце иестэ тусь эрямо Саранск ошов, важодсь робочеекс Елховкань тувонь совхозсо, мейле Саранск ошонь здравохранениянь отделсэ завхозокс. Якстере армияв саизь тёжа вейксэсядт ниленьгемень васенце иестэ, таштам ковсто. Тюрсь ятонть марто Москов ошонть кис сражениятнесэ. Воевась миномётчикекс. Ульнесь стакасто ранязь кедьс, сисемь ковт лецясь госпитальсэ. Мейле служась Калинковической пехотной училищасо, конань частензэ аштесть Саранск ошсо. Тёжа вейксэсядт ниленьгемень ветеце иестэ ульнесь демобилизовазь. Войнадо мейле важодсь механической заводсо. Сонзо ульнесь трявкс тейтерезэ, чачомсто-Пупина Елизавета Семёновна. Сон сермадсы сонзэ эсензэ фамилияс-Великанова-ды эсь лемезэнзэ-Елизавета Александровна. Лизань тетясь-Пупин Семен Петрович ульнесь царской Армиянь прапорщикекс. Воевась Васень Мировой войнань фронтнэсэ. Тёжа вейксэсядт кемгавксовоце иестэ демобилизовась фронсто, урьваксь ды тусь воевамо Якстере Армияв. Якстере Армиянь частне марто пачкодсть Томск ошонть малас. Тесэ белогвардеецтнэнь марто тюрематнесэ сон чавовсь. Лиза чачсь, зярдо сон служась Тухачевскоень Армиясо. Лиза пряды Грибоедова велень средней школа. Рана кармась колхозсо важодеме-тракторсо плугарекс. Тёжа вейксэсядт колоньгемень котоце иес важодсь колхозсо: нусь товзюро, ледсь тикше, кодась пулт, пурнась эмежт, потявтсь скалт, усксесь лишмесэ зёрна. Эрьва иестэ теиль нилесядт-ветесядт трудоденть. Тёжа вейксэсядт колоньгемень сисемеце иестэ Саранской ошсо пряды продавецэнь курсат ды карми важодеме торговлясо. Зярдо ушодовсь Ине Отечественной войнась сон триця тетянзо мельга веши пря фронтов. Лизань направасызь военизированной охранас колонияс-стрелококс. Тёжа вейксэсядт ниленьгемень омбоце иестэ топавцызь сонзэ мелензэ ды сонзо кучсызь Казань ошонь вишка командирэнь училищав. Училищань прядомадо мельга старшей сержатонь званиясо сон туи фронтов. Демобилизациядо мейле важодсь Саранск ошсо.
Великанов Григорий Иванович чачсь тёжа вейксэсядт кавсоце иестэ. Зярдо кулось тетязо сонензэ ульнесть кемгавтово иеть. Васня сон вансь велень стада, колхозос совамодо мельга кармась ваномо колхозонь стада. Ульнесь пек эрямонь вечкиця, эргелиця, пейдиця ломань. Вечкиль частушкань морсеме. Тусь фронтов войнань васенце читнестэ. Маштовсь Москов ошонть кис тюрематнесэ. Сонзо козяйказо Великанова (Вилкова) Дарина кулось войнанть прядомадо мейле. Тетявтомо ды ававтомо лиядсть колмо цёраст: Николай, Александр ды Виктор. Кайсть пельс вачо ды пельс штапо. Коля вансь колхозонь стада, Саша маштовсь кемгавксово иесэ армиясо служамсто.
Великанов Василий Иванович чачсь тёжа вейксэсядт кемгавтовоце иестэ. Кайсь тевень вечкиця ды важодыця цёракс. Гражданской войнань стака иетнестэ лездась аванстэнь трямс-андомс покш кудораськенть. Вишка пингстэ уш маштыль парсте карень кодамо. Микшнесь сынст Саранскоень базарсо. Ярмакне лангс рамиль кши, сал, керосин, сапунь ды оршамопель. Мейле сон пряды бухгалтерэнь курсат. Армиясо служась Дальней Востоксо. Сась армиясто войнань ушодомадость икеле. Важодсь «Пищевик» артельсэ бухгалтерэкс. Фронтов саизь тёжа вейксэсядт ниленьгемень васенце иестэ, аштем ковсто. Ютась войнань китнева педе-пес. Ульнесь демобилизовазь тёжа вейксэсядт ниленьгемень сисемеце иестэ, капитанонь званиясо. Тёжа вейксэсядт ведьгемень кавксоце иесэ кулось.
