Минек земляконок путомаст Ине Отечественной войнань фронтнэсэ - Статьи Мемориального музея -  - Каталог статей

Минь эрятано мирной шкасто, но войнань сыверькстнэ лиядсть эрьва ошос, эрьва велес, эрьва кудораськес. Тюрема таркатнева стякшность обелискат, ламо теезь мемориальной комплекст, якстере теште марто памятниктне ванстыть маштовозь геройтнень лемест. Сынь маштовсть, сынь арасть, но теке шкасто сынь весе эрить минек мельсэ ды седейсэ. Кадык минек вельде муить вайгель сынст арсемаст ды ёжомарямост. Ломантнень ледстневемат! Шкась а ашти сынст лангсо. Зняро бу иеть иляст юта, Масторонь ломантне таго ды таго кармить велявтомо минек Изнямонтень, конась тешкстызе эрямонь эргелемачисть - куломанть лангсто, превтнень - превстэ лисеманть лангсто ды ломанень вечкеманть - варварстванть лангсто. Минек земляконок сермадозь сермадызь эсь уцяскаст Ине Отечественной войнань историянтень.
Глазков Иван Павлович чачсь тёжа вейксэсядт кемнилееце иестэ Ковылкинской райононь Паньжа велес. Якстере Армиясо тёжа вейксэсядт ниленьгемень омбоце иестэ саезь.
Тёжа вейксэсядт ниленьгемень нилеце иестэ давол ковонь кемколмовоце чистэ Глазковонь кудо раськес сась стакадояк-стака куля: «Тынк мирденк Глазков Иван Павлович ожо ковонь кавксоце чистэ тёжа вейксэсядт ниленьгемень колмоце иестэ командованиянь заданиятнень топавтомань кис немецень захватчиктнень марто тюрематнесэ казезь Отечественной войнань васенце степенень орденсэ. Иван Павлович кемекстэ ванстась минек масторонть ды тапась немецко-фашистской захватчиктнень. Умарь ковонь кемнилееце чистэ тёжа вейксэсядт ниленьгемень колмоце иестэ сон маштовсь апелицянь куломасо ды калмазь Смоленской областень, Спас-Деменской райононь Субарь велес». Кудораскенть стардызе стакадояк -стака ризкс.
Лия документнэсэ Иван Павлович Глазков калмазь братской калмос тёжа вейксэсядт ведьгемень котоце иестэ Спас-Деменской районс, Буднянской посёлокс, Смоленской областес.
Ды ещё ули вейке документ, конань эйсэ сёрмадозь, што сон калмазь Куйбышевской районс, Бетлица посёлоконть малас тёжа вейксэсядт ниленьгемень кавксоце - тёжа вейксэсядт ведьгемень котоце иестэ. Истят колмо документ, конастень кемемс, кисоды?
Иванонь козяйкась – Мария трясь-андсь весе кудо-раськенть, важодсь колхозсо, ветясь кудо ютконь хозяйстванть. Стака кулядонть мельга ютась иень пертень шка. Вейке чокшнесь велявтызе весенть мекев ланг. Паньжа велес Мариянень сась сёрма. Треуголникенть панжомадо мельга сон неи, што сёрмась - Иван мирдензэ пельде. Сон жив!
Суборь велесэ тюремадонть мельга, Иван лиядсь высотанть лангс а эсь ёжосо. Сон ульнесь сознаниявтомо, контузявозь. Зярдо сась эсь ёжос марясь немецень кортамот. Тонатне сонзэ редизь ды саизь полонс. Кавсть сон снартнесь менемс полонсто. Омбоцеде снартовксозо топавтовсь. Те ульнесь Белоруссиясо. Понгсь партизантнэнь пелев, тосо сонзо лецизь. Тёжа вейксэсядт ниленьгемень нилеце иестэ знярдо минек войскатне оляксомтызь Белоруссиянть немецтнень эйстэ, Иван Павлович Глазков туи фронтов ды карми воевамо уже пулемётчикекс омбоце Белорусской фронтсо. Тюрематнесэ невти эсь прянзо кеме, апелиця солдатокс. Вейксэсядт ниленьгемень нилеце иестэ сонзэ казизь Якстере Теште орденсэ. Войнанть перть ульнесь колмоксть ранязь, пачкодсь Берлин ошонтень. Войнадо мельга сась эсь Паньжа велезэнзэ. Кулось тёжа вейксэсядт вейксэньгемень кавтоце иестэ.
