Маласо Ине Изнямонь сизгемень ветеце иень тешкстамось. Иеде иес аламолгадыть Ине Отечественной войнань ветерантнэ, конатне казимизь минек Ине Изнямонь чисэнть. Шкась миненек а лоткавтови, но минек мель ёжосо ванстовить сындест ледстнематне. Минек святой долконок а стувтомс солдатнэнь ды офицертнэнь, конатне ютасть войнань толонть пачк, конатне максь миненек уцяскав эрямо. Минь ловданак эрьванть подвигензэ, эрьванть, конась кандсь эсь покш путовкс Ине Изнямонь тевентень.
Коршунов Михаил Алексеевич чачсь умарь ковонь комсь котоце чистэ тёжа вейксэсядт комсь ветеце иестэ Тамбовской губерниянь, Темниковской уездэнь Теньгушева велес. Медь ковсто тёжа вейксэсядт ниленьгеменце иестэ пряды школасо кавксо класст, поладсы тонавнеманзо ды теке шкастонть карми важодеме Теньгушева велень колхозсо. Знярдо ушодовсь Ине Отечественной войнась, васенце читнестэ саезь Миша карми вешеме пря туемс фронтов. Призывной пунктнесэ сонензэ мерильть: «Казт ещё, сы и тонь шкат». Ацам ковсто, тёжа вейксэсядт ниленьгемень кавтоце
иестэ кемень Теньгушева велень цёратнень кучсызь тонавтнеме Москов ошов пулемётно-миномётной училищав. Сынст ютксо ульнесь и Коршунов Миша.
Тунда тёжа вейксэсядт ниленьгемень колмоце иестэ Мишань нярыя курсант марто направасызь нилеце Гвардейской воздушно-десантной бригадав, конась се шкастонть аштесь Раменской ошсо. Тосо Миша вастови эсензэ велень кото ялганзо марто. Сынь весе вешизь пряст, штобу сынст путовлизь воевамо вейке взводс ды вейке ротас, вешемаст ульнесь топавтозь. Се шкастонть саезь ялгатне свал вейсэть. Войнань китнева ютасть сисемнест, Ине Изнямонтень пачкодсть – колмонест.
Гвардии красноармеецэнть Коршунов Михаил Алексеевичень ятонть марто васенце тюремазо ульнесь Днепра леенть лангсо, таштам ковонь тёжа вейксэсядт ниленьгемень колмоце иестэ. Мейле сон ютась тюрематне марто Белоруссиянть, Венгриянть, Чехословакиянть пачк.
Седе, кода ютась войнань китнень пачк гвардиянь красноармеецэсь Коршунов Михаил Алексеевич, ёвтнить сонзо боевой казнензэ: «Колмоце степенень Слава орденэсь», «Отвагань кис»-медалесь, Будапештэнь, Венань, Германиянь саемань кис медальтне, Верховной командованиянь благодарностне.
Ютась тёжа вейксэсядт ниленьгемень ветеце иесь. Эйзюро ковонь кемготовоце чистэ Советской войскатне уставизь Венской стратегической каявомань операциянть, штобу тапамс немецко-венгерской войскатнень ды саемс Австрия масторонть столицянть. Те операциясонть примасть участия минек колмоце Украинской фронтонть войскатне ды Дунайской флотилиянть марто омбоце Украинской фронтонть керш флангонзо. Васенцекс ушодызь эртевеманть нилеце ды вейксэце гвардейской армиянь соединениятне.
Михаил Алексеевич ледстнесь: «Пек аштить мельсэнь казямо тюрематне Венгриясо Балатон эркенть лангсо, тёжа вейксэсядт ниленьгемень ветеце иестэнть. Мор ошонть кис тюремасонть мон тапинь ятонь танк. Неть тюрематнесэ маштовсь монь боевой ялгам Соколов Володя.»
Чады ковонь кевейкееце ды кемгавтовоце читнестэ ютась Вена ошонть кис прявтонь штурмась. Минек колмосядт ниленьгемень сисемеце стрелковой полкось каявсь Вена ошонть лангс обедёнкс ёндо, весенень содавикс Венской виренть пачк.
Шкась валске марто. Курок сыргамо эртевемас. Миша мадезь ашти окопсо, ванны менеленть лангс. Менелесь сэнь-сэнь, ушосонть тундо, чувтнэ вельтявсть пиже лопасо, морыть нармунть, маряви сэтьмечись маласо-мелезэ эрямс, эрямс ды эрямс.
