Борис Михайлович Киреев чачсь тёжа вейксэсядт комсь нилеце иестэ ожо ковонь колмоце чистэ Ардатова ошос. Тетязо важодсь чугункань ки лангсо, авазо ульнесь учительница. Тёжа вейксэсядт колоньгемень колмоце иестэ тетянзо путызь чугункань кинть начальникекс ды сынь туить эрямо Красный Узел станцияв. Тесэ Борис пряды кемень класст ды карми важодеме вагононь депосо. Устававсь Ине Отечественной войнась, васняяк Борисэнь фронтов эзть сае, эзь сакшно ещё шказо. Тёжа вейксэсядт ниленьгемень омбоце иестэ, умарь ковонь кемнилееце чистэ, сонзо тердизь военкоматов. Васня Киреевень саизь Рузаевкав, поездэнь пурнамо. Вейке ды пель ковонь ютазь те частенть калавтызь, Борис ульнесь кучозь Сверловск ошонтень, колмо ковонь пертень курсав, танконь механик-водителекс тонавтнеме. Тёжа вейксэсядт ниленььгемень колмоце иестэ, якшамо ковсто саезь, сон воеви немецко-фашистской захватчиктне каршо Ине Отечественной войнань фронтнэсэ. Васняяк васенце Украиской фронтсо, мейле омбоце Белорусской. Войнанть прядызе Берлин ошсо. Сон колмксть ульнесь ранязь, кавксть стакасто контузявозь, ветексть палсь танксо - сась войнасто инвалидэкс. Якшамо ковонь комсь нилеце чистэ, тёжа вейксэсядт ниленьгемень нилеце иестэ минек войскатне олякстомцть Украинанть. Борис ульнесь стакасто ранязь. Сынст танкось неть кажов, верде верьс тюрематнесэ тапавсь. Борисэнь боевой ялганзо таргизь палыця танкстонть, варчизь седеень чавоманзо, сон эзь маряво. Ловизь сонзо маштозевекс, саизь документэнзэ ды направизь штабов, штобу сёрмадовольть куломань конёв. Эсензэ-Киреевень кадызь тюрема паксянть лангс, штобу калмиця командась калмавлизе сонзо Братской калмс. Зяро сон ульнесь якшамонть ало, Борис, а соды. Калмицятне калмс нолдамстонзо редизь, што сонзо рунгозо эзь канксомо, ашти лембестэ, хоть сон уже знярыя часонь ютко ашти кельме мода лангсо. Киреевень бойкасто отправизь госпиталев. Госпитальсэ лецямодо мельга, Борис таго туи фронтов. А Красной Узелэв, кудо раськентень, сась куломань конёв. Киреевень сазоронзо те конёвонть аваст туртов эзизь невте. Аламо шкань ютазь сы серма Борисэнь боевой ялганзо, Зверевень пельде, конань авась ловносы. Сон сермады кода Киреев маштовсь ды козонь сонзо калмизь. Авасть седейс эзь кельге ризксэсь, ведь овсе аволь ламо шка ютась, кода кулось мирдезэ, Борисэнь тетязо. Борис фронтов велявтомадо мельга кудов сермат эзь сермале, эзь ёвта, што сон лиядсь живойкс, ведь войнань китнева эрьва чине якат кулома ланга, сон содась, если аванзо туртов омбоцеде сы куломань конев сонзо седеесь а цидярды. Войнань стака китнева ютазь, Киреевень экипажозь полавтовкшнось ансяк кавксть. Берлин ошонть кис тюрематнесэ танковой дивизиянть, косо воевась Борис, максызь Георгий Константинович Жуковонь кедь алов. Танконь командирэст ульнесь Советской Союзонь Герой, Виктор Степенович Лазаренко-старшей лейтенантось. Лазаренконь кудо раськенть немецтне истожизь Викторонь сельме икеле. Повизь сонзо аванзо, наргизь кавто сазоронзо, маштызь тетянзо. Лазаренко эрьва чи пандсь кежть немецтненень, сон эзь жаля, а сыреть, а вишкинеть, а тейтерь ават. Командирэсь истя мериль экипажонть каршо, кадык монь чавсамизь, но кежень пандомо мон а лоткан. Зярдо сынст танкось совась Берлин ошонтень, весе ошонть куротне ульнесть чавот. Сынь лоткавтызь боевой машинанть. Экипажось лись танкстонть. Сынь мерсть командирэнть туртов аламос учомс, кадык минек артиллериясь леднесынзе васня ошонть куротнень, мейле тюрематнес совить танктне. Но Лазаренко сынст мартов ве мельс эзь са, сон мерсь, што сонсь леднесазо экипажонть, бути сынь а сыргить атакав ды а кунсолосызь командирэнть. Виктор Степанович сонсь ветясь танконть, овсе аволь ламо метрат сынь кенерсть ардомо, кода танконтень понгсь ятонь снаряд ды боевой машинась тапавсь. Киреев, танкстонь, кенерсь лисеме люконть пачк ды таргизе командирэнть. Остатка боевой ялганзо идеме эзь кенере, сынь весе лиядсть паломомо танконтень. Сон ульнесь ранязь, Лазаренконь сезевсь вейке пильгезэ. Сынст кавонест путызь вейке госпитальс. Киреев мольсь госпиталень начальникенть туртов ды мерсь штобу сонзо саевлизь лия госпиталев, а то сон маштсазо командирэнзэ эсь чавовозь ялгатнень кис. Ине Изнямонть Борис Киреев вастсазо госпитальсэ. Кудов сон велявты войнадо мельга ацам ковонь колоньгемень васенце чистэ тёжа вейксэсядт ниленьгемень ветеце иестэ. Т.В. Чиндяйкина - н. сотрудник Мемориального музея. |
