Хоть кодамо шкасто покш питне канды воинской славась ды доблестесь, сынь тешкставить эрьва кода-балладасто саезь покш государственной казес. Ине Отечественной войнань шкасто истямо казекс ульнесь Ленинэнь орден марто «Сырнень теште» медалесь. Нилеце ломанекс, конань казизь Советской Союзонь Героень лемсэ, а тень марто Ленинэнь орденсэ ды «Сырнень теште» медальсэ минек Мордовиясо, кармась улеме Виноградов Геннадий Павлович, Красноармейск ошонь кис тюрематнестэ давол ковсто тёжа вейксэсядт ниленьгемень колмоце иестэ. Виноградов Геннадий Павлович чачсь ожо ковонь комсеце чистэ Починки велес неень шкань Большеберезниковской районс сокицянь-видицянь кудо раськес. Прядынзе средней школань аволь весе класстнэнь ды кемнилееце иесэ кармась важодеме колхозсо. Тёжа вейксэсядт ниленьгеменце иесэ ульнесь саезь Якстере Армияв, Мурманск ошонть малас пограничной частес. Служась Северной флотсо береговой орудиянь командирэкс. Армиясто понги Ине Отечественной войнань фронтнэс. Тёжа вейксэсядт ниленьгемень кавтоце иестэ ульнесь ранязь. Лецямодо мельга кучозель запасной полков, тосто кодгемень котоце танковой бригадань разведротань автоматчикень взводов. Гвардиянь рядовоесь Виноградов невтизе прянзо давол ковонь кемгавксовоце чистэ тёжа вейксэсядт ниленьгемень колмоце иестэ Красноармейск ошонть кис тюрематнесэ. Бригадань штабонть куродызь вете ятонь танкт. Минек танконь орудиянь толсо Виноградов колмо немецень танктнень тапинзе. Мейле Т-34 танксо Боевой Знамянть ды ранявозь бригадань командирэнть идезь сон сезеви куродовксонть потсто. Те-подвигенть кис тёжа вейксэсядт ниленьгемень колмоце иестэ чады ковонь кемзисемгеце чистэ сон казезель Советской Союзонь Героень лемсэ. Тёжа вейксэсядт ниленьгемень котоце иестэ сон лейтенантонь званиясо ульнесь демобилизовазь Якстере Армиясто. Войнадо мельга важодсь Пенза ошонь вирень анокстамонь конторасо, мейле тёжа вейксэсядт кодгемень кавтоце иестэ важоди заводсо мастерэкс. Эри Березник ошсо. Обычной героень, обычной эрямонь ки. Но тесэ овсе лия история. Тёжа вейксэсядт ниленьгемень кавтоце иес Виноградов ульнесь аволь Виноградовокс, лемезэяк ульнесь аволь Гена, ансяк тетя лемесь ульнесь истя жо Павлович. А историясь ульнесь истямо: тёжа вейксэсядт кодгемень кавтоце иестэ Починки велес сась Советской Союзонь Героесь Виноградов Геннадий Павлович. Велень эрицятне сонзо эйстэ содызь эсь велень эрицянть, конась кантнесь лия фамилия ды лия лем. Те лангсо седе курок сынь сёрмадыть Мордовской обкомов сёрма, штобу те тевенть тосо вадрясто вановлизь да проверявлизь. Эзь урьваксто ли те ломанесь Советской Союзонь вдова лангс ды ней истя кантни кулозь Героенть награданзо? Те тевенть кедь алов саизе Горьковской областень КГБ-сь. Тевенть проверямсто лангс листь алкуксонь фамилиясь ды лемесь - Губанишев Иван Павлович. Губанишев Иван Павлович тёжа вейксэсядт ниленьгень омбоце иестэ понги пленс, пленстэ лисемадо мельга (кода менсь теде а содатано, сонсь оргодсь или олякстомтызь?) сон понги госпитальс, кедьсэнзэ кодаткак документ арасельть, ды госпитальстэ уже сон лиси Виноградов Геннадий Павловичекс. Чачома ие ёвтась тежа вейксэсядт кемголмовоце, комсь иень таркас. Те лементь ды фамилиянть марто тёжа вейксэсядт ниленьгемень колмоце иестэ давол ковсто теи подвиг, конань кис ульнесь казезь Ленинэнь орденсэ ды «Сырнень теште» медальсэ, максозель тензэ Советской Союзонь героень лем. Тевесть пекстасызь. Ломанесь тейсь действительной подвиг. КГБ-сь берянь ланганзо мезеяк эзь муе. Сон сонсь наказызе эсь прянзо, пеледе ламо эрямо ки сон эрясь аволь эсензэ эрямосо, лия ломанень лемсэ ды фамилиясо. Мись сон истя тейсь соды сонсь, минь ансяк можем теемс истямо арсема, што сон содылизе вадрясто кавтосядт сизьгеменце приказонть, конась лисекшнесь умарь ковонь кемготовоце чистэ тёжа вейксэсядт ниленьгемень васенце иестэ, тосо сермадозель пленс понгозь красноармеецтнэнь кудо раськест кадомс государственной лездавкстомо ды пособиявтомо, секс наверна сон и полавтызе фамилиянзо ды лемензэ, штобу тетязо ды авазо авольть понго те приказонть алов. Генадий Павлович туи эрямостонть тёжа вейксэсядт кавксоньгемень колмоце иестэ умарь ковонь сисемеце чистэ. Чиндяйкиной Т.В. - научный сотрудник Мемориального музея военного и трудового подвига 1941-1945 гг. | 