Меельце Великанова Лукерьянь цёрась – Иван, чачсь тёжа вейксэсядт кемготовоце иестэ. Лиядсь тетявтомо ниле иесэ. Прядсь Грибоедова велень школань сисемь класст. Мейле Саранской ошонь шоферэнь курсат, лездась аванстэнь Алексей ялаксонзо трямсто – кастомсто. Важодсь Саранскойсэ консервной комбинатсо шофёрокс. Якстере Армияв саизь тёжа вейксэсядт колоньгемень вейксэце иестэ. Финской войнань участник. Войнадо мельга частенть, косо сон служась кучсызь Белоруссияв, Слуцк ошов. Служась шофёрокс, остатка сермазо, Алексей ялаксонзо туртов, кучозель аштем ковонь комсеце читнестэ, тёжа вейксэсядт ниленьгемень васенце иестэ.Сон сёрмады, што туить леднеме кизэнь стрельбищав, а сексня сон велявты кудов. Офицальной похоронка семияс кучозь арасель. Иванонь однополчантнэ евтнесть, што сон маштовсь войнань васенце ковстонть. Сынь ульнесть лагерьсэ. Частень командованиясь кучизе сонзо машинасо боеприпаст мельга. Снаряд марто машинась понгсь бомбёжка алов ды тапавсь.
Ветеце цёрась - Великанов Алексей Иванович, чачсь тёжа вейксэсядт комсеце иестэ, тетянзо куломадо мейльга. Пряды сисемь класст. Тёжа вейксэсядт колоньгемень кавксоце иестэ сонзо сайсызь Якстере Армияв-Житомир ошонь вишка командирэнь училищав. Зярдо устававсь Ине Отечественной войнась сон училищань курсантонь частнень маро потасть Севастополь ошонтень. Севастополь ошонть кис тюрематнесэ ульнесь ранязь ды понгсь немецтненень полонс. Сынст панизь Норвегияв. Полонсо сынь важодсть каменоломнятнесэ. Вачо куломадость сынст ванстасть норвежэцтне: лов потмов сынь кекшилть тенст кши, кал ды консерват. Весть морянть волнатнесэ каменоломнянть малас кандовсь кулозь кит. Узниктне сонзэ веси сэвизь. Кода бу берянь эзь уле полонсо, Алексей эзь юта ятонть пелев, эсе мие эсь чачома ды касома масторонзо. Сынст олякстомтызь Советской моряконь десантось. Проверкадо мельга тёжа вейксэсядт ниленьгемень нилеце иестэ Алексей кучозель фронтов. Тесэ сон вастовсь Василий ялаксонзо марто. Войнанть прядомс воевасть вейсэ, мик пачкодсть Одер леенть ваксс. Ульнесь демобилизовазь тёжа вейксэсядт ниленьгемень сисемеце иестэ. Эрямо лияды Днепропетровск ошос. Урьваксты, важоди кузнецэкс металлургической заводсо. Тесэ и маштови тёжа вейксэсядт сизьгеменце иестэ. Заводсо сонзэ лангс пры пси металл марто болванка, конань сталмозо ульнесь вейке тонна. Калмазь Днепропетровск ошс, косо эри сонзо цёразо Великанов Александр Алексеевич. Истя прядовсь несчасиядо пешксе Алексей Ивановичень эрямо кизэ. Великановонь ламо эйкакшонь семиясь свал ульнесь вернойкс, прянек-седейнек максозь эсь тиринь масторонтень, эсь ёнксонтень ды эсь Отечествантень.
Ламо эйкакш марто аванть Власова Надежда Гавриловнань ульнесть сисемь цёранзо. Весе сынст ильтинзе фронтов. Ансяк колмотне велявтсть кудов. Лецтясынек сынст лемест: Власов Дмитрий Васильевич - ёмась кулявтомо сундерь ковонь тёжа вейксэсядт ниленьгемень кавтоце иестэ, Власов Николай Васильевич-маштовсь тёжа вейксэсядт ниленьгемень ветеце иестэ, Власовонь Виктор ды Степан ульнесть маштозь Ине войнань васень ковтнестэ, састь фронтсто - Алексей, Константин ды Александр.
Войнанть шкасто аванть подвигесь аштесь сеньсэ, што сынь маштсть ванстомс эйкакштнень, а те цела раське-тетятнеде ды аватнеде неень эриця минек народонь раськетнесэ.

Чиндяйкина Т.В.