Тёжа вейксэсядт ниленьгемень васенце иестэ, Ине Отечественной войнанть ушодомадо мельга минек Мордовиясо ульнесть пурназь ламо воинской формированият. Сынст ютксо сядо кеветееце соксонь батальонось, конань командирэкс ульнесь путозь Самойлов Леонид Николаевич.
Самойлов Леонид Николаевич чачсь тёжа вейксэсядт кемнилееце иестэ Саранской ошос. Школань прядомадо мельга сон тусь тонавтнеме связистэнь курсав.. Тёжа вейксэсядт колоньгемень кавксоце иестэ тусь Москово шов, тосо прядынзе ОСОАВИАХИМ-ень курсатнень. Тёжа вейксэсядт колоньгемень вейксэце иестэ сонзо саизь Якстере Армияв, тосо сон тонавтни «Выстрел» курсатнесэ. Армиясо служамодо мельга велявтсь мекев Саранской ошов эсензэ кудо-раськезэнзэ, козейкастень Екатерина Васильевнанень ды тейтерьканстэнь Изабелланень (тетязо мериль тензэ Белочка). Вишка кудо-раськень уцяскаст ульнесь аволь куватень. Ушодовсь Ине Отечественной войнась. Леонид Николаевичень саизь фронтов Саранской ошосто тёжа вейксэсядт ниленьгемень васенце иестэ, сон ульнесь аравтозь сядо кеветееце соксонь батальононь командирэкс. Те батальонось примась участия Москов ошонть ало тюрематнесэ. Фронтов пачкодемадо мельга батальонось ульнесь путозь васенце гвардейской кавалерийской корпусонтень, конань марто сынь тейсть рейд Вязьма ошонтень.
Сядо кеветееце соксонь батальонось действующей армиянь составсо официально ловови якшамо ковонь васенце чистэ тёжа вейксэсядт ниленьгемень омбоце иестэ саезь. Батальонось примась участия шоссенть кис тюрематнесэ.   Беловонь ледстневематнестэ: «Якшамо ковонь кемкавксовоце чинть ушодомсто, сядо колоньгемень васенце кавалерийской полкось, сядо кеветееце соксонь батальононть ротанзо марто апак учонь, ёндолкс атакасо тапизь противникенть боевой охранениянзо ды вийсэ совасть Трушково велентень. Гвардеецтнэ ды соксонь ротась пансть немецтнесэ эрьва кудосто, ёртнесть эйсэст гранатасо, леднесть автоматсо. Обедшкантень велесь ульнесь олякстомтозь. Минь нярыя километрань тарка пачкодинек Варшаской шоссенть малав. Ятось эзь оймак. Веленть вельксэ появасть немецень самолётнэ.   Сынь ютасть волнасо, ёртнесть бомбат. Трушкова велесэнть палсть ды каладсть кудотне. Ламо ёмавкст кандсть неть подразделениятне, конатне саекшнизь велепенть.»
Медь ковонь колоньгеменце чистэ, тёжа вейксэсядт ниленьгемень омбоце иестэ сядо кеветееце соксонь батальонось ульнесь официально нолдазь. Батальононь командирэсь старшей лейтенантось Самойлов, путозель оперативной важодыцянь должностес, колмосядт комсь вете стрелковой дивизиянь штабонь отделс.