Чады ковонь кемголмовоце чистэ тёжа вейксэсядт ниленьгемень ветеце иестэ Вена ошось ульнесь саезь. Венской операциядонть мельга вейксэце гвардейской армиясь олякстомць Чехословакия. Цвети ковонь омбоце чистэ тёжа тёжа вейксэсядт ниленьгемень ветеце иестэ Климент Ворошилов максь боецтнэнь икеле тюрематнень прядоматнес килангов вал. Колмо чинь ды вень пертень муцявома маршонть мельга, полкось пачкодсь Зноймо ошонть алов. Ошонть кис тюремась ульнесь пек кежев ды пек бойка. Зноймо ошось, Чехословакиясо кармась васень ошокс, конань олякстомтызь ятонть эйстэ минек Советской войскатне. Чехтне ды словактне невтсть алкуксонь кеняркс ды эрьгедевкс, знярдо вастасть Якстере Армиянь воинтнэнь.
Войнанть прядомадонть Михаил Алексеевич мезть кармасть содамо цвети ковонь вейксэце чистэ обедшкава, те чись кармась миненек войнань поладксокс. Минек войскатненень савсь воёвамс ещё эсэсовской ды власовской частнень марто, конатне эзть бажа максовомс полонс. Коршунов Михаил Алексеевич войнасть прядызе цвети ковонь кемголмовоце чистэ, зярдо минек войскатне вастовсть американской войскатне марто Влтава леенть лангсо Чехословакиясо.
Ловносынек Михаил Алексеевич Коршуновонь наградной листэнзэ:«Чады ковонь кеветееце чистэ тёжа вейксэсядт ниленьгемень ветеце иестэ Санкт-Пельтен ошонть кис тюрематнесэ, Коршунов ялгась ПТР ружиянь толсо тапась кавто противникень толонь точкат, истя жо тапинзе сынст расчетост.
Вильгельмсбург ошонть кис тюрематнесэ чады ковонь кемгавксовоце чистэ тёжа вейксэсядт ниленьгемень ветеце иестэ потавтсь противникень бронетраспортёр, теде мельга минек подразделениясь сыргась икелев молемас. Весе неть тюрематнесэ Коршунов ялгась невтсь апелемачи, аляксчи ды кемечи. Коршунов ялгась достоин правительственной казнес-колмо степенень Славань орденс».
Войнань китнень прядомадо мельга Михаил Алексеевич ульнесь кучозь Московской военной округонь сядо котоце Гвардейской воздушно-десантной дивизияс военной службас ды велявтсь кудов ансяк тёжа вейксэсядт ниленьгемень вейксэце иестэ. Васня важодсь колхозсо «Омбоце Пятилетка», таштам ковсто кармась важодеме райкомсо пропагандистэкс. Тёжа вейксэсядт кодгеменце иестэ сон пряды Горький ошонь Высшей Партийной школа. Важоди газетасо «Колхозникень вайгель» редакторонь заместителекс, мейле Теньгушевской ды Темниковской райкомонь омбоце ды васенце секретарекс.
Тёжа вейксэсядт сизьгемень ветеце иестэ саезь тёжа вейксэсядт кавксоньгемень ветеце иес важодсь Темниковской сельскохозяйственной техникумонь директорокс. Пенсияс туемадо мельга ламо иеть ульнесь Темниковской райононь Ветеранонь Советэнь прявтокс. Вастневсь од ломантнень марто, максь тенст эсь сюпав эрямонь опытэнзэ.
Кавто тёжань иестэнть Коршунов Михаил Алексеевич примась участия Ине Изнямонь парадсонть, Москов ошсо.
Михаил Алексеевич Коршунов ульсь кода ломань, гражданин, талантливой руководитель ды пек вадря раськень кирдиця. Эсь нинзэ, Анна Петровна марто трясть кавто тейтерть, ниле нуцькат, кемень правнуцькат ды вейке праправнук. Неень шкане сон эри Темников ошсо.
Михаил Алексеевичнень ёвтатано покштояк покш сюкпря, сонзо ратной ды важодемань подвигензэ кис. Шумбрачи тенк! Сэтьме менель! Эрядо кувать ды уцяскасо!
Чиндяйкина Т.В. - Мемориальной музеень сотрудникесь.
