 Иван Степанович Кудашкин чачсь Кочкуровской райононь Подлесная Тавла велес. Ине Отечественной войнань иетнестэ сон таго одов теизе Николай Гастеллонь подвигензэ. Сынь ульнесть колмонест. Колмо коштонь боецт-коммунист: гвардиянь лейтенантось Иван Кудашкин- экипажонь командир, гвардиянь лейтенантось Александр Чернов -штурманось ды гвардиянь сержантось Петр Уханов -стрелок-радистэсь. Кавксоньгеменьксть сынст самолётост кошсто тапась фашистнэнь живой сила ды техника. Кавксоньгеменце ливтямост а кулыцякс кадынзе весе экипажонь члентнэнь лемест. Се чистэнть менельганть уйсть алкине стака пельтне. Кудашкинэнь экипажонть туртов максозель задания: тапамс сэденть, конась ульнесь теезь Днестра леенть трокс, Ляшевица районсонть ды коламс ятонь ушмотнень ютамо-печтема тарканть. Задачась путозель стака. Но командирэсь содась Кудашкинэнь назойчиденть, Черновонь алкуксонь расчёттонзо ды кельме седейдензэ, Ухановонь мужествадонзо, овсе эзь сумлёва сынст изнямо лангсо. Самолётось ливтизе фронтонть линиянть, появась пуртнезь-менчезь леенть лентазо. Вана ятонь ютамо-печтема таркась. Танктне, автомашинатне, артиллериясь. Печтема тарткантень пачкодезь, Кудашкин велявтызе самолётонзо. Зэркстасть зениткатне. Самолётось сыргась атакав. Колмосядт ведьгемень метрань сэрьстэ ёртозь бомбатне, леенть потмаксос тусь фашистской техникась. Од вийсэ вачкодсь немецень зениткатне. Кудашкинэнь самолётонть перть-пельга кемензасть снаряднэнь сезневематне. Боевой задачась топавтозь. Но Иван Степановичень экипажонть лиядсть ещё знярыя бомбазо, а леень керш ёно берёк чиресь пешксель танкто ды артиллериядо. Кудашкин омбоцеде велявтсы самолётонть, но те шкастонть зениткань снарядось понги самолётонть бензобаконтень. Сон теке толонь штатол кармась паломо. Не минутатнестэ кияк экипажонть эйстэ эзь арсе эрямодонть. Остаткакс, толонь виев даволокс, самолётось ливтясь леенть вельска. Кудашкин весе виензэ ды мелензэ путызе ятонь техниканть ёнов, ведь тосо ульнесть пурнавозь танкт, орудият, топлива марто цистернат, автомашинат. Сон ураганокс ливтясь путозь целенть лангс. Зэрниця взрывесь соракавтызе коштонть. Ёмасть толонть потс немецень танктне, автомашинатне, сезневсть топлива марто цистернатне, боеприпастнэ. Истя топавтызь Чачома Масторост икеле эсь долкост коммунистнэ-гвардеецтнэ. «Эзть велявто заданиянь топавтосто!»- истя ульнесь сёрмадозь колоньгемень котоце гвардейской бомбардировочной авиационной полконь ливтямонь ловома книгасонть, эйзюро ковонь колоньгемень васенце чистэ, тёжа вейксэсядт ниленьгемень нилеце иестэ. Тёжа вейксэсядт вейксэньгемень васенце иестэ Кудашкин Иван Степанович ульнесь посмертна казезь Советской Союзонь Героень лемсэ. Т.В. Чиндяцкина - н. сотрудник Мемориального музея.
| 