Чады ковонь кемкавксовоце чистэ тёжа вейксэсядт ниленьгемень колмоце иестэ аляксчинь ды героизмань кис, дивизиянтень ульнесь максозь гвардейской лем ды сон кармась вейксэньгеменце гвардейской стрелковой дивизиякс. Самойлов капитанось путозель гвардейской отдельной учебной батальононь командирэкс.
Дивизиясь юты Курской битвань толонть пачк. Кирдема-кородома тюрематнесэ невтьсы прянзо   гвардии майорось – Самойлов.
«Гвардии майор Самойлов личной примерсэнзэ ды апелемачисэнзэ, маштозь ветинзе атакатнень ятонть седе ламо ды покш вийтнень лангс, не атакатне кандсть ятонтень покш ёмавкст ды зыян. Самойловонь батальонось тапась котосядт ятонь солдат ды офицерт, пултась ды тапась кемгавтово танкат ды автомашинат, правтсть   вейке самолёт.
Медь ковонь кевейкееце ды кемгавтовоце читнестэ тёжа вейксэсядт ниленьгеменце иестэ батальонось, куродомасо, ульнесь маштозь ветязь, секс сынь потавсть кото ятонть атакат, покш ёмавкст марто противникенть ёндо. Неть тюрематнень кис Леонид Николаевич Самойлов ульнесь казезь Якстере Тештень орденсэ».
Тёжа вейксэсядт ниленьгемень колмоце иестэ ацам ковсто Самойлов Якстере Армиянь войскатне марто олякстомты Белоруссиянть. Сон аравтозель командовамо ветеце гвардейской соксонь батальононть лангсо. Героизмань ды аляксчинть кис сон ульнесь представленной Советской Союзонь Героень лемс. Истя сермадозь сонзо подвигезэ: Соксонь батальононть икелев путозель истямо боевой топавтома, саемс Бычиха станциянть, керямс шоссейной ды кшнинь кинть Невель-Городок, а максомс противникентень потамс шка ды тарка. Те командованиянь заданиянть Самойлов эсь боевой ялганзо марто топавтызь. Штурмовой эртевемасо сынь саизь Бычиха станциянть ды керизь шоссейной кинть. Кавто чинь ды вень ютконь перть сынь потавсть сисемь ятонь контратакат. Самойлов сонсь ветнесь атакав сокс лангсо боецэнзэ. Сынь невтсть покш героизма ды аляксчи. Ацам ковонь кемготово ды кемсисеме читнестэ ульнесь саезь Бычиха станциясь, керязь шоссесь. Ятонь лисема кись ульнесь пекстазь. Соксонь батальонось, кавтосядт сизьгемень нилеце гвардейской стрелковой полконть марто, тапасть малав тёжа ятонь солдат ды офицерт, сайсть полонс кавтосядт солдат ды офицерт, сайсть кодгемень кавто вагонт эрьва кодамо имущества марто, кото артиллерийской складт, вете продовольствия марто складт, ламо оружия, боеприпаст ды лия военной имущества. Героизмань ды аляксчинь кис Самойлов Леонид Николаевич достоин высшей правительственной казес Советской Союзонь Героень лемс.»
Те казенть васня валкстызь колмо степенень Кутузовонь орденс, но корпусонь командирэсь, гвардиянь генерал-майорось Белобородов кепедизе Ленинэнь орденс. Но те награданть минек земляконок эзь кенере получамс.
«Боевой задачатнень топавтомсто давол ковонь сисемеце чистэ тёжа вейксэсядт ниленьгемень нилеце иестэ Леонид Николаевич Самойлов маштовсь Витебской областень Гурки районс. Героизмань ды аляксчинь кис сон улнесь казезь Отечественной войнань васенце степенень орденсэ посмертно. Калмазь Витебской областень Городок ошонтень».
Казезь Ленинэнь орденсэ, Якстере Знамянь орденсэ, Якстере Тештень орденсэ, Ине Отечественной войнань васенце степенень орденсэ.

Т.В. Чиндяйкина – научный сотрудник отдела пропаганды Мемориального музея.